Jesusqa Jerusalén llaqtamanmi rinan karan, ichaqa Zaqueoq wasillanpiraqmi kashanman karan discipulonkunawan. Discipulonkunaqa piensasharankun “Diospa gobiernon” chayamunanpaqña kashananpaq (Lucas 19:11). Chaymi Jesusqa paykunaman juj ejemplota willaran chay piensayninkuta correginanpaq.

Niranmi: “Reykunaq familianpi naceq runan karu llaqtaman viajaran rey kananpaq nombramiento chaskiq, chhaynapi reyña kutimunanpaq”, nispa (Lucas 19:12). Chay ‘reykunaq familianpi naceq runaqa’ Jesustan representaran, viajasqan ‘karu llaqtataq’ janaq pachata representaran, chaypin Diosqa reyta churanan karan.

Chay ejemplopi runaqa manaraq viajashaspas chunka kamachinkunata wajachimusqa, jinaspa sapankaman askha qolqeta qospa nisqa: “Kaywan negociota ruwaychis kutimunaykama”, nispa (Lucas 19:13). Chay chaskisqanku qolqeqa ancha valorniyoqmi karan, yaqa kinsa killa llank’asqamanta pagoq valesqanmi karan.

Ñaupaqpin Jesusqa discipulonkunata compararanña chajrapi llank’aqkunawan, chhaynaqa chay chunka kamachikunamanta rimaqtinqa entienderankuchá paykunamanta rimashasqanta (Mateo 9:35-38). Paykunatan Jesusqa ajllaran espiritual cosechapi llank’anankupaq, chhaynapi juj runakunapas Diospa gobiernonman jaykunankupaq. Jesuspa discipulonkunaqa tukuy tiemponkuwan, kallpankuwan, kaqninkuwan iman chay ruwaypi llank’ananku karan.

Chaymantan Jesusqa nillarantaq: “Chay runaq llaqtamasinkunan ichaqa payta cheqnikuranku, chaymi qhepanta kacharanku juj comisionta: ‘Manapunin munaykumanchu kay runa reyniyku kanantaqa’, nispa nimunankupaq”, nispa (Lucas 19:14). Chay runaq ‘llaqtamasinkunaqa’ Jesuspa contranpi kaq judiokunatan representaran, chay runakunaqa Jesusta wañuchiytaraqmi munaranku. Chaymi Jesús janaq pachaman ripuqtinqa discipulonkunata qatikacharanku, chhaynapin rikuchiranku manapuni Jesusta reyninkupaq munasqankuta (Juan 19:15, 16; Hechos 4:13-18; 5:40).

Chaymantan Jesusqa nillarantaq: “Unay tiempomanta reyña kutimuspanmi [patronqa] qolqen saqesqan kamachinkunata wajachimuran, negociota ruwaspa jayk’atachus ganaranku chayta yachananpaq. Jinan jujnin kamachiqa payman achhuykuspa niran: ‘Señorníy, qolqeykin chunkata wacharun’, nispa. Chaymi reyqa niran: ‘¡Kusapuni, allin kamachi! Qanqa sinchi pisi kaqkunapin rikuchinki junt’aq kasqaykita, kunanqa chunka llaqtakunata kamachiy’, nispa. Jujninpas payman achhuykuspan niran: ‘Señorníy, qolqeykin wacharun pisqata’, nispa. Jinan paytapas nillarantaq: ‘Pisqa llaqtakunamanta encargakuy’”, nispa (Lucas 19:15-19).

Chay kamachikuna jinachus Jesuspa discipulonkunapas tukuy atisqankuta ruwankuman karan chaskisqanku llank’anapi chayqa, sumaqtan Jesusqa paykunata qhawarinan karan, jinaspa premionkuta qonan karan. Jesusqa yacharanmi discipulonkuna mana kaqtakamachu ruway atisqankuta, chaywanpas payqa ‘reyña kutimuspa’ llapankumanmi premiota qonan karan espiritual cosechapi tukuy sonqo llank’asqankumanta (Mateo 28:19, 20).

Ichaqa, ¿iman pasanan karan mana chhaynata llank’aqtinku? Chaymantan Jesús niran: “Jujnin [kamachitaq] ichaqa payman achhuykuspa niran: ‘Señorníy, kayqa chay qolqeyki, pañopi wataruspan waqaycharani. Phiña runa kasqaykiraykun manchakurayki; qanqa mana churasqaykimantan oqarinki, mana t’akasqaykimantan cosechankipas’, nispa. Jinan reyqa niran:  ‘Mana allin kamachi, simillaykimantataqmi juchachasayki. Yacharankitaq phiña runa kasqayta, mana churasqaymanta oqariq kasqayta, mana t’akasqaymanta cosechaq kasqaytapas chayqa, ¿imaraykutaq chhaynari mana bancomanchu qolqeyta churapuwaranki? Chhaynapi noqaqa chayamuspay interesniyoqta orqokapushayman karan’, nispa. Jinaspan reyqa chaypi sayashaqkunata niran: ‘Chay qolqeta qechuychis, jinaspa qolqeyta chunka kutita mirachiqman qoychis’”, nispa (Lucas 19:20-24).

Chay mana allin kamachiqa mana llank’asqanraykun tukuy imantapas pierdepuran. Chaywanmi Jesusqa apostolninkunata kallpachasharan tukuy sonqowan Diospaq llank’anankupaq, mana chayqa manan Diospa gobiernonmanqa jaykunankuchu karan.

Apostolkunaqa anchatachá kallpachakuranku Jesuspa imachus nisqanwan. Chaymantan payqa niran: “Pipas kaqniyoqmanqa astawanraqmi qosqa kanqa, mana kaqniyoqmantan ichaqa imanña kanman chaypas, qechusqa kanqa”, nispa. Jinaspa willaran ‘rey kananta mana munaq enemigonkuna’ wañuchisqa kanankumanta. Chaykunata willaspanmi Jesusqa Jerusalén llaqtaman puririran (Lucas 19:26-28).