Atâa so Jésus ayeke gue na Jérusalem, âmanke lo na adisciple ti lo angbâ lakue na ndo ti Zachée. Adisciple ni apensé lani so “Royaume ti Nzapa”, so a soro Jésus ti duti Gbia ni, ayeke gue ti komande na ndembe ni so la (Luc 19:11). Ala mä yâ ti tënë ni so na lege ni ape, gi tongana ti so ala comprendre ape so Jésus adoit ti kui. Tongaso, Jésus atene na ala mbeni toli ti aidé ala ti hinga so ngoi so Royaume ni ayeke komanse ti komande na ni angbâ lani ayo mingi.

Na yâ ti toli ni, Jésus atene: “Mbeni koli ayeke dä so a dü lo na yâ ti sewa ti akota zo. Lo gue na mbeni yongoro kodro ti tene a zia lo gbia si lo kiri.” (Luc 19:12). A hunda lani alango mingi ti sara mara ti tambela tongaso. A yeke polele so, Jésus la ayeke ‘koli so a dü lo na yâ ti sewa ti akota zo’ na so ague na “mbeni yongoro kodro”, so ti tene na yayu, ndo so Babâ ti lo ayeke sara si lo ga Gbia.

Na yâ ti toli ni, kozo si ‘koli so a dü lo na yâ ti sewa ti akota zo’ ahon, lo iri angbâa ti lo bale-oko na lo mû na ala oko na oko mine ti argent, na lo tene na ala, lo tene: “Ala dë buze na ni juska mbi kiri.” (Luc 19:13). Mine ti argent ni mveni ayeke kete nginza ape. Ngere ti mine oko alingbi na nginza so a yeke futa lani na mbeni zo ti fango yaka na yâ ti nze ota.

Adisciple ni adoit ti hinga so a yeke ala la ayeke tongana angbâa bale-oko ti yâ ti toli ni so, ndali ti so, na yâ ti ambeni fango ye ti lo, Jésus ahaka ala awe na azo ti kua so ayeke fâ lê ti kobe na yâ ti yaka (Matthieu 9:35-38). Jésus ayeke hunda na ala ti ga ti sara kua ti tâ fango lê ti kobe la ape. Nde na so, fango lê ti kobe ni andu tënë ti sarango ambeni disciple so alingbi ti komande ande na yâ ti Royaume ti Nzapa. A lingbi ala mû ngoi ti ala, ngangu ti ala na même mosoro ti ala ti wara azo ni so.

Nyen la encore Jésus aye ti fa ni na yâ ti toli ni so? Lo tene so azo ti kodro ni “ake [koli so a dü lo na yâ ti sewa ti akota zo so], ala tokua alembe na peko ti lo ti tene na lo: ‘E ye pëpe ti tene mo ga gbia ti e.’” (Luc 19:14). Adisciple ahinga so aJuif aye ka tënë ti Jésus ape na ambeni aye même ti fâ lo. Na peko ti so Jésus akiri ande na yayu, aJuif ni ayeke fa so ala ye lo ape na lege so ala yeke sara aye ti ngangu na adisciple ti lo. Azo ni so ayeke fa so ala ye pëpe ti tene Jésus la aduti Gbia ti ala.—Jean 19:15, 16; Kusala 4:13-18; 5:40.

Legeoko tongana angbâa bale-oko so, na lege wa la adisciple ni ayeke sara kua ande na mine ti ala ni ti londo na ngoi so ‘koli so a dü lo na yâ ti sewa ti akota zo’ ague ti tënë “a zia lo Gbia” juska ti si na ngoi so lo yeke kiri na ni? Jésus afa ni atene: “Na peko ti so lo ga gbia na lo kiri na kodro ti lo, lo hunda ti tene a iri na lo angbâa so lo mû lani na ala nginza so. Lo ye ti hinga ye so ala wara na peko ti dengo buze ni. Kozo ngbâa ni aga, lo tene: ‘Seigneur, mine ti mo adü ambeni bale-oko na ndo ni.’ Lo tene na ngbâa ni: ‘So nzoni, mo nzoni ngbâa! So mo yeke be-ta-zo na yâ ti ye so ayeke tâ kete mingi, gue mo komande na ndo ti agbata bale-oko.’ Use ngbâa ni aga, lo tene: ‘Seigneur, mine ti mo adü ambeni oku na ndo ni.’ Lo tene nga na ngbâa so: ‘Mo kue, gue mo komande na ndo ti agbata oku.’”—Luc 19:15-19.

Tongana adisciple ni ahinga so ala la ayeke tongana angbâa ni so, so amû ngoi ti ala, ngangu ti ala nga mosoro ti ala kue ti sara gbâ ti adisciple, ala peut ti hinga biani so a yeke nzere ande na Jésus mingi. Na ndo ni, ala peut ti duti na confiance so lo yeke futa ande ala ndali ti ngangu so ala sara so. Me, a yeke tâ tënë so dutingo ti adisciple oko oko ayeke nde nde. Ye oko, Jésus, so “a zia lo Gbia”, ayeke hinga ande ni na lo yeke zia ande tufa na ndo ti a-effort so ala sara.—Matthieu 28:19, 20.

Fadeso, bâ mbeni ye so ayeke nde, so Jésus afa ni na yâ ti toli ni. Lo tene: “Me mbeni nde aga, lo tene: ‘Seigneur, bâ mine ti mo la, mbi honde ni na yâ ti bongo. Mo hinga, mbeto ti mo asara mbi mingi ndali ti so mo yeke zo so ason mingi. Mo yeke zia nginza na banque ape, me mo yeke mû nginza kâ. Nga mo yeke ko ye so mo la mo lu ape.’ Lo tene na ngbâa so: ‘Mo sioni ngbâa so, mbi fâ ngbanga na li  ti mo alingbi na tënë ti yanga ti mo. Mo hinga bien so mbi yeke zo so ason mingi, mbi zia nginza na banque ape, me mbi yeke mû nginza kâ nga mbi yeke ko ye so mbi la mbi lu ape. Tongaso, ngbanga ti nyen mo zia nginza ti mbi na banque ape? Si na kiringo ti mbi, mbi mû ni na mbeni ye na ndo ni.’ Na pekoni, lo tene na azo so aluti na tere ti lo: ‘Ala mû mine ni na maboko ti lo, ala mû ni na lo so ayeke na amine bale-oko.’”—Luc 19:20-24.

Ngbâa ni so aperdre ambeni ye ndali ti so lo sara pëpe si mosoro ti Royaume ti maître ti lo akono. Abazengele angbâ ti ku lani ti tene Jésus akomanse ti komande na yâ ti Royaume ti Nzapa. Tongaso, na lege ti tënë so Jésus atene na ndo ti ndangba ngbâa ni so, peut-être adisciple ni ahinga so tongana ala sara a-effort ape, ala yeke wara ande place na yâ ti Royaume ti Nzapa ape.

Atënë ti Jésus so adoit ti kiri ti pusu adisciple ti Jésus so ayeke be-ta-zo ti kiri ti sara kua ngangu mingi. Ti hunzi na ni, Jésus atene: “Mbi tene na ala: Zo kue so ayeke na ye, a yeke mû na lo mbeni na ndo ni. Me zo so ayeke na ye ape, même kete ye so lo yeke na ni, a yeke zi ni na tïtî lo.” Lo tene nga so a yeke fâ ande awato ti lo so ‘aye pëpe ti tene lo ga gbia ti ala’. Na peko ti tënë so, Jésus amû lege ti gue na Jérusalem.—Luc 19:26-28.