Kaanga mbele la Jɛrusalɛma mbakatatshɔka Yeso, ondo nde eke paka lo luudu la Zakɛyo nde l’ambeki ande. Vɔ wakafɔnyaka dia “Diolelo dia Nzambi” diakahombe shikikɛma aha la tshimbatshimba ndo Yeso monga Nkumekanga. (Luka 19:11) Vɔ komboka dimɛna dikambo sɔ, oko wakiwɔ koshihodia dia Yeso akahombe ndjakema. Diakɔ diele nde akawasha wɛɛla ɔmɔtshi dia mbakimanyiya dia mbeya dia Diolelo diayoya edja efula l’ɔkɔngɔ.

Nde akate ate: “Pami kɛmɔtshi ka lokumu aki suke la minda lɔkɛndɔ otsha lo wodja ɔmɔtshi w’etale dia tahenyama l’okudi wa nkumekanga ko nde nkalola.” (Luka 19:12) Lɔkɛndɔ lɔsɔ lakahombe mbɔsa etena k’otale. Mbokɛmaka hwe dia Yeso kele “Pami kɛmɔtshi ka lokumu” kakande lɔkɛndɔ otsha lo “wodja ɔmɔtshi w’etale,” l’olongo, lɛnɛ ayotowosha She okudi wa nkumekanga.

Lo wɛɛla ɔsɔ, ntondo ka “pami kɛmɔtshi ka lokumu” ntshɔ, nde akelɛ ase olimu dikumi ndo akasha onto l’onto okenga wa mina ndo akawatɛ ate: “Nyonde okanda la yɔ polo lam’ayomoya.” (Luka 19:13) Mina ya mɛtɛ mɛtɛ ekɔ ekenga wa falanga yele la nɛmɔ. Mina ɔtɔi ekɔ difuto dia ngɔndɔ shato y’okambi wa dikambɔ.

Ondo ambeki wakakoke mbeya dia vɔ wekɔ oko as’olimu dikumi wa lo wɛɛla ɔsɔ nɛ dia Yeso ambowaɛdikaka l’ekambi wa lo dinela. (Mateo 9:35-38) Lo mɛtɛ, nde kombalɔmba dia mbela ntɔngɔ y’oma lo dinela. Koko, dinela mendanaka la ambeki akina wakakoke nkondja dihole lo Diolelo dia Nzambi. Ambeki kambaka la akoka wele lawɔ dia ntondja ekitɔ ekina wa lo Diolelo.

Kakɔna kakɛnya Yeso nto lo wɛɛla ɔsɔ? Nde akate dia ase wodja ande “[wakahetsha pami ka lokumu] ndo wakatome atomami l’ɔkɔngɔ ande dia tota ɔnɛ: ‘Sho hatolange pami kɛnɛ monga nkumekanga kaso.’” (Luka 19:14) Ambeki wakeyaka dia ase Juda hawetawɔ Yeso, amɔtshi wakalange kaanga mbodiaka. L’ɔkɔngɔ wa nyɔi ka Yeso ndo ka etshwelo kande l’olongo, ase Juda lo tshɛ kawɔ wakɛnya lohetsho lawɔ le nde lo pɛnyahɛnya ambeki ande. Atunyi asɔ wakɛnya dui sɔ hwe dia vɔ hawolange Yeso oko Nkumekanga.​—Joani 19:15, 16; Etsha 4:13-18; 5:40.

Lo kɛnɛ kendana l’ase olimu dikumi, ngande wakawakambe la mina yawɔ polo l’etena kakalongola “pami kɛmɔtshi ka lokumu” “okudi wa kumekanga” ndo kakandakalola? Yeso akate ate: “L’ekomelo, lam’akandakalola l’ɔkɔngɔ wa nde mbahema l’okudi wa nkumekanga, nde akelɛ ase olimu ande wakandasha falanga dia mbeya wahɔ wakawakondja lo okanda awɔ. Ko ose olimu wa ntondo akaye ndo akate ate: ‘Owandji, mina yayɛ yamboota nkina 10.’ Nde akawotɛ ate: ‘Wɛ ambosala dimɛna ndo wɛ ekɔ ose olimu w’ɔlɔlɔ! Lam’ele wɛ ambɛnya kɔlamelo yayɛ lo kiambokambo ya tshitshɛ, onga owandji w’esomba 10.’ Ose olimu wa 2 akaye ndo akate ate: ‘Owandji, mina yayɛ yamboota nkina 5.’ Nde akatɛ ndo ɔsɔ ate: ‘Wɛ lawɔ onga owandji w’esomba 5.’”​—Luka 19:15-19.

Naka ambeki mbɔsa dia vɔ wekɔ oko ase olimu wakamba l’akoka awɔ dia mbetɛ ambeki akina efula, kete vɔ koka ndjashikikɛ dia Yeso ayɔngɛnangɛna. Ndo vɔ koka monga l’elongamelo dia nde ayowafuta l’ɔtɛ w’etete kawɔ. Eelo, aha ambeki tshɛ wa Yeso mbele l’akambo akɔ waamɛ lo lɔsɛnɔ, mbele la waaso kana akoka wa woho ɔtɔi. Koko Yeso lalongola “okudi wa kumekanga,” ayeya ndo ayɔtshɔkɔla welo wadjawɔ la kɔlamelo tshɛ l’olimu wa mbetɛ anto ambeki.​—Mateo 28:19, 20.

Koko tende otshikitanu etena kambokomiya Yeso wɛɛla ande ate: “Koko, [ose olimu] okina akaye ndo akate ate: ‘Owandji, mina kayɛ kakamalame lo dihɔndɔ tɔ kɛnɛ. Dimi lakakoke wɔma, nɛ dia wɛ ekɔ kanga awui wolo. Wɛ tɔsaka kɛnɛ  kakiyɛ komomba ndo wɛ tonaka kɛnɛ kakiyɛ komonɛ.’ Nde akawotɛ ate: ‘Wɛ ose olimu wa kɔlɔ, lambokolombosha lo ndjela ɛtɛkɛta ayɛ. Wɛ akeyaka dia dimi lekɔ kanga awui wolo, latɔsaka kɛnɛ kakimi komomba ndo latonaka kɛnɛ kakimi komonɛ. Ko lande na kakiyɛ kototshika falanga yami lo bankɛ, ko lam’ayomoya dimi ndjoyɔsa la wahɔ?’ “Ko nde akatɛ anto wakemala laawɔ ate: ‘Nyɔɔhɔtɔlɛ mina kele le nde ndo nyokisha ɔnɛ lele la mina 10.’”​—Luka 19:20-24.

Lam’ele nde kokamba dia mfudia ɔngɔnyi wa diolelo di’owandji ande, ose olimu ɔsɔ akashisha. Apɔstɔlɔ wakɛnaka la ntondo Yeso lo ɛlɔmbwɛlɔ ka Diolelo dia Nzambi. Ɔnkɔnɛ lo ndjela kɛnɛ kakandate lo dikambo di’ose olimu w’ekomelo ɔsɔ, ondo vɔ wakakoke mɛna dia naka vɔ bu l’etete, vɔ hawotonga la dihole lo Diolelo sɔ.

Ɛtɛkɛta wa Yeso wakakoke tshutshuya ambeki wele la mbetawɔ dia nyomoleka mbidja welo. Nde akakomiya ate: “Lambonyotɛ nte, onto tshɛ lele la ɛngɔ kɛmɔtshi, wayowokotshɛ dikina, koko onto tshɛ laha la ɛngɔ, wayowɔhɔtɔla ndo kɛnɛ kele la nde.” Nde akakotsha di’atunyi ande wahalange dia nde “monga nkumekanga,” wayodiakema. Ko Yeso akatetemala la lɔkɛndɔ la nde otsha la Jɛrusalɛma.​—Luka 19:26-28.