Chinanga kuti Yesu walutanga ku Yerusalemu, kweni watenere kuti wenga weche kunyumba yaku Zakeyu limoza ndi akusambira ŵaki. Akusambira ŵaki agomezganga kuti kunguja kamanavi kuti “Ufumu waku Chiuta” uyambi kulamuliya, ndipu Yesu ndiyu watingi wajengi Fumu. (Luka 19:11) Yiwu anguyivwisa cha nkhani yeniyi nge po angutondeke kuvwisa nkhani yakuti Yesu wakhumbikanga kubayika. Mwaviyo, Yesu wangukamba ntharika kuti waŵawovyi kuziŵa kuti Ufumu wenuwu watingi uziyambengi kulamuliya kunthazi.

Iyu wangukamba kuti: “Mwana wa fumu yinyaki walutanga kucharu chakutali kuti wakalonde ufumu ndi kuweku.” (Luka 19:12) Ulendu wenuwu watingi utongi nyengu yitali. Tikayika cha kuti Yesu ndiyu “mwana wa fumu.” Ndipu “kucharu chakutali” ko walutanga nkhuchanya ko Awisi atingi akamupaskengi ufumu.

Pakukonkhoska ntharika iyi, Yesu wangukamba kuti “mwana wa fumu” wechendasoki, wangudana antchitu ŵaki 10 ndipu wangupaska wantchitu weyosi ndalama ya siliva ya mina. Ndipu wanguŵakambiya kuti: “Kachitiyeni malonda mpaka po ndawere.” (Luka 19:13) Ndalama ya siliva ya mina yenga yanthazi ukongwa chifukwa mina yimoza yakwananga malipiru nga myezi yitatu nga munthu yo wagwiranga ntchitu yakulima.

Chifukwa chakuti nyengu yinyaki, Yesu wanguyeruzgiya akusambira ŵaki ndi antchitu wo agwiranga ntchitu yakuvuna, yiwu atenere kuti anguziŵa kuti yiwu ŵenga nge antchitu 10 wo akambika mu ntharika iyi. (Mateyu 9:35-38) Pa nyengu iyi, Yesu wanguŵapempha cha kuti azi ndi mbewu zo anguvuna. Mwaviyo, mbewu zenizi zamiyanga kupanga akusambira anyaki wo atingi azisaniyengi malu mu Ufumu waku Chiuta. Akusambira aku Yesu ŵenaŵa, angugwiriskiya ntchitu nyengu, nthazi kweniso vinthu vo ŵenga navu kuti asaniyi ŵanthu anandi wo atingi aziserengi mu Ufumu.

Yesu wangukamba so fundu yinyaki pakukonkhoska ntharika yeniyi. Iyu wangukamba kuti ŵanthu a mucharu chaki “angumutinkha [mwana wa fumu] ndipu angutuma gulu la nthumi kuti limulondo ndi kuchikamba kuti, ‘Tikhumba cha kuti munthu uyu wazije fumu yidu.’” (Luka 19:14) Akusambira aku Yesu aziŵanga kuti Ayuda angumukana Yesu kweniso kuti anyaki akhumbanga kumubaya. Yesu wati wafwa ndi kuluta kuchanya, Ayuda angulongo kuti amutinkhanga mwakutombozga akusambira ŵaki. Vo yiwu anguchita vingulongore limu kuti akhumbanga cha kuti Yesu waje Fumu.—Yohane 19:15, 16; Machitidu 4:13-18; 5:40.

Pa nyengu yo “mwana wa fumu” wanguluta kuchilonde “ufumu” ndi kuweku, kumbi antchitu 10 angugwiriskiya wuli ntchitu ndalama zo angupaskika? Yesu wangukonkhoska kuti: “Munthu yo wati walonde ufumu wanguweku ndipu wangudana akapolu wo wanguŵapaska ndalama kuti wawoni phindu lo asaniya pa malonda ngo achitanga. Sonu kapolu wakwamba wanguza ndi kukamba kuti, ‘Ambuya, pa mina yinu yimoza ndasaniriyapu so mamina 10.’ Mbuyaki wangumukambiya kuti, ‘Wachita umampha ukongwa, ndiwi kapolu wamampha! Pakuti pa chinthu chimana ukongwa walongo kuti we wakugomezgeka, uwoneriyengi matawuni 10.’ Kapolu wachiŵi nayu wanguza ndipu wangukamba kuti, ‘Ambuya, pa mina yinu yimoza ndasaniriyapu so mamina ngankhondi.’ Wangukambiya so kapolu mwenuyu kuti, ‘Yiwi nawi uwoneriyengi matawuni ngankhondi.’”—Luka 19:15-19.

Asani akusambira ŵenaŵa anguziŵa kuti yiwu ŵenga nge antchitu wo angugwiriskiya ntchitu nthazi, nyengu ndi vinthu vo ŵenga navu kuti apangi akusambira anandi, yapa napu atingi aziŵengi so kuti Yesu wangukondwa ukongwa ndi vo anguchita. Yiwu atingi agomezgengi so kuti Yesu wazakuŵatumbika chifukwa cha phamphu lawu. Mbuneneska kuti vinthu venga vakupambana pa umoyu wa akusambira aku Yesu ndipuso weyosi wenga ndi lusu lakupambana ndi la munyaki. Chinanga kuti venga viyo, Yesu yo wangulonde “ufumu,” wazakuŵatumbika chifukwa chakugwira ntchitu yakupanga akusambira mwaphamphu ndipuso mwakugomezgeka.—Mateyu 28:19, 20.

Pakumaliya, Yesu wangukonkhoska kupambana ko kwengapu pakati pa vo antchitu 9 anguchita ndi vo wantchitu yumoza wanguchita. Iyu wanguti: “Kweni kapolu wachitatu wanguza ndi kukamba kuti, ‘Ambuya, mina yinu iyi, ndinguyibisa musalu. Kukamba uneneska, ndakuwopaningi chifukwa chakuti ndimwi munthu mukali; muto vo mukuleka kusunga, ndipuso muvuna  vo mukuleka kumija.’ Mbuyaki wangumukambiya kuti, ‘Kapolu muheni yiwi, ndikuyeruzgengi ndi mazu nga pamulomu paku. Utiti unguziŵa kuti nde mukali, ndito vo ndikuleka kusunga kweniso ndivuna vo ndikuleka kumija? Sonu ungulekiyanji kusunga ndalama yangu kubanki? Ndamweni ndichiweku ndatingi ndilondengi ndalama yangu pamoza ndi zapachanya.’ Vati vaŵa viyo, mbuya yo wangukambiya ŵanthu wo anguma pafupi kuti, ‘Mulondeni mina ndipu muyipereki kwaku yo we ndi mamina 10.’”—Luka 19:20-24.

Chifukwa chakuti wantchitu uyu wangutondeka kusazgiyaku chuma cha mu ufumu wa ambuyaki, vinthu vingumuyende umampha cha. Akutumika alindizganga nyengu yeniyo Yesu wazamulamuliya mu Ufumu waku Chiuta. Mwaviyo, yiwu atenere kuti anguvwisa vo Yesu wang’anamuwanga pakukamba vakukwaskana ndi wantchitu wakumaliya. Ndipu anguziŵa kuti asani azamuja alesi azakungasaniya cha malu mu Ufumu wenuwu.

Pavuli paki, Yesu wangukamba mazu ngo ngatenere kuti nganguŵachiska ukongwa akusambira ŵaki akugomezgeka kuti agwirengi ntchitu mwaphamphu. Iyu wangumaliza ndi mazu ngakuti: “Nditikukambiyani kuti weyosi yo wenavu, wapaskikengi vinandi kweni yo walivi, chinanga ndi vo wenavu walondekengi.” Iyu wangukamba so kuti arwani ŵaki wo akhumbanga cha kuti iyu ‘waje fumu yawu’ azamubayika. Pavuli paki, Yesu wangulutirizga ulendu waki wakuluta ku Yerusalemu.—Luka 19:26-28.