Ating Jisas i laik go long Jerusalem, tasol em i stap yet long haus bilong Sakius wantaim ol disaipel. Ol i ting klostu nau Jisas bai kamapim “Kingdom bilong God” long dispela taim na em yet bai stap King. (Luk 19:11) Ol i no kliagut long mining bilong dispela tok bilong Jisas, wankain olsem ol i no bin klia long em i mas dai. Jisas i mekim wanpela tok piksa, em i laik bai ol i ken save olsem Kingdom bai kamap bihain.

Em i tok: “Wanpela man bilong wanpela lain famili i gat biknem em i raun i go long wanpela longwe ples bilong kisim namba olsem king na bihain em bai kam bek.” (Luk 19:12) Dispela kain raun bai pulim longpela taim. Jisas em dispela “man bilong wanpela lain famili i gat biknem” em i raun i go long “wanpela longwe ples” em heven, na Papa bilong em bai givim namba long em long mekim wok king.

Long dispela tok piksa, paslain long “man bilong wanpela lain famili i gat biknem” i go, em i singautim 10-pela wokboi na em i tilim wanpela mani silva long olgeta wan wan, na em i tokim ol: “Mekim wok bisnis inap long taim mi kam bek.” (Luk 19:13) Wanpela mani silva em bikpela mani long dispela taim bipo. Em pe wokboi bilong gaden bai kisim sapos em i wok inap 3-pela mun samting.

Ating ol disaipel i pilim olsem dispela 10-pela wokboi long tok piksa i makim ol, long wanem, long narapela tok piksa Jisas i bin mekim em i tok ol i olsem wokman bilong bungim kaikai long gaden. (Matyu 9:35-38) Em i no tokim ol long bungim kaikai tru long gaden, nogat. Tasol ol i mas helpim ol narapela long kamap disaipel na bai ol inap mekim wok long Kingdom Bilong God. Ol disaipel i yusim mani samting ol i holim bilong mekim wok long en na kisim sampela manmeri moa bilong Kingdom.

Jisas i stori long wanem narapela samting long dispela tok piksa? Em i tok, ol wanples i “heitim [man bilong wanpela lain famili i gat biknem] na ol i salim sampela man i bringim tok i go long dispela ples em i bin i go long en. Ol i mas tok olsem, ‘Mipela i no laik bai dispela man i kamap king bilong mipela.’” (Luk 19:14) Ol disaipel i save olsem ol Juda i no amamas long Jisas, sampela i laik kilim em i dai. Bihain long Jisas i dai na kirap bek na i go long heven, ol Juda i kirap mekim nogut long ol disaipel, na dispela i kamapim klia tingting bilong ol, ol i no laik bai Jisas i kamap King bilong ol.—Jon 19:15, 16; Aposel 4:13-18; 5:40.

Orait dispela 10-pela wokboi i mekim wanem wok long mani ol i kisim taim “man bilong wanpela lain famili i gat biknem” i “kisim namba olsem king” na bihain em i kam bek? Jisas i tok: “Em i kisim namba olsem king na taim em i kam bek, em i singautim ol dispela wokboi em i bin givim silva mani long ol. Em i laik save long ol samting ol i bin kisim long wok bisnis. Orait namba 1 wokboi i kam na tok, ‘Bikpela, mi kisim 10-pela maina moa long dispela maina bilong yu.’ Na em i tokim em, ‘Gutpela wokboi, yu mekim gutpela wok! Yu bin lukautim gut liklik samting, olsem na yu ken stap bos bilong 10-pela taun.’ Namba 2 wokboi i kam na tok, ‘Bikpela, dispela maina bilong yu i kamapim 5-pela maina moa.’ Na long dispela wokboi tu em i tok, ‘Yu tu, yu ken stap bos bilong 5-pela taun.’”—Luk 19:15-19.

Sapos ol disaipel i luksave olsem ol i wankain long ol wokboi i mekim gutpela wok long mani ol i holim, olsem kamapim planti moa disaipel, orait ol i ken bilip tru olsem Jisas bai amamas long ol. Na ol i ken bilip tru olsem ol bai kisim pe long hatwok ol i mekim. Em tru olsem olgeta disaipel bilong Jisas i gat narapela narapela sindaun, pasin, na save bilong mekim wok. Maski i olsem, Jisas i kisim “namba olsem king” na em bai luksave na blesim pasin bilong ol long mekim gut wok bilong ol long kamapim disaipel.—Matyu 28:19, 20.

Tasol tingim, bilong pinisim tok piksa bilong em, Jisas i tok: “Narapela wokboi i kam na tok, ‘Bikpela, em ya maina bilong yu, mi bin pasim insait long wanpela laplap na putim i stap. Long wanem, mi  pret long yu, yu wanpela hatpela man. Yu save kisim mani yu no bin dipositim na yu save kisim samting yu no bin planim.’ Em i tokim dispela wokboi, ‘Yu wokboi nogut, long tok bilong yu yet bai mi kotim yu. Yu save pinis olsem mi hatpela man, na mi save kisim mani mi no bin dipositim na mi save kisim ol samting mi no bin planim. Orait wai na yu no bin putim silva mani bilong mi long benk? Na taim mi kam bek mi inap kisim dispela mani wantaim interes.’ Na em i tokim ol man i sanap klostu, ‘Kisim maina bilong em na givim long dispela wokboi i gat 10-pela maina.’”—Luk 19:20-24.

Dispela wokboi i no mekim wok long dispela mani na kisim winmani bilong bikman bilong em, olsem na em i lusim olgeta samting. Ol aposel i save olsem bihain Jisas bai kamap king long Kingdom Bilong God. Olsem na ol i kliagut long tok Jisas i mekim long dispela laspela wokboi, olsem sapos ol i no mekim gut dispela wok ol bai i no inap go insait long Kingdom.

Tok bilong Jisas i kirapim ol disaipel long stap gut long em na givim bel long mekim wok. Em i tok: “Mi tokim yupela: Man i gat samting, em bai kisim sampela samting moa. Tasol man i no gat samting, orait samting em i holim, wanpela bai rausim long em.” Na em i tok moa olsem ol man i no laik bai em i “kamap king bilong ol,” ol bai kilim ol i dai. Nau Jisas i stat long wokabaut i go bek long Jerusalem.—Luk 19:26-28.