E tiga eiloa ne ‵tau o fanatu a Iesu ki Ielusalema, kāti koi nofo atu eiloa a ia mo ana soko i te fale o Sakaio. Ne tali‵tonu ana soko me ko pili o fakatu aka “te Malo o te Atua” kae ka fai a Iesu mo fai te Tupu. (Luka 19:11) Ne ‵segi latou i te mataupu tenei e pelā eiloa mo te fui maina o latou me e ‵tau o mate a Iesu. Tela la, ne toe fai atu ne ia se tala fakatusa ke fesoasoani atu ke lavea ne latou me e se tāitāi o oko mai te Malo.

Ne fai atu a ia: “E isi se tagata mai se kaigā aliki ne faimalaga atu ki se fenua ‵mao ke fakamautinoa aka i ei tena pulega fakatupu, ko toe foki mai ei.” (Luka 19:12) Ne tai leva eiloa te faiga o se vaegā malaga penā. E manino ‵lei i ei, me i a Iesu ko te “tagata mai se kaigā aliki” telā e faimalaga atu ki te “fenua ‵mao,” ko te lagi, telā ka tuku atu ei ne tena Tamana te malosi fakatupu ki a ia.

I te tala fakatusa, a koi tuai o fanatu a te “tagata mai se kaigā aliki,” ne kalaga atu a ia ki ana tavini e toko sefulu kae ne avatu ki a latou taki tokotasi se mina siliva, ana muna ki a latou: “Fakagalue a mea konei ke oko ki te taimi e toe foki mai ei au.” (Luka 19:13) A te mina siliva tonu se vaegā tupe telā e ‵togi ‵mafa. E ‵pau eiloa a te mina mo te peofuga o se tino fai fatoaga i te tolu masina.

Kāti ne mafaufau a soko me i a latou ko pologa e sefulu i te tala fakatusa me ko oti ne fakatusa ne Iesu latou ki tino ‵kati saito. (Mataio 9:35-38) E tonu, ne seki fai atu a ia ki a latou ke aumai a saito ne ‵kati. I lō te fai penā, a te ‵katiga o saito ne aofia i ei a nisi soko kolā e mafai o maua ne latou se koga i te Malo o te Atua. E fakaaoga ne soko olotou kope ke ‵sala atu ki nisi tino kolā ka pule mai i te Malo.

Ne a nisi mea ne fakaasi mai ne Iesu i te tala fakatusa? Ne fai atu a ia me i tino o te fenua “ne takalia‵lia ki [te tagata mai se kaigā aliki], uga atu ei ne latou olotou sui i ana tua ke fai atu, ‘A matou e se ma‵nako ke fai te tagata tenei mo fai te motou tupu.’” (Luka 19:14) Ne iloa ne soko me i tino Iutaia, ne seki talia ne latou a Iesu—kae ne fia tamate a nisi tino ki a ia. I te otiga ne fanaka a Iesu ki te lagi, ne fakaasi atu ne te tokoukega o tino Iutaia te lotou kilokiloga ki a ia mai te fakasaua atu ki ana soko. Ne fakaasi faka‵lei atu ne tino ‵teke konei me e se ma‵nako latou ke fai a Iesu mo fai te Tupu.—Ioane 19:15, 16; Galuega 4:13-18; 5:40.

E pelā mo pologa e tokosefulu, ne fakaaoga pefea olotou mina ke oko ki te taimi e maua ei ne te “tagata mai se kaigā aliki” a te “pulega fakatupu” kae toe foki mai? Ne fakamatala mai a Iesu: “I tena fokimaiga mai tua ifo o te fakamautinoaga o tena pulega fakatupu, ne kalaga atu a ia ki tavini kolā ne tuku atu ki ei a tupe, ke iloa aka a mea ne maua mai olotou mea ne fakagalue. Ne fanatu te tino muamua, ana muna, ‘Te Aliki, e sefulu a mina ne maua mai i tau mina.’ Ana muna ki a ia, ‘Malo, koe se tavini ‵lei! Ona ko tou fakamaoni i se mea foliki ‵ki, ka pule ne koe a fakai e sefulu.’ Ne vau te tokolua kae fai atu, ‘Ne maua a mina e lima mai i tau mina, e te Aliki.’ Ne fai atu foki a ia ki te tino tenei, ‘A koe foki ka pule ki fakai e lima.’”—Luka 19:15-19.

Kafai ne maina a soko me e fai latou e pelā mo pologa kolā ne fakaaoga katoatoa olotou kope ke fai a nisi soko, e mafai eiloa o tali‵tonu latou me ka fiafia a Iesu. Kae e mafai foki o tali‵tonu latou me ka taui atu ki te loto finafinau. E tonu, e se maua ne soko katoa o Iesu a fakanofonofoga i te olaga io me ko avanoaga io me ko atamai. Kae ko Iesu, telā ne maua ne ia “te pulega fakatupu,” ka talia kae fakamanuia ne ia olotou taumafaiga mo te alofa tumau i te faiga o soko.—Mataio 28:19, 20.

Kae onoono la ki te tulaga ‵kese tenei, e pelā mo te fakaotiga ne Iesu tena tala fakatusa: “Kae ne fanatu te suā [pologa], ana muna, ‘Te Aliki, tenei tau mina ne ‵funa faka‵lei ne au i se laugatu. E iloa ne koe, au ne mataku i a koe, me i a koe se tagata saua; e puke ne koe a tupe kolā ne seki faulu ne koe, kae e tau ne koe a fuaga kolā ne seki ‵toki ne koe.’ Fai atu ei a ia ki te tavini tenā, ‘Ko fakamasino ne au a koe i au pati eiloa konā, te tavini matagā. Ne iloa ne koe i a au se tagata saua, e puke ne au a tupe kolā e seki  faulu ne au kae tau ne au a fuaga kolā e seki ‵toki ne au, kaia la ne seki faulu ei ne koe taku tupe ki te page, me kafai e vau au, ko tapale ei ne au te tupe fakatasi mo tena pasene?’ Tenā ne fai atu ei a ia ki tino e takatu‵tu i konā, ‘Puke te mina tenā mai i a ia kae tuku atu ki te tino telā e sefulu ana mina.’”—Luka 19:20-24.

A te fakatamala o galue ke momea aka te uke o koloa o te malo o tena matai, ne ‵galo atu eiloa a mea a te pologa tenei. Ne olioli eiloa a apositolo ki te pulega a Iesu i te Malo o te Atua. Tela la, mai i ana pati e uiga ki te ‵toe pologa tenei, kāti ne maina latou me kafai e se loto finafinau latou, kae ka seai foki se koga mō latou i te Malo tenā.

Kāti ne fakamalosi atu a pati a Iesu ki ana soko a‵lofa tumau ke momea aka olotou taumafaiga. Ne fakaoti mai penei ana pati: “Au e fai atu ki a koutou, so se tino telā e isi ne ana mea, ka tuku ki ei a mea e uke atu, kae ko te tino telā e seai ne ana mea, ka tapale keatea mai i a ia a nai mea kolā e i a ia.” Ne fai atu a ia me i ana fili kolā e se ma‵nako “ke fai [a ia] mo olotou tupu,” ka fakaseai atu. Tenā ne toe faka‵soko atu ei ne Iesu tena malaga ki Ielusalema.—Luka 19:26-28.