Noa ˈtu i Ierusalema Iesu e haere ai, tei te fare â paha o Zakaio Iesu e ta ˈna mau pǐpǐ, tei manaˈo e fatata “te Faatereraa arii a te Atua” o Iesu te Arii i te haamauhia. (Luka 19:11) Ua hape râ ratou, tei ore atoa i taa na e ia pohe Iesu e tia ˈi. Horoa ˈtura ïa oia i te hoê faahohoˈaraa ia taa ia ratou e a muri aˈe roa te Faatereraa arii e haamauhia ˈi:

“Ua reva ˈtu te hoê taata no roto mai i te hui arii i te hoê fenua atea ia faatoroahia oia ei arii a hoˈi mai ai.” (Luka 19:12) E tere roa teie. O Iesu te “taata no roto mai i te hui arii” o te reva i te hoê “fenua atea,” oia hoi te raˈi, i reira to ˈna Metua e faatoroa ˈi ia ˈna ei Arii.

Hou te “taata no roto mai i te hui arii” a reva ˈi, titau ihora oia ahuru tavini, horoa ˈtura hoê mina ario na ratou tataitahi e na ô atura: “A faaohipa i te reira ia hoona mai e ia hoˈi noa mai au.” (Luka 19:13) E moni rahi te mina ario. Hoê mina te moni ohipa a te hoê taata faaapu no hau e toru avaˈe.

Ua haroˈaroˈa paha te mau pǐpǐ e e au ratou i na ahuru tavini o te faahohoˈaraa, ua faaau aˈena hoi Iesu ia ratou i te rave ohipa no te ootiraa. (Mataio 9:35-38) Aita oia i faaue ia ratou ia ooti e ia haapue i te huero maa, ia haaputuputu râ i te tahi atu mau pǐpǐ o te parahi i roto i te Faatereraa arii a te Atua. E faaohipa ratou i to ratou taime e puai atoa e ta ratou atoa mau taoˈa no te reira.

Eaha ˈtu â ta Iesu i faaite i roto i teie faahohoˈaraa? Ua parau oia e “mea hae” na te mau taata o to ˈna fenua i te taata no roto mai i te hui arii. “Tono maira ratou i te tahi mau tia e parau ia ˈna: ‘Eita matou e hinaaro ia oe ei arii no matou.’” (Luka 19:14) Ua ite te mau pǐpǐ e aita te mau ati Iuda i farii ia Iesu, ua hinaaro atoa vetahi e haapohe ia ˈna. I muri aˈe i to Iesu poheraa e revaraa i te raˈi to te rahiraa o te mau ati Iuda faaiteraa i to ratou hae ia ˈna ma te hamani ino i ta ˈna mau pǐpǐ. Aita mau â teie feia patoi i hinaaro ia Iesu ei Arii no ratou.—Ioane 19:15, 16; Ohipa 4:13-18; 5:40.

Ua aha na ahuru tavini i ta ratou mina e tae roa i te taime a faatoroahia ˈi te “taata no roto mai i te hui arii” ei arii e a hoˈi mai ai? Faatia ihora Iesu: “Hoˈi maira oia i muri aˈe i to ˈna faatoroaraahia ei arii, e titau ihora i te mau tavini ta ˈna i horoa ˈtu i te moni no te ite ehia ta ratou i apî mai. Tia maira ïa te tavini matamua e na ô maira: ‘Fatu, hoê ahuru mina tei noaa mai i ta oe mina.’ Na ô atura oia: ‘Maitai roa, e tavini maitai oe! No te mea ua haapao maitai oe i te mea haihai roa, e faatere ïa oe hoê ahuru oire.’ Haere maira te piti o te tavini e na ô maira: ‘Fatu, e pae mina tei noaa mai i ta oe mina.’ Na ô atura oia i teie tavini: ‘E faatere ïa oe e pae oire.’”—Luka 19:15-19.

Mai te peu ua haroˈaroˈa te mau pǐpǐ e au ratou i na tavini, a faaohipa ˈtu ai i to ratou taime e puai atoa e ta ratou atoa mau taoˈa no te haaputuputu i te tahi atu mau pǐpǐ, e oaoa ïa Iesu a haamaitai mai ai no to ratou rohi-noa-raa. Parau mau, e ere hoê â huru tupuraa aore ra aravihi to te mau pǐpǐ atoa a Iesu. E farii râ e e haamaitai Iesu, o te faatoroahia ei arii, i ta ratou mau tutavaraa taiva ore i te faariroraa i te taata ei pǐpǐ.—Mataio 28:19, 20.

Na ô faahou atura Iesu: “Haere maira râ te tahi atu tavini e na ô maira: ‘Fatu, tera mai ta oe mina ta ˈu i huna i roto i te hoê ahu. Ua mǎtaˈu hoi au ia oe, e taata etaeta oe. E rave oe i te moni ta oe i ore i tuu i te fare moni, e ooti atoa oe i ta oe i ore i ueue.’ Na ô atura oia: ‘I ta oe iho mau parau e faahapa ˈi au ia oe, tavini ino. Ua ite ïa oe e e taata etaeta vau, o te rave i te  moni ta ˈu i ore i tuu i te fare moni, o te ooti atoa i ta ˈu i ore i ueue. No te aha ïa oe i ore ai i tuu i ta ˈu moni i te fare moni? Ia tae mai au, e rave ïa vau i ta ˈu moni e te moni taime.’ Na ô atura oia i te feia e tia noa ra na pihai iho mai: ‘A rave i ta ˈna mina e a horoa ˈtu na te tavini ahuru mina ta ˈna.’”—Luka 19:20-24.

Aita teie tavini i rohi ia rahi mai te faufaa a te faatereraa arii a to ˈna fatu. Ua ere ïa oia i ta ˈna mina. Te tiai ru ra te mau aposetolo ia faatere mai Iesu i roto i te Faatereraa arii a te Atua. Eita e ore na roto i ta Iesu i parau no teie tavini hopea, ua haroˈaroˈa ratou e ia ore ratou e tamau i te rohi, eita ratou e parahi i roto i taua Faatereraa arii ra.

Ia faaitoito ta Iesu parau i te mau pǐpǐ haapao maitai ia tutava ˈtu â. Teie ta ˈna parau hopea: “Te parau atu nei au: Te taata e faufaa ta ˈna, e horoahia ˈtu â ïa ta ˈna. Te taata râ aita ta ˈna e faufaa, e iriti-ê-atoa-hia ïa ta ˈna.” Na ô atoa ˈtura oia e e taparahi-pohe-hia to ˈna mau enemi, aita i hinaaro ia ˈna “ei arii no ratou.” Reva ˈtura Iesu a pauma ˈi i Ierusalema.—Luka 19:26-28.