Akʼo mi chbat ta Jerusalen li Jesuse, te to oy ta sna Sakeo yaʼeluk xchiʼuk li yajchankʼoptake. Li kʼusi xchʼunoj jchankʼopetike jaʼ ti ch-och xa ta ajvalil ta «Ajvalilal yuʼun [Dios]» li Jesuse (Lukas 19:11). Jech kʼuchaʼal muʼyuk xaʼibeik smelolal ti kʼu yuʼun chcham li Jesuse, jaʼ jech mu xaʼibeik smelolal xtok ti jaʼ to chlik ta abtel li Ajvalilal yuʼun Dios ta tsʼakale. Jaʼ yuʼun lik yal jun lokʼolkʼop sventa xaʼibeik smelolal li yajchankʼoptake.

Xi lik yale: «Oy jun vinik ti ochem ta ajvalilal yutsʼ yalale bat ta nom sventa chichʼ yabtel ta ajvalilal, vaʼun sut tal» (Lukas 19:12). Ta melel, jal onoʼox van yichʼoj ti bu bate. Jamal xvinaj ti jaʼ skʼoplal Jesus li «vinik ti ochem ta ajvalilal yutsʼ [yalal]» ti ‹bat ta nome›, jaʼ xkaltik, bat ta vinajel sventa ch-akʼbat yuʼun Stot li sjuʼel sventa ch-ajvalilaje.

Pe kʼalal mu to chbat li «vinik ti ochem ta ajvalilal yutsʼ yalale», la stak ta ikʼel lajunvoʼ smosotak sventa chakʼbe jujun mina pasbil ta plata xchiʼuk xi laj yale: «Abtelanik ti kʼu sjalil chibate» (Lukas 19:13). Ep sbalil li batsʼi mina takʼine. Yuʼun skʼan x-abtej oxib u sventa spas kanal jun mina li jun jtsʼunolajele.

Laj yaʼibeik smelolal yajchankʼoptak Jesus ti xkoʼolajik kʼuchaʼal li lajunvoʼ mosoiletik ta lokʼolkʼope, yuʼun oy xa onoʼox koʼoltasatik yuʼun Jesus ta j-abteletik ta stsobbel sat kʼusitik tsʼunbil (Mateo 9:35-38). Ta melel, taje maʼuk ch-albatik ti akʼo bat abtejikuk ta stsobbel sat kʼusitik tsʼunbile. Moʼoj, yuʼun ti kʼusi smelolal ti kʼusi albatike jaʼ ti akʼo bat saʼik tal yan yajchankʼoptak Jesus sventa x-ochik li ta Ajvalilal yuʼun Diose. Jaʼ yuʼun tstunes li kʼusitik oy yuʼunik sventa x-epaj tal li buchʼutik chuʼunin li Ajvalilal yuʼun Diose.

¿Kʼusi mas laj yalbe smelolal Jesus li ta lokʼolkʼope? Xi laj yale: «Kontrainbil yuʼun xchiʼiltak ta jteklum [li vinik ti ochem ta ajvalilal yutsʼ yalale], jaʼ yuʼun la stakik batel jtsop jkʼopojel ta stojolal sventa xi x-albate: ‹Mu jkʼankutik xa-och ta ajvalil kuʼunkutik›» (Lukas 19:14). Snaʼoj lek jchankʼopetik ti mu skʼanik Jesus li judaetike, yuʼun oy jlom xtok ti tskʼan tsmilike. Jech xtok, kʼalal chamem xaʼox li Jesuse xchiʼuk ti bat xaʼox ta vinajele lik skontrainbeik yajchankʼoptak sventa chakʼik ta ilel kʼu yelan chilik Jesus jutuk mu skotoluk li judaetike. Jamal chakʼik ta ilel ti mu skʼanik x-och ta ajvalil Jesus li jkontrainvanejetike (Juan 19:15, 16; Echos 4:13-18; 5:40).

Pe ¿kʼu yelan laj yabtelan sminaik li lajunvoʼ mosoiletik ti akʼbatik komel yuʼun li «vinik ti ochem ta ajvalilal yutsʼ [yalal]» ti bat yichʼ «yabtel ta ajvalilale» xchiʼuk ti tsut tale? Xi laj yal li Jesuse: «Kʼalal echʼ xaʼox kʼuk sjalile, sut tal kʼalal laj xaʼox yichʼ yabtel ta ajvalilale, vaʼun la stak ta ikʼel li smosotak ti laj yakʼbe komel takʼine, yuʼun tskʼel kʼu yepal la spasik kanal ta skoj ti laj yabtelanike. Vaʼun te tal li baʼyele, xi laj yale: ‹Kajval, jolin lajuneb mina li aminae›. Vaʼun xi albate: ‹¡Lek ti jech la apase lekil mosoil! Yuʼun tukʼ la aventain ti kʼusi juteb laj kakʼbot aventain komele, jaʼ yuʼun ichʼo avabtel sventa chaventain lajuneb jteklum›. Vaʼun te tal li xchaʼvoʼale, xi laj yale: ‹Kajval, pas ta voʼob mina li aminae›. Xi laj yalbe eke: ‹Baino voʼob jteklum li voʼot eke›» (Lukas 19:15-19).

Mi laj yaʼibeik smelolal yajchankʼoptak Jesus ti jaʼ jechik kʼuchaʼal li mosoiletik taje, ti tstunes lek li kʼusitik oy yuʼunik sventa spasik ta yajchankʼoptak Jesus li yan krixchanoetike, xuʼ me spat yoʼontonik ti lek ch-ilatik yuʼun li Jesuse xchiʼuk ti ch-akʼbat smotonik ta skoj ti laj yakʼbeik yipale. Ta melel, mu parejouk xkuxlejalik li jchankʼopetike xchiʼuk mu parejouk ti kʼu yelan spas yuʼunik jtosuk abtelale. Pe li Jesus ti jaʼ li buchʼu chichʼ «yabtel ta ajvalilale», xil lek li yabtelik ta jujuntale xchiʼuk ta me xakʼbe bendision ti tukʼ yoʼonton laj yakʼbeik  yipal ta spasel ta yajchankʼoptak li krixchanoetike (Mateo 28:19, 20).

Pe oy buchʼu ti jelel albat skʼoplal yuʼun Jesus li ta stsutsebal xa lokʼolkʼope. Xi laj yale: «Pe te tal yan [mosoil] xtok, xi laj yale: ‹Kajval, liʼ oy li aminae, la jpix lek ta pokʼ. Yuʼun kʼelo avil, lixiʼ avuʼun ta skoj ti tsots xanaʼ xapasvan ta mantale; yuʼun chalokʼes li takʼin ti muʼyuk atikʼoj ta vankoe xchiʼuk chatsobbe sat li kʼusi mu voʼotuk la atsʼune›. Xi albate: ‹Ta skoj akʼopojel ta jchapanot, mosoil ti toj chopolote. Yuʼun anaʼoj onoʼox ti tsots jnaʼ xipasvan ta mantale, ti ta jlokʼes li takʼin ti mu voʼonuk la jtikʼ ta vankoe xchiʼuk ti ta jtsobbe sat li kʼusi mu voʼonuk la jtsʼune. Vaʼun chaʼa, ¿kʼu yuʼun muʼyuk xatikʼ ta vanko li jtakʼine? Yuʼun kʼalal mi livule chkichʼ sutel xchiʼuk sjol jechuk li jtakʼine›. Jech oxal xi laj yalbe li buchʼu te vaʼajtike: ‹Pojbeik li minae, jaʼ akʼbeik li buchʼu yichʼoj lajuneb minae›» (Lukas 19:20-24).

Kʼuchaʼal chkakʼtik ventae, chʼabal xa kʼusi kom yuʼun li mosoil ta skoj ti muʼyuk xtojob ta yabtelanel li kʼusitik oy yuʼun yajvale. Albatik xa onoʼox jtakboletik ti chchiʼinik Jesus li ta Ajvalilal yuʼun Diose. Jech oxal, li kʼusi laj yal ta sventa li jun mosoil ti muʼyuk xabtelan li minae, te van laj yakʼik venta ti skʼan baxbolikuke, yuʼun mi moʼoje, muʼyuk me ch-ochik li ta Ajvalilal yuʼun Diose.

Jaʼ yuʼun, li kʼusi albatik yuʼun Jesuse jaʼ tijbat-o yoʼontonik sventa xakʼbeik yipal abtel li yajchankʼoptak ti tukʼ yoʼontonike. Xi la stsutses sloʼil li Jesuse: «Chkalboxuk avaʼiik ti skotol li buchʼu oy yuʼune ta to x-akʼbat mas; yan li buchʼu chʼabal yuʼune ta xpojbat sutel ti kʼu yepal oy yuʼune». Laj to yal xtok un ti chichʼik lajesel li yajkontratak ti mu skʼanik ‹x-och ta ajvalil› li Jesuse. Vaʼun la stam batel sbe sventa chbat ta Jerusalen (Lukas 19:26-28).