Ndaño okuti Yesu wa loña ko Yerusalãi, citava okuti handi o kasi konjo ya Sangeo kumue lolondonge viaye. Ovo va tava okuti “usoma wa Suku” u laika oku tumbikiwa kuenda Yesu o ka linga Osoma. (Luka 19:11) Olondonge ka vi kuata elomboloko liaco, ndeci ka vi kuete elomboloko liokuti Yesu o sesamẽla oku fa. Kuenje eye o ta olusapo lumue oco a va kuatise oku limbuka okuti Usoma u laika oku iya kovaso yoloneke.

Eye o popia hati: “Ombuale yimue ya linga ungende kofeka kupãla oku tambula uviali okuti noke o tiuka.” (Luka 19:12) Ugende ndowu, wambata otembo yalua. Yesu eye “ombuale” ya linga ungende “kofeka kupãla” okuti, kilu, kuna Isiaye a ko wĩha uviali.

Volusapo, osimbu “ombuale” ka ya endele, o kovonga ekũi liakuenje, noke eca omina yimosi yopalata komunu lomunu, loku va sapuila hati: “Lingi lavio olomĩlu toke eci niuka.” (Luka 19:13) Omina yimosi ya tẽlele ovingangu vialua viopalata. Oco ukuakulima a kuate etendelo liovingangu viaco, wa sukilile oku talavaya olosãi vitatu.

Citava okuti olondonge vi sima okuti vi sokisiwa lakuenje ekũi va tukuiwa volusapo, momo Yesu wa vi sokisile ale la vakuakungula. (Mateo 9:35-38) Ocili okuti, eye ka va pingile oco va pange onepa koku ungula olomema. Pole, eye wa tukula oku ungula kuolondonge via laikele oku panga onepa Kusoma wa Suku. Olondonge vi talavaya luloño kuenda ovipako viavo, oco vi sange omanu valua va piñala Usoma.

Nye vali Yesu a longisa volusapo? Eye o popia okuti olonungi viofeka yimuamue yombuale “vio suvukile kuenje via tuma olomunga oku u sapuila okuti, ‘Ka tu yongola okuti ulume u o linga osoma yetu.’” (Luka 19:14) Olondonge via kũlĩha okuti va Yudea va likala Yesu kuenda vakuavo va yongola oku u ponda. Handi vali, noke yolofa via Yesu loku enda kuaye kilu, va Yudea va lambalala olondonge viaye, ci lekisa okuti ka vo tavele. Ocili okuti, ovo ka va yongola okuti Yesu o linga Osoma.—Yoano 19:15, 16; Ovilinga 4:13-18; 5:40.

Akuenje ekũi va talavaya ndati lolomina toke eci “ombuale” yi tambula “uviali” kuenda yi tiuka? Yesu o lombolola hati: “Eci a tiuka koku tambula uviali, wa vilikiya akuenje vana a ĩhile olombongo oco a kũlĩhĩse eci ovo va nganyala kolomĩlu viavo. Watete weya yu wa popia hati, ‘A Ñala, omina yove ya nganyala ekũi liolomina vikuavo.’ Eye wo sapuila hati, ‘Wa linga muẽle, vukuenje uwa! Momo wa lekisa okuti ukuacili kovina vitito, o viala ekũi kalupale.’ Wavali weya hati, ‘A Ñala, omina yove ya nganyala olomina vitãlo vikuavo.’ Eye wo sapuilavo hati, ‘Lovevo, o viala alupale atãlo.’”—Luka 19:15-19.

Nda olondonge via kuatele elomboloko liokuti va sokisiwa lakuenje va talavaya lovoloño kuenda ovipako viavo, va sukilile oku kolela okuti Yesu o ka sanjuka loku va sumũlũisa omo liombili va lekisa. Ocili okuti, ekalo liomuenyo liolondonge lia litepa kuenda ka va kuete apuluvi amuamue kuenda ovoloño amuamue. Pole, Yesu una o ka ‘linga osoma,’ o ka limbuka loku sumũlũisa alikolisilo avo oku linga olondonge.—Mateo 28:19, 20.

Yesu o malusula olusapo lolondaka vioku sokisa poku popia hati: “[Ukuenje] ukuavo weya loku popia hati, ‘A Ñala, omina yove yeyi, nda yi selekele ponanga. Nda ku kuatela usumba, momo umunu umue wa kãla, haive upopa apa kua selekele kuenda ungola eci kua limile.’ Eye wo sapuila hati, ‘Ndu ku pisa leci wa popia,  ove ukuenje ũvi. Wa kũlĩha ndati okuti ndulume umue wa kãla, haeme ndupopa apa sia selekele kuenda ndungola eci sia limile? Momo lie olombongo viange kua vi tualelele kombango? Kuenje poku tiuka nda nda vi tambula losindike yaco.’ “Eye wa sapuila vana va kalapo hati, ‘U tambuli omina yaye, yeci ku o kuete olomina ekũi.’”—Luka 19:20-24.

Omo okuti ukuenje wa linga usiãi woku vokiya kovipako viusoma wa cime caye, o pumba omina yaye. Ovapostolo va lavoka uviali wa Yesu Vusoma wa Suku. Olondaka a popia viatiamẽla kukuenje wa sulako, pamue olondonge vi limbuka okuti, nda ka via lekisile ombili, ka va ka kuata ocitumãlo Vusoma.

Olondaka via Yesu vi vetiya olondonge vakuekolelo oku likolisilako calua. Eye o malusula loku popia hati: “Ndu sapuili siti, wosi o kuete, o tambula vali, pole una o kuete citito, citito caco a kuete cu upiwa.” Eye o popia vali okuti ovanyãli vaye vana ka va yongola okuti “ndinga osoma yavo,” va ka kunduiwa. Kuenje Yesu amamako lungende waye oku loña ko Yerusalãi.—Luka 19:26-28.