Tikadto hi Jesus ha Jerusalem, pero bangin nakadto pa hiya ha balay ni Sakeo upod an iya mga disipulo. Natoo an mga disipulo nga hirani na maestablisar “an Ginhadian han Dios” diin hi Jesus an Hadi. (Lucas 19:11) Pero sayop an ira pagsabot hito, sugad la nga waray nira masabti nga kinahanglan mamatay hi Jesus. Salit basi buligan hira nga masabtan nga maiha pa umabot an Ginhadian, nag-istorya hiya hin ilustrasyon.

Hiya nagsiring: “Usa nga tawo tikang ha hadianon nga pamilya an magbibiyahe ha hirayo nga nasud basi makarawat gud niya an pagkahadi, ngan katapos hito mabalik hiya.” (Lucas 19:12) Maiha-iha an sugad nga pagbiyahe. Matin-aw nga hi Jesus an “tawo tikang ha hadianon nga pamilya” nga magbibiyahe ngadto ha “hirayo nga nasud,” ngadto ha langit, diin ihahatag han iya Amay an awtoridad ha paghadi.

Ha ilustrasyon, antes bumaya an “tawo tikang ha hadianon nga pamilya,” nagtawag hiya hin napulo nga uripon. Iya gintagan hin mina an tagsa ha ira, ngan ginsidngan hira: “Pagnegosyo kamo tubtob ha akon pagbalik.” (Lucas 19:13) Daku an kantidad han literal nga silber nga mina. An usa nga mina katugbang han tulo ka bulan nga suhol han parauma.

Bangin nasantop han mga disipulo nga pariho hira han napulo nga uripon ha ilustrasyon kay iginpariho na hira ni Jesus ha mag-arani. (Mateo 9:35-38) Syempre, waray hiya maghangyo ha ira nga magdara hin gin-ani nga lugas. Lugod, an aranihon nagkukompwesto han iba nga mga disipulo nga makakapanunod han Ginhadian han Dios. Gin-gamit han mga disipulo an ngatanan nira nga panahon, kusog ngan bisan mga panag-iya basi mabuligan an damu pa nga magin manurunod han Ginhadian.

Ano pa an iginpahayag ni Jesus hini nga ilustrasyon? Hiya nagsiring nga an mga igkasi-tuminungnong “nasina ha [tawo tikang ha hadianon nga pamilya] ngan nagsugo hin mga embahador basi magsiring ha iya, ‘Diri kami naruruyag nga maghadi ka ha amon.’” (Lucas 19:14) Maaram an mga disipulo nga an mga Judio diri nakarawat kan Jesus ngan gin-ikaparatay pa ngani hiya han iba. Katapos ni Jesus mamatay ngan sumaka ha langit, iginpakita han mga Judio ha kabug-osan an ira pagtagad ha iya pinaagi ha pagtimaraot ha iya mga disipulo. Iginpatin-aw hini nga mga parakontra nga nadiri hira kan Jesus sugad nga Hadi.—Juan 19:15, 16; Buhat 4:13-18; 5:40.

May kalabotan ha napulo nga uripon, paonan-o nira gagamiton an ira mga mina tubtob nga bumalik an “tawo tikang ha hadianon nga pamilya” katapos makarawat an “pagkahadi”? Hi Jesus nagsiring: “Pagbalik niya katapos makarawat an pagkahadi, iya iginpatawag an mga uripon nga gintagan niya hin silber nga kwarta basi hibaroan kon pira an ira ganansya ha pagnegosyo. An siyahan dinaop ngan nagsiring, ‘Ginoo, an imo mina nakaganansya hin napulo ka mina.’ Salit nagsiring hiya ha uripon, ‘Maopay an imo ginbuhat, matataporan nga uripon! Tungod kay iginpakita mo nga matinumanon ka ha gutiay nga butang, tatagan ko ikaw hin awtoridad ha napulo nga syudad.’ Dinaop an ikaduha nga uripon ngan nagsiring, ‘Ginoo, an imo mina nakaganansya hin lima ka mina.’ Nagsiring liwat hiya hini nga uripon, ‘Magdudumara ka liwat hin lima nga syudad.’”—Lucas 19:15-19.

Kon masantop han mga disipulo nga pariho hira han mga uripon, ngan gamiton nira an ngatanan nga may-ada hira basi manhimo hin damu pa nga disipulo, makakasarig hira nga malilipay hi Jesus ha ira. Ngan makakasiguro hira nga babalosan niya an sugad nga pagkamaduruto. Syempre, diri parapriho an kahimtang han ngatanan nga disipulo ni Jesus sugad man an ira mga oportunidad o abilidad. Pero, aapresyaron ngan bibendisyonan ni Jesus, nga kinarawat han “pagkahadi,” an ira maunungon nga pangalimbasog ha paghimo hin mga disipulo.—Mateo 28:19, 20.

Kondi, tigamni an gin-unabi ni Jesus nga kaibahan samtang iya gintatapos an ilustrasyon: “Pero dinaop an usa pa nga uripon ngan nagsiring, ‘Ginoo, aadi an imo mina nga ginputos ko hin tela. Nahahadlok ako ha imo kay istrikto ka; imo ginkukuha an waray mo ideposito ngan gin-aani an waray mo igsabwag.’ Nagsiring hiya ha uripon, ‘Tungod han imo ginsiring, ginhuhukman ko ikaw, maraot nga uripon. Diri ba maaram ka nga istrikto ako, nga ginkukuha ko an waray ko ideposito ngan gin-aani an waray ko igsabwag? Salit, kay ano nga waray mo ibutang ha bangko an akon silber nga kwarta? Basi pag-abot ko, makuha ko unta ito pati an tubo.’ Tungod hito nagsiring hiya ha mga naninindog didto, ‘Kuhaa ha iya an mina ngan ihatag ito ha may napulo ka mina.’”—Lucas 19:20-24.

Tungod kay waray mangalimbasog an uripon basi madugangan an bahandi han ginhadian han iya agaron, nawad-an hiya. Ginpapamulat han mga apostol an pagmando ni Jesus ha Ginhadian han Dios. Salit tikang ha iya ginsiring mahitungod hinin ultimo nga uripon, posible nga nasantop nira nga kon maghinubya hira, diri hira makakapanunod hito nga Ginhadian.

An ginsiring ni Jesus kinahanglan mag-aghat ha maunungon nga mga disipulo nga mas mangalimbasog pa. Ha pagtapos, hiya nagsiring: “Susumatan ko kamo: An bisan hin-o nga may-ada na, dudugangan pa, pero an waray, kukuhaon bisan an aada ha iya.” Padayon hiya nga nagsiring nga an iya mga kaaway, nga nadiri ‘nga maghadi hiya ha ira,’ papatayon. Katapos hini, nagpadayon hi Jesus pagbiyahe ngadto ha Jerusalem.—Lucas 19:26-28.