Neca napa Jesús gana cheʼ Jerusalén, peru zándaca nuurube né ca discípulo stibe ra lidxi Zaqueo. Zácaxa ca discípulo que mayaca guni mandar Jesús casi Rey lu «Reinu stiʼ Dios» (Lucas 19:11). Cumu caʼruʼ guiénecabe padxí nga chiguni mandar Jesús, ne laaca caʼruʼ guiénecabe naquiiñeʼ gátibe la? ngue runi, gudixhe Jesús ti ejemplu para gacané laacabe guiénecabe cayaadxaruʼ para gueeda Reinu.

Guniʼbe: «Biree ti hombre, xiiñiʼ ti rey, zeʼ ti guidxi zitu para guni nombrárcabe laa rey ne ibiguetaʼ» (Lucas 19:12). Cumu ti guidxi zitu zebe la? zandaabe. Rihuínnica Jesús nga «hombre, xiiñiʼ ti rey» ni zeʼ «ti guidxi zitu», o guibáʼ. Ne racá nga guni Bixhózebe laabe Rey.

Lu ejemplu riʼ biseendacaa «hombre, xiiñiʼ ti rey» que «chii esclavu» ante cheʼ ne cada tobi bidiibe laa ti mina de plata. Óraque gúdxibe laacaʼ: «Laguni negocio né ca mina riʼ dede ora guendaʼ» (Lucas 19:13). Nabé risaca ti mina de plata, purtiʼ biaʼca nga riaxa ti campesinu jma de chonna beeu.

Zándaca bidii ca discípulo que cuenta laacaʼ nga chii esclavu ni riete lu ejemplu que, purtiʼ maca huachaaga Jesús laacabe casi trabajador ni rindisaʼ cosecha (Mateo 9:35-38). Cadi caníʼ diʼ Jesús chindísacabe cosecha stiʼ xiixa semiá. Ni racalaʼdxiʼ Jesús nga guyúbicabe binni ni gaca discípulo ne chuʼ lu Reinu stiʼ Dios. Ne para ganda gúnicabe ni la? naquiiñeʼ cueecabe tiempu, gúnicabe stipa ne iquiiñecabe bueltu stícabe.

¿Xiruʼ bisiene Jesús lu ejemplu riʼ? Bisiénebe nanalaʼdxiʼ binni guidxi xiiñiʼ rey que, ngue runi biseendacaʼ «ti grupu de embajador», para guiniʼcaʼ: «Qué racaláʼdxidu gaca hombre riʼ rey ne guni mandar laadu» (Lucas 19:14). Nanna ca discípulo, qué riuulaʼdxiʼ ca judíu gucaadiágacaʼ Jesús ne nuu caadxi dede racalaʼdxiʼ guuti laabe. Guti si Jesús ne bibiguetaʼ guibáʼ, stale de ca judíu que guzanándacaʼ ca discípulo stibe, zaqué bisihuínnicaʼ nanaláʼdxicaʼ Jesús. Rihuínnica qué racalaʼdxiʼ ca enemigu stiʼ Jesús gaca Rey (Juan 19:15, 16; Hechos 4:13-18; 5:40).

¿Ximodo biquiiñeʼ chii esclavu que ca mina ni biaananecaʼ hasta dxi bibiguetaʼ «hombre, xiiñiʼ ti rey» que yaʼ? Sicaríʼ guníʼ Jesús: «Gudiʼdiʼ si tiempu, ora bibiguétabe despué de maʼ guca nombrarbe rey, biseendacaabe ca esclavu ni bidiibe bueltu stibe para gúʼyabe pagala biʼniʼ ganarcaʼ ra bíʼnicaʼ negocio. Óraque bidxiña primé que ne ná rabi laabe: “Señor, biʼniʼ ganar mina stiluʼ chii mina”. Para rábibe laa: “¡Jneza bíʼniluʼ, esclavu chaʼhuiʼ! Cumu gúcaluʼ fiel lu ti cosa nabé nahuiiniʼ la? zacaaluʼ autoridad luguiáʼ chii guidxi”. De raqué beeda guiropa que ne ná: “Señor, biʼniʼ ganar mina stiluʼ gaayuʼ mina”. Ne laaca gúdxibe esclavu que: “Zacaaluʼ gaayuʼ guidxi”» (Lucas 19:15-19).

Pa gudii ca discípulo que cuenta laacaʼ nga zeeda gácacaʼ ca esclavu que, ne pa iquiiñecaʼ ca cosa risaca sticaʼ para gúnicaʼ discípulo la? zanda chuʼcaʼ seguru ziecheʼ Jesús ne zaguu ndaayaʼ dxiiñaʼ nadipaʼ bíʼnicaʼ. Dxandíʼ, gadxé gadxé modo naca cada discípulo stiʼ Jesús, peru dxi gueeda Jesús casi Rey, zietenalaʼdxiʼ stipa biʼniʼ cada tobi pur guni discípulo, ne zaguube ndaayaʼ laacaʼ pur qué nusaacaʼ dxiiñaʼ stibe (Mateo 28:19, 20).

Peru yanna guidúʼyanu xi bizeeteʼ Jesús ora biluxe guníʼ ejemplu que: «Peru beeda stobi ne ná: “Señor, raríʼ nuu mina stiluʼ, bicaacheʼ ni ndaaniʼ ti bayuʼ. Bidxibeʼ lii, purtiʼ nácaluʼ ti hombre naduxhuʼ, ribeeluʼ bueltu ni qué ñuni depositarluʼ ne rindísaluʼ cosecha ra qué ñúniluʼ dxiiñaʼ”. Para bicabi rey que laabe: “Pur ni  caniʼluʼ cayuneʼ juzgar lii, esclavu malu. ¿Entonce nannuʼ nacaʼ ti hombre naduxhuʼ, ribeeʼ bueltu ni qué ñuneʼ depositar ne rindisaʼ cosecha ra qué ñuneʼ dxiiñaʼ la? Yanna, ¿xiñee qué niguuluʼ bueltu stinneʼ ra bancu yaʼ? Ti ora nibiguetaʼ, nibeeʼ ni né interés stini”». Óraque gúdxibe ca ni zuhuaa raqué: “Lagaxha laabe mina ca ne lagudii ni esclavu ni napa chii mina”» (Lucas 19:20-24).

Biniti esclavu riʼ mina bidiicabe laa purtiʼ qué ñuni stipa pur nutale xpueltu xpixuaanaʼ. Cabeza ca apóstol gaca Jesús Rey lu Reinu stiʼ Dios. Pur nga, ora binadiágacabe ni bizaacaʼ esclavu riʼ, zándaca biénecabe pa qué gúnicabe dxiiñaʼ, qué ziuucabe lu Reinu stiʼ Dios.

Guluu Jesús gana ca discípulo fiel stiʼ cadi gusaanaʼ de gúnicaʼ dxiiñaʼ. De raqué, guníʼ Jesús: «Cayabeʼ laatu guiráʼ ni napa zacaa jma; peru ni qué gapa dede ni napa záxhacabe laa». Despué, bisiene Jesús zanitilú ca enemigu ni qué racalaʼdxiʼ gácabe Rey. Biluxe guníʼ si Jesús ca diidxaʼ riʼ, zeʼ Jerusalén (Lucas 19:26-28).