Kinde ma Yesu uai kud i Yeriko, ecidho i Bethania. I wotho parene eidho got kud i yo marac man ma klikli pi kilometre ma romo 20 kumeni. Yeriko utie piny i poga i metre 250 ka jupime ku nam, Bethania ke uting’ere lir lir iwi got i metre 610 ka jupime ku nam. Lazaru ku nyimego pare ario gikwo i Bethania; pacu maeno ma nyanok nwang’ere i kor got Zeituni yo nyangu, i kilometre adek kumeni ku Yerusalem.

Juyahudi mapol gidaru tundo i Yerusalem pi Kadhukuwijo. Gilar gibino con kara “gicidwokri leng’” saa moko nyo pilembe gimulo avu dhanu, kunoke nyo gitimo lembe mange m’uketho gicido. (Yohana 11:55; Wel 9:6-10) Jumoko m’ikind dhanu m’ular utundo gicokiri i hekalu. Gibekio nia nyo Yesu bitundo i Kadhukuwijo.​—Yohana 11:56.

Dhanu ubeweciri lee dit ku nying’ Yesu. Judong dini moko ubemito gimake kara ginege. Gidaru ng’olo nia ka ng’atu moko uwinjo kaka ma eni ie, edwok igi ‘kara gicopo make.’ (Yohana 11:57) Nwang’u i wang’e de judong dini maeno gilar gimito gineg Yesu saa m’ecero Lazaru. (Yohana 11:49-53) M’umbe jiji, jumoko gibenwang’u nia Yesu copo nyuthere ngo kamaleng’ iwang’ dhanu.

Yesu utundo i Bethania ceng’ kas’abic, nwang’u ‘ceng’ mi Kadhukuwijo fodi udong’ abusiel.’ (Yohana 12:1) Nindo m’ubelubo, (nindo 8 mi Nisan) utie ceng’ Sabatu; nindone ubecaku i mwony pa ceng’. Eno nyutho nia Yesu uai i Yeriko etundo iwang’ Sabatu. Nwang’u de ecopo wotho ngo i ceng’ Sabatu, niwacu niai i mwony pa ceng’ mi kas’abic nitundo i mwony pa ceng’ mi ceng’ soko, pilembe cik mi Juyahudi ukwero wotho ma bor i ceng’ maeno. Ecicopere nia Yesu ucidho i ot pa Lazaru calu m’elar etimo i wang’e.

Bende, Simon ma pacu pare ni Bethania ulwong’o Yesu man jurimbe ni cam ceng’ soko uthieno; ikind dhanune Lazaru de tie. Simon ne julwong’e nia “won joi,” saa moko nyo pilembe iwang’e Yesu ukeyo dhobu kud i kume. Martha ugam utimo pio pio emio cam ni welo calu ma kume bebedo mor. Maria ke ubedo ceng’ini ku Yesu, re kawoni etimo lembe moko m’unyayu yakini.

Maria uyabu wi cupa maber ma ie pong’ ku “mo ma liu ma ng’wice ng’ar, ma pire tek.” (Yohana 12:3) Mo maeno pire tek man bei pare lee (denarii 300), ma tie cul pa jaratic pi oro acel zoo! Maria ukonjo mo maeno iwi Yesu man iwi tiende, man eweyo tiende ku yukwie. Ng’wic mo ne uromo ot ceke.

E kwinyo umaku julub, pieno gipenjo kumae: “Junyotho mo maeni nedi?” (Marko 14:4) Yuda umaku dhu wec kumae: “Nedi jukwero loko mo maeni ku denarii dak adek, jumi de ni jucani?”  (Yohana 12:5) Yuda upenjo ngo penji maeno nia pilembe ebedieng’ pi jucan. I andha ebed ekwalu sente mi julub kud i usau sente migi m’ebed egwoko.

Yesu ulund ucwaku bang’ Maria, ewacu kumae: “Wunyayu can i dhaku maeni nedi? Kum etimo tic ma dre i kuma. Kum wubedo thiri thiri wuku jucan; ento an re wabedo wakudu thiri thiri ngo. Kum mo maeni m’ekonjo i kuma, maeni etimo m’eyika ko mi kuny. Andha awacu iwu kumae, ka ma tek lembanyong’a maeni biyere i ie i ng’om yu, maeno bende ma dhaku maeni timo biyere ni poi ma jupoi ko pire.”​—Matayo 26:10-13.

Yesu udaru timo nindo ma romo acel zoo i Bethania man pire udaru winjere nia eni keca. Juyahudi mapol ubino i pacu pa Simon nineno Yesu kende ngo ento bende Lazaru ‘ma [Yesu] uting’o ku kind ju m’utho.’ (Yohana 12:9) Kawoni julam ma dongo giporo lembe kara gineg Yesu giku Lazaru ceke. Judong dini maeno ginwang’u nia calu ma Lazaru ubekwo kendo, eno re m’uketho dhanu mapol ubeyio Yesu. Judong dini maeni cwinygi col mandhandha!