Jesusajj Jericó markat mistusajj Betania markaruw saräna. 20 kilometronakwa chʼama sarañ thaknam sarasajj patjjaru makatapjjäna. Lazarompi pä kullakapampejj uka markanwa jakasipjjäna. Betania markajj Jerusalén markat kimsa kilometronak sarañankänwa, Olivos Qollutjja inti jalsu toqenkarakïnwa.

Walja judionakaw Pascuatakejj Jerusalenar purinipjjäna. Khitinakatï jiwatanak apnaqapkäna ukanakasa jan ukajj yaqha lurañanakampi qʼañuchasipkäna ukanakasa, ‘Leyirjam qʼomachasiñatakiw’ janïräkipan purinipjjäna (Juan 11:55; Números 9:6-10). Nayra purisajja, yaqhepajj temploruw sarapjjäna. Pascuatakejj Jesusajj jutpachäniti janicha sasaw jisktʼasipjjarakïna (Juan 11:56).

Jesusjjat wal parlarapjjäna. Religión pʼeqtʼirinakat yaqhepajj Jesusarojj jiwayañatakiw katuntañ munapjjäna. Jupanakajj “maynitï Jesusajj kawkinkisa uk yatini ukhajja yatiyapjjetätawa” sasaw jaqenakar sapjjäna. Jupar katuntañatakiw ukham sapjjäna (Juan 11:57). Religión pʼeqtʼirinakajja, Lazaror jiwatat jaktaykäna ukhaw jiwayañ munapjjäna (Juan 11:49-53). Ukatwa Jesusajj uñstanpachäniti janicha sasin yaqhepajj jisktʼasipjjpachäna.

Jesusajj viernes uruw Betaniar purïna, “Pascuatakejj sojjta urunakakiw faltjjäna” (Juan 12:1). Niyaw sábado 8 de nisán uröjjarakïna. Uka tiemponjja, mä urojj jaypʼutwa qalltjjerïna, sábado urojj viernes jaypʼut sábado jaypʼukamänwa. Janïr uka uru qalltkipanwa Jesusajj Betaniar purjjäna. Janiw jupajj sábado urunjja sarkaspänti, judionakan leyiparjamajj janiw uka urun khitis viajiñapäkänti. Jesusajj Lazaron utaparuw sarpachäna, ukarupuniw sarirïna.

Simón chachajj Betanianwa jakasirakïna. Jupajj Jesusampiru arkirinakapampiruw utapar invittʼäna, ukhamat sábado jaypʼun manqtʼasiñataki, Lazaros jupanakampi chikaw sararakïna. Simonajj “lepra usuni” sasin uñtʼatänwa, inas nayrajj lepra usunïchïna, ukampis Jesusaw jupar qollpachäna. Amtañäni Martajj wali trabajtʼirïnwa, ukhamajj invitadonakar serviñwa wal yanaptʼaskpachäna. Mariasti Jesusaruw sum istʼaskäna, kuntï ukjjar lurkäna ukajj janiw yaqhepanakatakejj walïkänti.

Mariajj alabastro yurupwa lluparäna, uka yurojj suma qʼapkir perfumat aceitenïnwa, uka aceitejj “niya chika litrönwa, nardot luratarakïnwa” (Juan 12:3). Wali jila alanirakïnwa, alapajj 300 denariönwa, mä mara trabajitatwa uk pagapjjerïna. Mariajj uka aceitempiw Jesusarojj pʼeqeta kayunakata warjjattʼäna, ukatsti ñikʼutapampiw wañsuyarakïna. Utpacharuw uka aceiten olorapajj phoqtʼäna.

Discipulonakajj colerasipjjänwa, akham sasaw jisktʼasipjjarakïna: “¿Kunatsa uka suma qʼapkiri aceitejj inamay wartasi?” sasa (Marcos 14:4).  Judas Iscariotejj akham sarakïnwa: “¿Kunatsa uka suma qʼapkiri aceitejj kimsa patak denario qollqenakar jan aljaski, ukhamat pobrenakar churañataki?” sasa (Juan 12:5). Cheqansa Judasajj janiw pobrenakat llakisitap laykojj uk siskänti, jan ukasti jupajj lunthatänwa, discipulonakan qollqe imañ cajap katkäna uka cajatwa lunthatasirïna.

Jesusajj akham sasaw Mariar arjjatäna: “¿Kunatsa uka warmitak ukham parlapjjta? Kuntï jupajj naya layku lurki ukajja wali suma luräwiwa. Pobrenakajj jumanakamp chikäskapuniwa, nayajj janiw wiñayatak jumanakampïkäti. Uka suma qʼapkiri aceitempi cuerpojar warjjattʼasajja, imjjapjjetani ukatakiw aka warmejj wakichaskitu. Qhanakwa sapjjsma, kawkjanakantï aka suma yatiyäwinakajj oraqpachan yatiyaskani uka cheqanakanjja, aka warmin luratapajj yatiyasirakiniwa, jupat amtañataki” sasa (Mateo 26:10-13).

Jesusajj mä uru jilaw Betaniankjjäna, ukhamajj jankʼakiw jaqenakajj ukankatapat yatiykipasipjjäna. Walja judionakaw Simonan utapar purinipjjäna, janiw Jesusar uñjirikejja, jan ukasti “khitirutï jiwatanak taypit jaktaykäna uka Lazaromppachar uñjiriw jutapjjäna” (Juan 12:9). Ukatwa jilïr sacerdotenakajj Jesusampiru Lazarompiru jiwayañatak amtapjjäna. Lazaror jaktayatapatwa jaqenakajj Jesusar creyipjje sasaw amuyapjjäna, jan wali jaqenakäpjjapunïnwa.