Yésu a nyodi i Yérikô inyu ke i Bétania. A nlama bet béba hikôa i i gwé yom kiki bo 20 kilôméta. Yérikô a yé isi tuye jam kiki bo 250 méta, Bétania a bak i ngii tuye jam kiki bo 610 méta. Lasarô ni bilôk binyañ bi bôda biba ba niñ i Bétania. Man mbai wada nu a yé bebee le kilôméta 3 ni Yérusalem i pes likôl i Hikôa Ôlivé.

Ngandak bon ba Lôk Yuda i bi lo i Yérusalem inyu Pasa. Ba bi bol ndék ngéda bisu “i pubus bomede, inoñnaga ni mbén Môsi.” Ibale ba bi tihba mim tole ba bi boñ jam lipe li li nyilha bo nyega. (Yôhanes 11:55; Ñanga bôt 9:6-10) I bet ba mbôk bol ba nkodba i témpel. Ba yé badba too Yésu a ga lo i tégbaha Pasa.​—Yôhanes 11:56.

Nano soso pééna i njôp inyu Yésu. Ngim baéga bibase i yéñ gwel Yésu inyu nol nye. Inyu hala nyen ba bi ti oda le ibale mut a nyi i het Yésu a yé, a yelel inyu boñ “le ba gwel nye.” (Yôhanes 11:57) Baéga ba, ba bi bôk ba noode nol Yésu i ngéda a bi tugul Lasarô. (Yôhanes 11:49-53) Jon hala a nla nôga lakii bahogi ba yé nkwoog nkaa le Yésu a nla bé nene i mbamba.

Yésu a mpam i Bétania i Ngwa koo, “dilo disamal ilole ngand Pasa i mbôdôl.” (Yôhanes 12:1) I kel i noñ ha, (i Sabat, hilo 8 hi sôñ Nisan) i mbôdôl manañle ma hiañgaa. Jon a mal liké jé nwaa le Sabat i mbôdôl. A bé bé le a nyodne i Yérikô i kel Sabat, ibôdôl i manañle ma hiañgaa ma Ngwa koo, ipam manañle ma hiañgaa ma Ngwa jôn, inyule mbén Lôk Yuda i bé sôñga i ntén liké u. I nene le Yésu a nke yak Lasarô kiki a bé boñ i ngéda kôba.

Simôn nu nyek a yiine i Bétania a naña Yésu ni banigil bé i dina i kôkôa Ngwa jôn, yak Lasarô a yé mu lôñ i. Ba nsébél Simôn le “mut lô” bebek inyule a bé kon lô, ndi Yésu a bi mbuubaha nye. Mu kiki a yé muda bôlô, Marta a yé leege bakén. Maria nye a yé tibil emble Yésu, ndi hala a nlana pééna.

Maria a nyibil “pes lita i labinda” (Yôhanes 12:3) I môô ma ma nhee diye ngandak (300 dinariô) ma yé nsaa i mut wada inyu ngim nwii! Maria a nkôp môô i ño ni makôô ma Yésu i mbus, a sas ki mo ni tjôñ tjé. Njiñ labinda i nyon ni ndap yosôna.

Banigil ba ñunup, ba mbat le: “Inyuki ba ñôbôs labinda yañga?” (Markô 14:4) Yuda Iskariôt a mpéé, a kal le: “Inyuki ba nuñul bé i labinda ini mbôgôl dinariô aa, ba ti diyeyeba i moni mi?” (Yôhanes 12:5) Yuda a ntôñ toi bé diyeyeba. A bé nip moni mi banigil a bé tééda.

 Yésu a nsôñ Maria, a nkal le: “Inyuki ni nyéñ tééñga muda nu? Ngo a mbôñôl me loñge jam. Inyule ni gwé diyeyeba ngéda yosôna, ndi n’a bana bé me ngéda yosôna. Kiki muda nunu a nkôp nyuu yem labinda, a mboñ hala inyu kôôba me inyu majôna mem. Me nkal bé maliga le: Hiki homa ba ñañal ñañ nlam unu ni nkoñ isi wonsôna, b’a añal yak jam muda nunu a mboñ inyu hoñlene nye mu.”​—Matéô 26:10-13.

Hala a nloo hilo hiada nano le Yésu a yé i Bétania, bôt bobasôna ba nok le a yé ha. Ngandak bon ba Lôk Yuda i nke i ndap Simôn he ndik bé inyu tehe Yésu ndi inyu tehe Lasarô ‘nu Yésu a tugul ikété bawoga.’ (Yôhanes 12:9) Baéga biprisi bi ôô jimb inyu nol Yésu bo Lasarô. Baéga bibase ba nhoñol le ngandak bôt i nhémle Yésu inyule a ntémbna Lasarô i niñ. Kinje mahoñol mabe baéga bibase ba gwé!