Ilyo Yesu afumine ku Yeriko, alolele ku Betani. Pali ubu ubulendo baendele amakilomita 20 ukuninika ulupili. Umusumba wa Yeriko wali mwi samba lya lupili, lelo Betani yabelele lwa pa muulu. Lasaro na bankashi yakwe baleikala muli uyu umushi uunono uwa Betani, uwali ku kabanga ka Lupili lwa Miolife, apaali amakilomita yatatu ukufuma ku Yerusalemu.

Pali iyi nshita, abaYuda abengi ninshi balifika kale ku Yerusalemu, ku Ca Kucilila. Baliile bwangu pa kuti ‘bayeisangulula ukulingana ne ntambi,’ epali balikete icitumbi nelyo balicitile ifintu fimbi ifikowesha. (Yohane 11:55; Impendwa 9:6-10) Bamo pa bafikile bwangu bailelongana pe tempele kabili baleipushanya nga ca kuti Yesu na o ali no kwisa ku Ca Kucilila.—Yohane 11:56.

Abantu balikansene sana pali Yesu. Bashimapepo bamo balefwaya ukumwikata no kumwipaya. Na kuba baebele abantu ukuti onse uwaumfwa ukuli Yesu, alingile ukubeba “pa kuti bamwikate.” (Yohane 11:57) Na lintu Yesu abuushise Lasaro, aba bashimapepo bafwaile ukumwipaya. (Yohane 11:49-53) E calengele ukuti bamo baletwishika nga ca kuti aali no kwisa ukwali abantu abengi.

Yesu afikile mu Betani pali Cisano, “ilyo kwashele inshiku 6 pa kuti kube umutebeto wa Ca Kucilila.” (Yohane 12:1) Ubushiku ubupya, (Isabata, pa Nisani 8) bwaletendeka cilya akasuba kawa. Kanshi afikile ilyo Isabata lishilatendeka. Pa kufuma mu Yeriko taendele pa bushiku bwe Sabata, ubwaletendeka pali Cisano lilya akasuba kawa, ukuyashinta pa Cibelushi lilya akasuba kawa, pantu ifunde limo ilyo abaYuda bapeelwe lyalikeenye ukwenda pe Sabata. Yesu afwile aliileko ku nga’anda ya kwa Lasaro nga fintu alecita lyonse.

Simone uwaleikala mu Betani aitile Yesu na batumwa bakwe pamo na Lasaro ku ca kulya ca cungulo pa Cibelushi. Simone balemwita ati “uwa fibashi,” nalimo pa mulandu wa kuti alikwetepo ifibashi. Na kuba, Yesu afwile e wamundepe. Apo Marita ali uwacincila, atendeke ukutangata abeni. Lelo Maria acitile icintu cimo icalengele batendeke ukukansana.

Maria aiswile ibotolo umwali “hafu ya lita ya mafuta ayanunkila, ayaleitwa nardi.” (Yohane 12:3) Aya amafuta yali aya mutengo sana, (amadenari 300), indalama isho balefolesha umuntu pa mwaka! Maria aitulwilile aya amafuta pa mutwe wa kwa Yesu na ku makasa yakwe e lyo ayafuutila na ku mishishi yakwe. Awe mu ng’anda yonse mwaiswile icena cisuma.

Abasambi ba kwa Yesu balikalipe icine cine kabili batile: “Mulandu nshi balaonawila ifi aya mafuta?” (Marko 14:4) Yuda Iskariote asosele no kuti: “Mulandu nshi bashashitishishe aya mafuta ayanunkila pa madenari 300 no kupeela  abapiina indalama?” (Yohane 12:5) Yuda taleumfwila abapiina uluse. Aleiba indalama isho abasambi baletuula ishaleba mu kabokoshi ako alesunga.

Yesu alandiileko Maria ati: “Nga cinshi mulecushisha uyu umwanakashi? Pantu namombela umulimo uusuma. Pantu abapiina mwaba na bo lyonse, lelo tamwakabe na ine lyonse. Pantu ilyo uyu mwanakashi aciitulwila aya mafuta ayanunkila pa mubili wandi, acicita ici ku kumpekanishisha ukushiikwa. Ndemweba icine cine nati, Konse uko bakalabila iyi mbila nsuma ku ba pano calo bonse, ifyo uyu mwanakashi acitile na fyo bakalafilandapo ku kumwibukisha.”—Mateo 26:10-13.

Ilyo papitile ubushiku bumo ukutula apo afikiile mu Betani, abantu abengi balyumfwile ukuti ali muli uyu mushi. E ico abaYuda abengi baile ku ng’anda ya kwa Simone ku kumona Yesu na Lasaro “uo [Yesu] abuushishe ku bafwa.” (Yohane 12:9) Intungulushi sha bashimapepo shatendeke ukupangana ukuti shipaye Yesu na Lasaro. Ishi intungulushi shalemona kwati icalengele abantu abengi bacetekele Yesu ni co Lasaro ali no mweo na kabili. Aba bantu bali babifi icine cine!