Jesus ọkpọn̄ Jericho adaha Bethany. Isan̄ emi idimemke sia usụn̄ oyom esịm itiat 12, usụn̄ oro onyụn̄ etie obot obot. Ebiet emi Jericho adade etie nte itịghede ndien ebiet Bethany adade edi ke enyọn̄ obot. Lazarus ye nditọeka esie ẹdụn̄ mi ke Bethany, ekpri obio in̄wan̄ emi adade n̄kpọ nte itiat iba oyom usụn̄ ọkpọn̄ Jerusalem onyụn̄ ekperede Obot Olive ke n̄kan̄ edem usiahautịn.

Ediwak mme Jew ẹdedi ẹdisịm Jerusalem man ẹkpedụk Passover. Mmọ ẹbabak ẹdi man ‘ẹdinam idem mmọ asana nte ido esidide’ man ndusụk edi mmọ ẹma ẹtụk okpo owo m̀mê eke unam mîdịghe ẹnam n̄kpọ ekededi emi akpanamde mmọ ẹdehe. (John 11:55; Numbers 9:6-10) Ndusụk mbon emi ẹkebakde ẹdi mi ẹdisop idem ke temple. Mmọ ẹtọn̄ọ ndikere m̀mê Jesus eyedi Passover oro.—John 11:56.

Mme owo ẹkere nsio nsio n̄kpọ ẹban̄a Jesus. Ndusụk mme adaiso ido ukpono ẹyom ndimụm enye n̄kowot. Mmọ ẹkam ẹdọhọ ẹte edieke owo ekededi ọfiọkde ebiet emi Jesus odude, yak edi editịn̄ “man mmimọ ikpomụm enye.” (John 11:57) Mme adaiso ido ukpono emi ẹma ẹyom ndiwot Jesus ke enye ama akanam Lazarus eset. (John 11:49-53) Emi anam ndusụk owo ẹkere ke ekeme ndidi Jesus idiyakke mme owo ẹkụt enye.

Jesus edisịm Bethany ke Friday, emi edide “usen itiokiet mbemiso passover.” (John 12:1) Obufa usen (emi edide Sabbath, Nisan 8) ọmọn̄ ọtọtọn̄ọ ke utịn ama okosụhọde. Emi ọwọrọ ke enye asan̄a edisịm mbemiso usen Sabbath. Enye ikpotoho Jericho isan̄a idi ke usen Sabbath emi ọkọtọn̄ọde ke utịn ama okosụhọde ke Friday esịm ini emi utịn osụhọrede ke Saturday sia ibet mme Jew mînyịmeke ẹnam utọ isan̄ oro ke Sabbath. Ekeme ndidi Jesus aka okodu ke ufọk mme Lazarus nte enye esinamde.

Owo kiet emi ekerede Simon odu n̄ko ke Bethany, enye onyụn̄ okot Jesus ye mme mbet esie ufọk mbubreyo Saturday oro, onyụn̄ okot Lazarus n̄ko. Ẹkot enye Simon “emi ọkọdọn̄ọde akpamfia” sia ekeme ndidi enye ama ọdọn̄ọ akpamfia ekem Jesus anam idem ọsọn̄ enye. Nte ido esie esinyụn̄ edide, Martha esịn idem anam n̄kpọ man akama isenowo emi. Mary anam n̄kpọ ọnọ Jesus, edi se enye anamde ada ikọ edi.

Mary okụbọde otu alabaster emi esịnede “ata nard, emi odobide pound kiet.” (John 12:3) Aran emi ọsọn̄ urua etieti, enye akpa denarius 300 emi edide okụk utom isua kiet! Mary ọtọhọ aran oro ke ibuot ye ke ukot Jesus onyụn̄ ada idet esie ọkwọhọde Jesus ukot. Aran emi ọfuọn̄ ọyọhọ ofụri ufọk oro.

Mme mbet ẹyat esịt ẹnyụn̄ ẹbụp ẹte: “Ntak emi ẹbahade edifuọn̄ aran emi?” (Mark 14:4) Judas Iscariot ọtọhọ onyụn̄ ọdọhọ ete: “Ntak emi owo mîkanyamke edifuọn̄ aran emi ke denarius ikie ita inyụn̄ ida inọ mme ubuene?” (John 12:5) Idịghe  nte ke Judas amama mme ubuene. Enye etịn̄ emi sia enye esiyịpde okụk emi ẹdọn̄de ke ekebe okụk emi enye akamade ọnọ mme mbet.

Jesus ọbọrọ ọnọ Mary ete: “Ntak emi mbufo ẹfịnade n̄wan emi? Enye akanam eti n̄kpọ ke idem mi. Koro mme ubuene ẹdodu ye mbufo kpukpru ini, edi ami ndidụhe ye mbufo kpukpru ini. Koro ke ini n̄wan emi ọduọkde mi edifuọn̄ aran emi ke idem, enye akanam emi eben̄e ini emi ẹdibụkde mi. Ke akpanikọ ke ndọhọ mbufo, Ebiet ekededi emi ẹdikwọrọde eti mbụk emi ke ofụri ererimbot, ẹyetịn̄ n̄ko se n̄wan emi akanamde ndida nti enye.”—Matthew 26:10-13.

Jesus odu ke Bethany ebe usen kiet idahaemi, ndien mme owo ẹtọn̄ọ ndikop ke enye do. Ediwak mme Jew ẹdi ufọk Simon ndikụt Jesus, edi mmọ n̄ko ẹdi ndikụt Lazarus, “emi [Jesus] akanamde eset ke n̄kpa.” (John 12:9) Mbọn̄ oku ndien ẹdụk odu man ẹwot Jesus ẹnyụn̄ ẹwot Lazarus n̄ko. Mmọ ẹdọhọ ke edi ntak emi Lazarus odude uwem anam ediwak owo ẹtọn̄ọ ndibuọt idem ye Jesus. Mme adaiso ido ukpono emi ẹdiọk ẹbe nde!