Iesu be Ieriko ia rakatania, bena Betania dekenai ia lao, unai be 20 kilomita bamona do ia raka. Lasaro bona ena taihuna rua be Betania ena hanua maragina dekenai idia noho. Ierusalema amo ia be 3 kilomita bamona bona Olive Ororo ena ist kahanai ia noho.

Iuda taudia momo be Pasova Aria totona Ierusalema dekenai idia ginidae vadaeni. Idia mai guna, unai amo “taravatu hegeregerena sibodia idia hagoevaia totona,” reana badina idia ese mase tauanina ta idia dogoatao eiava gau ma ta dainai idia miro. (Ioane 11:55; Numera 9:6-10) Idia ginidae guna taudia haida be dubu dekenai idia haboua. Bona idia henanadai heheni, bema Iesu be Pasova totona do ia mai.​—Ioane 11:56.

Ierusalema ai, Iesu dainai momo idia hepapahuahu. Tomadiho gunalaia taudia haida idia ura Iesu idia dogoatao bona hamasea. Idia ese oda idia henia, bema ta be Iesu ia noho gabuna ia diba, idia do ia hadibaia “unai amo Iesu idia dogoatao diba.” (Ioane 11:57) Iesu ese Lasaro ia hatorea isi lou murinai, unai gunalaia taudia idia ura ia idia hamasea. (Ioane 11:49-53) Unai dainai haida idia daradara, bema Iesu be taunimanima vairanai do ia hedinarai.

Friday ai, Iesu be Betania dekenai ia ginidae, “dina 6 idia do noho bena Pasova do idia karaia.” (Ioane 12:1) Dina matamatana (Sabati, Nisan 8) be dina ia diho neganai do ia matamaia. Unai dainai Sabati dinana do lasi neganai, iena laolao ia haorea. Sabati dinana be Friday dina ia diho amo ela bona Saturday dina ia diho, unai dainai ia be Saturday ai Ieriko dekenai ia lao diba lasi, unai be taravatu. Iesu be reana Lasaro ena ruma dekenai ia lao, guna ia karaia bamona.

Simona, danu be Betania dekenai ia noho, ia ese Iesu bona ena bamodia, Lasaro danu, ia boiria Saturday adorahi ai idia aniani hebou totona. Simona idia gwauraia “lepera tauna,” badina guna ia be lepera tauna, to Iesu ese ia hanamoa. Mareta be gaukara momo hahinena dainai, ia ese vadivadi taudia ia hesiai henia.

Maria be dahaka ia karaia? Ia ese bonana namo dehoro kavabuna, lita kahana ta bamona ia kehoa, unai be “nado korikorina bona ia be dava bada gauna.” (Ioane 12:3) Unai dehoro ena davana be (300 denario), unai be lagani ta ena gaukara davana! Maria ese unai dehoro be Iesu ena kwarana bona ena aena dekenai ia bubua bona ena huina amo iena aena ia dahua. Unai dehoro ena bonana ese ruma lalonai ia hahonua.

Hahediba taudia idia badu bona idia henanadai: “Dahaka dainai inai bonana namo dehorona ia bubua kava?” (Mareko 14:4) Iuda Iskariote ia hereva auka, ia gwau: “Dahaka dainai inai bonana namo dehorona be 300 denario amo ita  hoihoilaia lasi, bona moni be ogogami taudia dekenai ita henia?” (Ioane 12:5) To momokani, Iuda be ogogami taudia ia laloa lasi. Ia be nega momo hahediba taudia edia moni mauana amo moni ia henaoa.

Iesu ia gwau: “Dahaka dainai inai hahine be unai bamona umui herevalaia? Ia ese lau dekenai kara namona ia hahedinaraia. Badina ogogami taudia be hanaihanai umui ida do idia noho, to lau be hanaihanai umui ida do lau noho lasi. Unai bonana namo dehorona amo egu tauanina ia dahua neganai, egu mase totona lau ia hegaegaelaia. Umui lau hamaoroa momokani, sivarai namona be tanobada ibounai dekenai idia harorolaia neganai, inai hahine ese ia karaia karana do idia herevalaia danu, ia idia laloatao totona.”​—Mataio 26:10-13.

Iesu be dina haida Betania dekenai ia noho, bona momo idia kamonai ia be unuseni ia noho. Iuda taudia momo be Simona ena ruma dekenai idia mai, Iesu idia itaia totona, bona Lasaro danu, “[Iesu] ese mase amo ia hatorea isi tauna.” (Ioane 12:9) Unai dainai dubu biagudia idia haboua Iesu bona Lasaro idia hamasea totona. Unai dubu gunalaia taudia idia laloa Lasaro ia mauri lou dainai momo be Iesu idia abidadama henia. Unai ese ia hahedinaraia dubu gunalaia taudia be taunimanima dikadia!