Yezu me katuka na Yeriko mpi me kwenda na Betania. Yandi fwete kulumuka kiteso ya bakilometre 20 mpi nzila yango kele mpasi kibeni. Yeriko kele na zulu mpi Betania kele na nsi. Lazare ti bampangi na yandi zole ya bankento ke zingaka na Betania; bwala yai ya fioti kele na kiteso ya bakilometre 3 katuka na Yeruzalemi mpi yo kele na ndambu ya esti ya Ngumba ya Banti ya Olive.

Bayuda mingi me kwisa dezia na Yeruzalemi sambu na nkinsi ya Paki. Bo me kwisa na ntwala “sambu na kudikumisa bunkete mutindu Nsiku vandaka kulomba,” mbala ya nkaka bo simbaka mvumbi to salaka diambu mosi yina kumisaka bo mvindu. (Yoane 11:55; Kutanga 9:6-10) Bankaka na kati ya bantu yai ya me kwisa na ntwala me vukana na tempelo. Bo ke kudiyula kana Yezu ta kwisa na Paki to ve.—Yoane 11:56.

Bantu kele ti bangindu ya kuswaswana sambu na Yezu. Bamfumu ya nkaka ya mabundu ke sosa kukanga yandi sambu bo fwa yandi. Nkutu, bo me pesa nsiku nde kana muntu me zaba kisika Yezu kele, yandi fwete zabisa bo “sambu bo kanga yandi.” (Yoane 11:57) Bamfumu yai sosaka dezia kufwa Yezu ntangu yandi futumunaka Lazare. (Yoane 11:49-53) Yo yina, bantu ya nkaka ke kudiyula kana Yezu ta monana na meso ya bantu to ve.

Yezu me kuma na Betania na Kitanu, “bilumbu sambanu na ntwala ya Paki.” (Yoane 12:1) Kilumbu ya mpa (Kisabatu, Nisani 8) me yantika na nima ya kudinda ya ntangu. Na mutindu yina, Yezu me manisa nzietelo na yandi na ntwala nde Kisabatu kuyantika. Yandi lendaka ve kukatuka na Yeriko na Kisabatu, disongidila na Kitanu na nima ya kudinda ya ntangu tii na Mposo na nima ya kudinda ya ntangu, sambu nsiku ya Bayuda vandaka kubuyisa kusala nzietelo ya mutindu yina. Ziku, Yezu me kwenda na nzo ya Lazare mutindu yandi salaka yo mbala ya me luta.

Simoni ke zingaka mpi na Betania. Yandi me bingisa Yezu ti banduku na yandi, mpi Lazare, sambu na kudia ti yandi na kilumbu ya Mposo na nkokila. Biblia ke bingaka Simoni yai “muntu ya maladi ya lepre” sambu mbala ya nkaka yandi vandaka ti maladi ya lepre mpi Yezu belulaka yandi. Sambu Marta ke zolaka kisalu, yandi ke sala yonso sambu na kuyamba banzenza mbote. Kansi Maria ke tudila Yezu dikebi ya mingi, mpi mbala yai yandi me sala yo na mutindu yina me basisa ntembe.

Maria me kangula mulangi mosi ya albatre yina kele ti kiteso ya “kati-kati ya litre mosi ya mafuta ya nsudi ya kitoko, nardi ya kieleka.” (Yoane 12:3) Mafuta yai kele ntalu mingi mpi yo kele lufutu ya kisalu ya kiteso ya mvula mosi (badenari 300). Maria me yantika kutiamuna yo na ntu mpi na makulu ya Yezu, na nima yandi me dipa makulu ya Yezu ti nsuki na yandi. Nsudi na yo ya kitoko me panzana na nzo ya mvimba.

Balongoki me wa makasi mpi me yula nde: “Sambu na nki bo me bebisa mafuta yai ya nsudi ya kitoko?” (Marko 14:4) Nkutu, Yudasi Iskariote me tuba nde: “Sambu na nki bo tekaka ve mafuta yai ya nsudi ya kitoko na badenari 300 mpi kupesa mbongo yina na  bansukami?” (Yoane 12:5) Yandi ke kudiyangisa kibeni ve sambu na bansukami. Kansi, yandi ke yibaka mbongo na kesi yina yandi ke simbaka, ya bo ke bumbaka mbongo ya balongoki.

Yezu me kotila Maria mpi me tuba nde: “Sambu na nki beno ke sosa kuyangisa nkento yai? Yandi me sadila mono diambu mosi ya mbote. Sambu beno ta vandaka ntangu yonso ti bansukami, kansi beno ta vandaka ve ti mono ntangu yonso. Ntangu nkento yai me tula mafuta yai ya nsudi ya kitoko na nitu na mono, yandi me sala yo sambu na kuyidika nitu na mono na ntwala ya kuzika yo. Ya kieleka mono ke tubila beno nde, na bisika yonso yina bo ta samuna nsangu yai ya mbote na nsi-ntoto ya mvimba, bo ta tubila mpi diambu ya nkento yai me sala sambu na kuyibuka yandi.”—Matayo 26:10-13.

Ntangu yai, Yezu me sala kilumbu kuluta mosi na Betania mpi bantu mingi me zaba nde yandi kele pana. Bayuda mingi me kwisa na nzo ya Simoni sambu na kumona Yezu kaka ve, kansi sambu na kumona mpi Lazare, “yina [Yezu] tedimisaka na bafwa.” (Yoane 12:9) Ntangu yai, bamfumu ya banganga-nzambi me wakana sambu na kufwa Yezu ti Lazare. Bamfumu yai ya mabundu ke mona nde bantu mingi ke kwikila na Yezu sambu Lazare yina fwaka kele diaka na luzingu. Bo kele kibeni ntima ya mbi.