Jesu oima Jeriko, agathiĩ Bethania. Rũgendo rũu nĩ mwambato mũnene wa kilomita ta 20, agereire kũndũ gũtarĩ kũhũthũ gũtuĩkania. Lazaro na aarĩ a nyina erĩ maikaraga taũni-inĩ ĩyo nini ya Bethania, ĩrĩa ĩrĩ kilomita ta ithatũ kuuma Jerusalemu, mwena wa irathĩro wa Kĩrĩma kĩa Mĩtamaiyũ.

Ayahudi aingĩ nĩ makinyĩte Jerusalemu nĩ ũndũ wa Pasaka. Makinyĩte tene nĩgetha ‘metherie’ tondũ hihi mũndũ no akorũo ahutĩtie kĩimba kana ageka ũndũ ũngĩ ũngĩtũma agĩe na thahu. (Johana 11:55; Ndari 9:​6-10) Amwe arĩa makinyĩte tene magathiĩ hekarũ-inĩ. Makorania kana hihi Jesu nĩ egũka gĩkũngũĩro-inĩ kĩa Pasaka.​—Johana 11:56.

Kwĩna ngarari nyingĩ mũno ciĩgiĩ Jesu. Atongoria amwe a ndini marenda kũmũnyita nĩguo mamũũrage. O na nĩ maheanĩte watho atĩ mũndũ o wothe ũngĩmenya harĩa Jesu arĩ, ameere “nĩguo mamũnyite.” (Johana 11:57) Atongoria acio nĩ maageretie kũũraga Jesu thutha wa kũriũkia Lazaro. (Johana 11:​49-53) Nĩkĩo andũ amwe mareyũria kana Jesu nĩ ekumĩra andũ-inĩ.

Jesu agakinya Bethania mũthenya wa Njumaa, “thikũ ithathatũ mbere ya Pasaka.” (Johana 12:1) Mũthenya mwerũ (Thabatũ, Nisani 8) ũkwambĩrĩria riũa rĩathũa. Kwoguo arĩkia rũgendo rwake Thabatũ ĩtanambĩrĩria. Ndangĩroimire Jeriko mũthenya wa Thabatũ, ũguo nĩ kuuga Njumaa riũa rĩgĩthũa nginya Njuuma riũa rĩathũa, tondũ watho wa Ayahudi nĩ ũgirĩtie ũndũ ũcio. No kũhoteke Jesu agathiĩ mũciĩ kwa Lazaro, kũrĩa aacerete rĩrĩa erĩga Bethania.

Simoni, ũrĩa o nake ũikaraga Bethania, akanyita ũgeni Jesu na arĩa marĩ nake o hamwe na Lazaro mũthenya wa Njuuma hwaĩ-inĩ. Simoni etagwo “ũrĩa warĩ na mangũ,” hihi tondũ nĩ ũmwe wa arĩa Jesu anahonia mangũ. Nĩ ũndũ wa ũrĩa Maritha akoragwo arĩ mũnyitani ũgeni, agatungatĩra ageni acio. Nake Mariamu agathiĩ harĩ Jesu, na ageka ũndũ ũkoimĩria ngarari.

Agakunũra cuba ĩrĩ na “ratiri ĩmwe ya maguta manungi wega, ma nado.” (Johana 12:3) Maguta macio nĩ ma goro mũno, na thogora wamo (dinari 300) ũiganaine na mũcara wa kĩndũ mwaka mũgima! Mariamu agaitĩrĩria Jesu maguta macio mũtwe na magũrũ agacoka akamũgiria magũrũ na njuĩrĩ yake. Mũtararĩko wa maguta macio ũkaiyũra nyũmba yothe.

Arutwo makarakara makoria atĩrĩ: “Nĩ kĩĩ gĩatũma maguta maya maitangwo?” (Mariko 14:4) Judasi Mũisikariota akonania ũndũ ũcio wekwo ti mwega akoiga: “Maguta maya manungi wega magire kwendio dinari magana matatũ nĩkĩ iheo athĩni?” (Johana 12:5) No Judasi ti gũcaĩra aracaĩra athĩni. Akoretwo akĩiya mbeca kuuma ithandũkũ-inĩ rĩa mĩhothi rĩrĩa aigaga.

 Jesu agatetera Mariamu akoiga: “Mũrathĩnia mũtumia ũyũ nĩkĩ? Ũndũ ũrĩa anjĩka nĩ mwega. Athĩni mũrĩkoragwo nao hĩndĩ ciothe, no mũtirĩkoragwo na niĩ hĩndĩ ciothe. Hĩndĩ ĩrĩa mũtumia ũyũ aitĩrĩria mwĩrĩ wakwa maguta maya, aũhaarĩria nĩ ũndũ wa hĩndĩ yakwa ya gũthikwo. Ngũmwĩra atĩrĩ na ma, kũrĩa guothe ũhoro ũrĩa mwega ũkaahunjio thĩinĩ wa thĩ, ũndũ ũcio mũtumia ũyũ eka o naguo nĩ ũkaagwetagwo nĩguo aririkanagwo.”​—Mathayo 26:​10-13.

Rĩu Jesu akoretwo Bethania ihinda rĩa mũthenya ũmwe na kĩndũ, na andũ aingĩ makamenya atĩ arĩ kũu. Ayahudi aingĩ magoka gwa Simoni kuona Jesu o hamwe na Lazaro, “ũrĩa [Jesu] aariũkĩtie kuuma kũrĩ arĩa akuũ.” (Johana 12:9) Athĩnjĩri-Ngai arĩa anene makabanga ũrĩa mekũũraga Jesu na Lazaro. Atongoria acio a ndini marona ta andũ aingĩ maretĩkia Jesu nĩ ũndũ wa Lazaro gũkorũo ariũkĩtio. Hatarĩ nganja atongoria acio a ndini nĩ oru mũno!