Yesu byo afumine ku Yeliko, wayile ku Betani. Kufuma mu Yeliko kuya ku Betani palepele makilomita 20, kabiji aya mpunzha yavujile tutumbatumba. Yeliko waikejile pakuluka mamita 250 kabiji Betani waikejile patuntama mamita 610. Lazalasa ne banyenga yanji baikalanga mu muzhi mucheche wa Betani palepele makilomita asatu kufuma ku Yelusalema, kabiji uno muzhi waikejile ku musela wa Mutumba wa Maolivi.

Bayudea bavula saka bafika kala mu Yelusalema ku Kijiilo kya Lupitailo. Bayile bukiji “kuba’mba betokesheshe jimo abo bene mwayila mizhilo” na mambo a kuba’mba kampe bakwachile mibiji ya bafu nangwa baubile bintu bibalengejile kwikala ba muzhilo. (Yoano 11:55; Kubala 9:6-10) Bamo bafikile bukiji bakonkene mu nzubo ya Lesa. Baambilenga’mba kana Yesu usakwiya ku Kijiilo kya Lupitailo nangwa ne.—Yoano 11:56.

Bantu bepachikilenga bingi pe Yesu. Bantangi ba bupopweshi bamo bakebelenga kumukwata ne kumwipaya. Bakambizhe ne kuba’mba yense usakuyuka kuji Yesu, wafwainwa kwibabuula “kuba’mba bakamukwate.” (Yoano 11:57) Bano bantangi bakebelenga kwipaya Yesu kimye kyo asangwile Lazalasa. (Yoano 11:49-53) Onkao mambo, bantu bamo balangulukilenga pe Yesu amba kana ukamwekapo ku bantu nangwa ne.

Yesu wafikile mu Betani pa Kitanu, “byo kwashajile moba atanu na jimo Kijiilo kya Lupitailo saka kikyangye kufika.” (Yoano 12:1) Juba jalondejilepo (ja Sabado pa Nisanyi 8) jatendekele pa kuzhika juba. Onkao mambo, wafikile Juba ja Sabado saka jikyangye kutendeka. Kechi wafwainwe kufuma mu Yeliko pa juba ja Sabado ne, ko kuba’mba pa Kitanu pa kuzhika juba kufika pa Kibelushi pa kuzhika juba, mambo muzhilo wa Bayudea wakainye kwenda pa juba ja Sabado. Kyamweka Yesu wayile ku nzubo ya kwa Lazalasa byonka byo aubile patanshi.

Ngikazhi mukwabo wa mu Betani aye Shimona waichile Yesu ne balunda nanji, kubikapo ne Lazalasa kuba’mba aje nabo kajo pa Kibelushi mabanga. Shimona watelwanga’mba ‘wa mbumba,’ kampe kala wajinga na mbumba bino bamubukile kwi Yesu. Monka mwayijile muteeto wanji wa kwingila na ngovu, Mata wanengezhejilenga benyi kajo. Pakuba Maliya watelekelenga kwi Yesu, bino pa kikye kimye pabukile mapata.

Maliya washinkwile kamulondo ka alabasita nangwa amba kamutumwa kakacheche mwajinga “paunji umo wa manyi anunka bulongo a nada wa kine.” (Yoano 12:3) Ano manyi ajinga a mutengo mukatampe waesakene na mali (mandenali 300) o bafwetanga muntu pa mwaka umo. Maliya waitulwijile ano manyi ku mutwe wa kwa Yesu ne ku maulu anji ne kwiashimuna na nsuki yanji. Mu nzubo mwakutankene bwema bwa ano manyi anunka bulongo.

Baana ba bwanga bazhingijile ne kushikisha’mba: “Mambo ka o mwaonawina ano manyi anunka bulongo?” (Mako 14:4) Yudasa Isakaliota washikishe’mba: “Mambo ka ano manyi anunka bulongo kyo baji kubujila kwiapotesha mandenali 300 ne kwiapana ku bayanji?” (Yoano 12:5)  Bino Yudasa kechi watele muchima bayanji ne. Aye waibanga mali mu fukuta o alamanga a baana ba bwanga.

Yesu wapokolweleko Maliya. Wibambijile’mba: “Mambo ka o mubena kumukatezha uno mwanamukazhi? Aye wangubila kintu kyawama. Mambo bayanji mwikala nabo kimye kyonse, pakuba amiwa kechi nkekalanga nenu moba onse ne. Byo aji kwitulwila ano manyi anunka bulongo pa mubiji wami, waji kuba bino kuba’mba anengezhezhe jimo bya kunzhiika. Kine nemwambila namba, konse ko bakasapwila ano mambo awama pano pa ntanda ponse, ne kino kyauba uno mwanamukazhi bakekyambanga mu kumuvuluka.”—Mateo 26:10-13.

Yesu waikele mu Betani kukila pa juba jimo, kabiji nkuwa ya kuba’mba uji kuno yaumvwanyikile. Bayudea bavula bayukile’mba wajinga konkakwa, kabiji bayile kechi na kumonatu Yesu ne, bino ne na kumona Lazalasa “[Yesu] ye asangwile mu bafu.” (Yoano 12:9) Onkao mambo, bañanga bakatampe baumvwañene kwipaya Yesu ne Lazalasa. Bano bantangi ba bupopweshi balangulukilenga’mba kusangulwa kwa kwa Lazalasa ko kwalengejile’mba bantu bavula baitabile Yesu. Kine bano bantangi ba bupopweshi batamine bingi!