Jesu uzwa kwa Jeriko, kuliba kwa Betania. Musipili wo ki wa kukambama ka likilomita ze 20. Lazaro ni likaizeli zahae bababeli bapila mwa munzinyana wo wa Betania ofumaneha likilomita zetaalu kuzwa kwa Jerusalema, mi ufa njetumuko ye kwa upa wa Lilundu la Likota za Olive.

Majuda babañata ki kale bafita mwa Jerusalema kwa mukiti wa Paseka. Baitahanezi “kuli bayo ikenisa ka kuya ka sizo” kabakala kuli mwendi nebasweli situpu kamba nto yeñwi yebatahiseza kuli babe babasika kena. (Joani 11:55; Numere 9:6-10) Babañwi ku babatile ka kuitahanela bakubukana kwa tempele. Basweli kunahana ka za haiba Jesu ukataha kwa Paseka kamba cwañi.—Joani 11:56.

Kunani mihupulo yeshutana-shutana ka za Jesu. Baeteleli babañwi ba bulapeli bwa Sijuda babata kumuswala kuli bamubulaye. Mane bafile taelo yakuli haiba kunani yakaziba kwainzi Jesu, abazibise “kuli bamuswale.” (Joani 11:57) Baeteleli ba, nebabatile kubulaya Jesu hamulaho wa kuzusa Lazaro. (Joani 11:49-53) Kwautwahala babañwi habakakanya ka za haiba Jesu ukabonahala fa nyangela.

Jesu upunya mwa Betania la Butaanu, “hase kusiyezi mazazi a 6 kuli kuezwe Paseka.” (Joani 12:1) Lizazi lelitatama (Sabata ya la Nisani 8) likalisa lizazi hase lilikezi. Ka mukwa ocwalo, ufelize musipili wahae pili la Sabata lisika fita kale. Naasike azamaya kuzwa mwa Jeriko ka lizazi la Sabata, ili kuzwa la Butaanu lizazi hase lilikezi kuisa la Mukibelo lizazi hase lilikezi, kakuli mulao wa Majuda wahanisa batu kuzamaya la Sabata. Jesu mwendi uya kwa ndu ya Lazaro sina mwanaaezezanga kwamulaho.

Simoni yapila mwa Betania, umema Jesu ni baazamaya ni bona kukopanyeleza cwalo ni Lazaro kwa lico, la Sabata manzibwana. Simoni ubizwa “wa mbingwa,” mwendi kabakala kuli nako yeñwi kwamulaho naanani mbingwa mi naafolisizwe ki Jesu. Mwendi ka kuba musali wa miswalo, Mareta usebeleza baenyi bao. Maria yena uisa mamelelo ku Jesu, kono nako ye ueza cwalo ka nzila yetahisa mihupulo yeshutana-shutana.

Maria ukwahulula botela ya alabasitera kamba ndondo, mo kukena “pondo iliñwi ya mafula a sende, nardi tota.” (Joani 12:3) Mafula a, ki abutokwa hahulu; teko yaona (lidinari ze 300) ilikana ni tuwelo yebato ba ya silimo mutumbi! Maria usela Jesu mafula ao kwa toho ni kwa mahutu kihona apukuta mahutu ahae ka milili yahae. Mi ndu kaufela yatala muunko wa sende.

Balutiwa banyema ni kubuza kuli: “Kiñi seasinyelizwe mafula a sende a?” (Mareka 14:4) Judasi Isikariota ubulela kuli: “Kiñi mafula a sende a, hanaasika lekiswa lidinari ze 300 ni kufiwa  babotana?” (Joani 12:5) Judasi haiyakatwi luli za babotana. Uuzwanga masheleñi mwa sibulukelo sa balutiwa sesibulukiwa ki yena.

Jesu uyemela Maria, uli: “Kiñi zemubata kukataleza musali yo? Uezize kezo yende ku na. Kakuli babotana muinzi ni bona nako kaufela, kono hamuna kuba ni na nako kaufela. Haaniselile mafula a sende fa mubili, uezize cwalo kuli alukise zakubulukiwa kwaka. Kaniti namibulelela nili, kai ni kai koikutazwa taba yende ye mwa lifasi kaufela, saezize musali yo ni sona sikabulelwa kuli ahupulwe ka sona.”—Mateu 26:10-13.

Jesu saainzi mwa Betania ka nako yefitelela lizazi, mi taba ya kuli Jesu uteñi ki kale ihasana. Majuda babañata bataha kwa ndu ya Simoni kuli bato bona Jesu ni Lazaro “yanaazusize [Jesu] kwa bafu.” (Joani 12:9) Baprisita ba bahulu balelisana kuli babulaye Jesu ni Lazaro. Baeteleli ba bulapeli ba, baikutwa kuli Lazaro hanze azwelapili kupila, batu babañata bakalumela ku Jesu. Baeteleli ba bulapeli ba, bamaswe hahulu!