Yesu watambe ku Yediko, waenda ku Betani. Lwendo lwabo i lwa kukanda mikuna mu dishinda dibidibi dya makilometele 20 ne kupita. Yediko udi munshi mu mametele 250 na padi mema, ino Betani udi peulu pa mametele 610 na pa mema. Lazalasa ne bakaka bandi babidi bashikatanga mu kakibundi katyetye ka Betani, kadi ku makilometele 3 na Yelusalema ku matelo a kutunduka kwa Lūlu lwa Impafu.

Bayuda bavule kebafike kala mu Yelusalema ku Pashika. Abaiya kumeso kwa kitatyi mwanda wa “kukesubula mungya bijila,” shi i batenge umbidi mufwe nansha kulonga kintu kikwabo kibasubija. (Yoano 11:55; Umbadilo 9:6-10) Boba bafikile kumeso kwa kitatyi abebungila ku tempelo. Kebeipangula shi Yesu usa kwiya ku Pashika.​—Yoano 11:56.

Kudi lupata lukatampe pa mwanda wa Yesu. Bendeji bamo ba bipwilo abakimbe kumukwata bamwipaye. Kadi i basoñanye bantu amba shi abaivwana amba Yesu udi koku, nankyo bāye kwibalombola amba “bakamukwate.” (Yoano 11:57) Bano bendeji basakile kala kwipaya Yesu paasangwile Lazalasa. (Yoano 11:49-53) O mwanda bantu bavule abeipangula shi Yesu usa kumweka mu kitango kya bantu.

Yesu wafika ku Betani Dya Butano, “mafuku asamba kumeso kwa Pashika.” (Yoano 12:1) Difuku dipya (dya Sabato, Nisane 8) dibashilula papona dyuba. Nanshi wafika kumeso kwa Sabato. Kadipo ubwanya kutamba ku Yediko mu dya Sabato​—tamba ku kupona kwa dyuba kwa Dya Butano kutūla ku kupona kwa dyuba kwa Dya Mposo​—mwanda kwenda mu dino difuku i kupelejibwe na bijila bya Bayuda. Bimweka bu Yesu wapityīle kwa ba Lazalasa, monka mwalongelanga nyeke.

Shimona ushikatanga mu Betani, waite Yesu ne bapwani nandi, kubadila’mo ne Lazalasa ku bidibwa bya Dya Mposo kyolwa. Uno Shimona witwanga ne bu “wa makopo,” padi wadi na makopo ino Yesu wamubelwile’o mafuku kunyuma. Mata byadi nkanka, waingidila betwa. Madia aye wate nakampata mutyima kudi Yesu, ino pano bibaleta lupata.

Madia wafungula mukomba wa alubatele, kamukomba katyetye kadi’mo “māni a mananshi a bei, nala ya binebine.” (Yoano 12:3) Ano māni i malēme mpata, bei yao (ndenadi 300) i mfutwa ya kintu kya mwaka mutuntulu wa kaji! Madia watūta’o Yesu ku mutwe ne ku maulu ebiya wapampula’o na nywene yandi. Luvumba lwao lubaivwanika mu njibo monso.

Bana ba bwanga abalobe, abaipangula’mba: “Mwanda waka ano māni a mananshi abaonwe uno muswelo?” (Mako 14:4) Yudasa Isakadiota wafītwa kanena’mba: “Mwanda waka ano māni a mananshi keapotejibwepo ku ndenadi 300 ne kupānwa ku balanda?” (Yoano 12:5) Yudasa, ke balandapo balangila. Wikalanga wiba lupeto mu kasanduku ka lupeto kalaminanga bana ba bwanga.

 Yesu wabingija Madia amba: “I kika kyomukambakenya uno mwana-mukaji? Waunongela kilongwa kilumbuluke. Mwanda balanda mudi nabo mafuku onso, ino ami kemukekalapo nami mafuku onso. Paatūta māni a mananshi pa umbidi wami, walonga’kyo mwanda wa kunteakanya mwa kunjīkila. I bine nemulombola’mba: Konso kusapulwa ino myanda miyampe mu ino ntanda yonso, kino kyalonga uno mwana-mukaji nakyo kikasekununwa bu pa kumuvulukila.”​—Mateo 26:10-13.

Yesu udi pano mu Betani ke difuku dimo ne musubu, kadi mwanda wa kwiya kwandi ubazambalala konso. Bantu bavule abaiya ku njibo ya Shimona, ke’nkapo mwanda wa kumona Yesu ino i ne Lazalasa, “mwine [Yesu] waasangwile mu bafwe.” (Yoano 12:9) Babitobo bakulu abakwata nkuku ya kwipaya Yesu ne Lazalasa. Bano bendeji ba bipwilo abamone amba Lazalasa byaikala ke mūmi monka, kino kyo kyalengeja bavule betabije mudi Yesu. Bine bano bendeji ba bipwilo i babi mpata!