Akhumaka o Yeriko, Yesu onnaya o Petaniya. Mukwaha onavolowela owelela moko wa mastatiya makhumi meeli, ni woovila. Lasaro ni arokora awe eeli anakhala mmuceche yoola mukhaani wo Petaniya, yoowo orakamenle mastatiya mararu ovinyerya o Yerusalemu ni onakhumawo nsuwa o Mwaako wa Olivera.

Ayuta ancipale aaphiya o Yerusalemu ntakhara Paskha. Awo aapeherya “wi yirapihe” nthowa na ophara muruchu naari opaka echu ekina yeeyo eweerinhe okhala mmwiikhoni. (Yohani 11:55; Namarepela 9:6-10) Akina a yaala apehenrye aathukumana mu empa ya Muluku. Awo aaniikoha waakhanle wi Yesu onamurwa ntakhara Paskha.—Yohani 11:56.

Wookhalavo ohiiwanana vooloca sa Yesu. Ahooleli a malapelo anachuna omphara wi emwiiphe. Mweeparipari, awo aalamulela wi muchu vyakala oni asuwele oriwo Yesu aaleele “wi awo emphare.” (Yohani 11:57) Ahooleli yaala ahintoko weererya omwiipha Yesu amanle omviiha mookhwani Lasaro. (Yohani 11:49-53) Mwawiihiiha, akina annakhwa minikwa waakhanle wi Yesu onahaala wooneya vanlakani.

Yesu onnaphiya o Petaniya Naneethanu, “ehanle mahiku mathanu na nimoha ophiyerya Paska.” (Yohani 12:1) Nihiku nivyaani (Naneethanu napiili, 8 a Nisani) aanapacerya mu oneela wa nsuwa. Mwawiihiiha, owo ohaakhwaniha mukwaha awe nihaakumve nihiku Nawoorowa. Owo haaphwanela opaka mukwaha ovinya o Yeriko nihiku Naneethanu napiili—ovinyerya mu oneela wa nsuwa wa nihiku na Neethanu ophiyerya oneela wa nsuwa wa nihiku Nawoorowa—mukwaha si yoowo onnawatiihiwa ni nlamulo na Ayuta. Akhweya Yesu onnaya vaate va Lasaro, ntoko eerenleiye khalai.

Simoni, yoowo onakhala o Petaniya, onnanwopa Yesu ni asinthamwene awe, ophitaanyerya Lasaro, wi yalye ohiyu wa nihiku Nawoorowa. Simoni oniichaniwa “mutxhu a maretxa,” akhweya aahikhalano mareca yaawo Yesu aampenunxeiye. Ooniheryaka mavyakelo awe, Marta onnaarumeela aleco. Mariya onampwacha Yesu, mu elukuluku yeela mmikhalelo sinatannya minikwa.

Mariya onnahula nipotoro nikhaani orimo sawiicikichela, mwemmo orimo “makhurwa awunkhela ni òwalamelasa.” (Yohani 12:3) Makhurwa ala toowalamelasa, anakhwa ikhorowa (Itenaariyu masana mararu) sinalikanela ni oliviwa wa ikhorowa sa eyaakha emoha! Mariya onnayeeherya makhurwa mmuruni ni mmanaani mwa Yesu nave onnapupucha inaani sawe ni miihi awe. Wunkhela wa makhurwa onnasareya mu empa yoothene.

Amuhuserya annanyeenyeya nave annakoha: “Makhurwa ala awunkhela anayeheriwani?”  (Marko 14:4) Yuta Isikariote onnaloca: “Yahakuliheriwani makhurwa ala awunkhela ni idenáryo masana mararu, wi evahiwe alipa òhawa?” (Yohani 12:5) Mweeparipari tahi wi Yuta onuukhuwa ni alipa oohaawa. Owo onniiya ikhorowa inaheliwa mmurupa wa amuhuserya onakhapeleleiye.

Yesu onnamwaakiha Mariya mu oloca: “Munamùkhulelani muthiyana ola? Eparipari ola onakerela etxhu yaphama. Txhiryene, alipa òhawa eni enamukhala ni nyuwo mahiku othene, nto miyo nkinakhala ni nyuwo mahiku othene. Ayeheryaka mwili aka makhurwa awunkhela, muthiyana ola erenle ovithiwa waka. Kinnolèlani wi weiwo oneraya olaleyiwewo Mutxhaka mwa elapo yothene, yeletho enreiye muthiyana ola enamwalakhanyiwa upuweliwaka yowo.”—Mateu 26:10-13.

Owo onnalekela o Petaniya opwaha nihiku nimoha, nave michaka sa ophiya wa Yesu sinnamwaramwaseya. Ayuta ancipale annarwa vaate va Simoni ohiya pahiru wi emoone Yesu nyenyatho “omona Lázaro [yoowo Yesu] anvinyin’heiye mokhwani.” (Yohani 12:9) Asitokweene a mukucho annavaanela owiipha oopiili, Yesu ni Lasaro. Ahooleli ala a malapelo anuupuwela wi okhala wi Lasaro ooviihiwa mookhwani ti nthowa nene ancipale anamweemereryaaya Yesu. Chiri ahooleli ala a malapelo alipa awiipha!