Ge Jesu a tloga Jeriko, o leba Bethania. Leeto le le tseleng e namelelago ya mo e ka bago dikhilomithara tše 20 tikologong yeo go lego thata go sepela go yona. Jeriko e mo e ka bago dimithara tše 250 ka tlase ga tekanyo ya lewatle, gomme Bethania e mo e ka bago dimithara tše 610 ka godimo ga tekanyo ya lewatle. Latsaro le dikgaetšedi tša gagwe tše pedi ba dula motsaneng o monyenyane wa Bethania, wo o lego bokgoleng bja dikhilomithara tše e ka bago tše tharo go tloga Jerusalema gomme o ka bohlabela thitong ya Thaba ya Mehlware.

Bajuda ba bantši ba šetše ba fihlile Jerusalema bakeng sa Paseka. Ba fihlile ka pela “e le gore ba itlhwekiše go ya ka setlwaedi” ge e ba mohlomongwe ba ile ba swara setopo goba ba dirile selo se sengwe seo se ba dirago gore ba se hlweke. (Johane 11:55; Numeri 9:6-10) Ba bangwe ba bao ba fihlilego ka pela ba bokana tempeleng. Ba ipotšiša ge e ba Jesu a tla tla Pasekeng.—Johane 11:56.

Go na le ngangišano e kgolo mabapi le Jesu. Baetapele ba bangwe ba bodumedi ba nyaka go mo swara e le gore ba mmolaye. Ge e le gabotse, ba laetše gore ge e ba go ka ba le yo a tsebago gore Jesu o kae, o swanetše go ba begela ‘e le gore ba kgone go mo swara.’ (Johane 11:57) Baetapele ba ba kile ba leka go bolaya Jesu ka morago ga ge a tsošitše Latsaro bahung. (Johane 11:49-53) Go a kwagala gore ba bangwe ba ka ba ba belaela gore Jesu o tla ka a itšweletša phatlalatša.

Jesu o fihla Bethania ka Labohlano, “matšatši a tshelelago pele ga paseka.” (Johane 12:1) Letšatši le lefsa (Sabatha, Nisani 8) le thoma ge letšatši le sobela. Ka go re’alo, o feditše leeto la gagwe pele ga Sabatha. O be a ka se ke a tloga Jeriko ka Sabatha—yeo e thomago ge letšatši le sobela ka Labohlano gomme ya fihla ge le sobela ka Mokibelo—ka gobane go dira bjalo go ileditšwe ke molao wa Sejuda. Mohlomongwe Jesu o ya legaeng la Latsaro, bjalo ka ge a ile a dira peleng.

Simone, yo le yena a dulago Bethania, o laletša Jesu le bagwera ba gagwe dijong, go akaretša le Latsaro, mantšiboeng a Mokibelo. Simone o bitšwa “molephera,” ka ge mohlomongwe e be e le molephera yoo Jesu a kilego a mo fodiša. Mareta ka ge e le seroto, o hlokomela baeng. Maria o tloga a theeditše Jesu, gomme nakong ye o theeditše ka tsela yeo e tsošago ngangišano.

Maria o bula legapana leo le swarago “makhura a monko o bose a boima bja mo e ka bago seripagare sa lithara, e lego a nareda ya kgonthe.” (Johane 12:3) Makhura a a bohlokwa kudu, theko ya ona (ya ditenariase tše 300) e ka lekana le mogolo wa ngwaga! Maria o tšhela makhura hlogong ya Jesu le dinaong tša gagwe gomme a mo phumola dinao ka meriri ya gagwe. Monko wa ona o tlala ntlo ka moka.

Barutiwa ba galefile gomme ba a botšiša ba re: “Ke ka baka la’ng makhura a a sentšwe?” (Mareka 14:4) Judase Isikariote o a gana, o re: “Ke ka baka la’ng makhura a a monko o bose a se a rekišwa ka ditenariase tše makgolotharo gomme tša newa badiidi?” (Johane 12:5) Ga se gore Judase o tloga a tshwenyegile ka badiidi. O be a dutše a utswa tšhelete yeo a e swarelago barutiwa.

Jesu o emelela Maria, o re: “Ke ka baka la’ng le leka go tshwenya mosadi yo? O ntiretše tiro e botse. Le na le badiidi ka mehla, eupša le ka se be le nna ka mehla. Ge mosadi yo a be a ntšhela makhura a a monko o bose mmeleng, o be a direla go ntokišetša poloko. Ruri ke re go lena: Kae le kae mo ditaba tše tše dibotse di bolelwago gona lefaseng ka moka, se mosadi yo a se dirilego le sona se tla bolelwa e le go mo gopola.”—Mateo 26:10-13.

Jesu bjale o bile Bethania ka godimo ga letšatši, gomme taba ya gore o gona moo e phatlaletše. Bajuda ba bantši ba tlile ntlong ya Simone e sego feela go tlo bona Jesu eupša le go bona Latsaro, “yo [Jesu] a mo tsošitšego bahung.” (Johane 12:9) Baperisita ba bagolo bjale ba rera go bolaya Jesu gotee le Latsaro. Baetapele ba ba bodumedi ba nagana gore taba ya gore Latsaro o boetše o a phela ke yona e dirago gore batho ba bantši ba dumele go Jesu. Ruri baetapele ba ba bodumedi ke ba babe kudu!