Jesusqa Jericöpita yarqurirmi Betaniaman ëwarqan. Tsëman chäyänampaqqa 20 kilömetrutanömi jirkapa witsäyaq. Läzaruwan ishkan paninkunam Betaniachö täräyaq, tsëqa Olïvus jirkapa juknin lädunchömi këkaq, Jerusalenpita kima kilömetrutanö.

Mëtsika judïukunanam Pascua fiestapaqqa Jerusalenman chärishqana kayarqan. Juk ayata yatashqa kar o imarëkurpis Diospa rikëninchö mana limpiu këkaqkunam, “Ley ninqannö limpiu kayänampaq” tsë fiesta manaraq qallaptin chashqa kayarqan (Juan 11:55; Nümerus 9:6-10). Jerusalenman wakin chaqkunaqa templuchömi Jesuspaq tapunakur këkäyarqan (Juan 11:56).

Pï mëmi Jesuspaq parlëkäyarqan, y pushakoq religiösukunaqa prësutsita y wanutsitam munayarqan. Tsëmi Jesusta pipis rikarqa pëkunata willayänampaq mandakushqa kayarqan (Juan 11:57). Läzaruta kawaritsinqan witsanllanam pëkunaqa wanutsita tïrashqa kayarqan (Juan 11:49-53). Tsëchi wakin nunakunaqa, pitapis mana mäkatsishllapa Jesus ëwanampaq kaqta pensayarqan.

“Pascua fiestapaq joqta junaq pishikaptinmi” viernis junaq Betaniaman Jesusqa chärirqan (Juan 12:1). Manaraq säbadu 8 de nisan kaptinmi charqan, säbaduqa viernis junaq ampïriptinmi qallëkoq. Leyqa mandakoq Säbaduchö pipis mana viajanampaqmi, tsëmi Jesusqa viernis junaq manaraq ampiptin charqan, porqui säbadu junaqqa, viernis junaq Inti jeqarkunqampita hasta säbadu junaq Inti jeqarkunqanyaqmi kaq. Tsëpitaqa, puntakunata ruranqannöllachi Läzarupa wayinta Jesusqa ëwarqan.

Betaniachö täraq Simon jutiyoq nunam Jesustawan yanaqinkunata y Läzaruta säbadu junaqchö wayinman mikoq convidarqan. Simontaqa “lepra qeshyayoq” nirmi reqiyaq, itsachi puntataqa tsë qeshyayoq kashqa karqan peru Jesuschi kachakätsirqan. Martam tsëchöpis sirwipakurnin këkarqan. Peru Marïaqa Jesuspaqmi jukta rurarqan, y tsërëkurmi wakinkunaqa pleytur qallëkuyarqan.

Marïaqa, alabastru rumipita rurashqa botëllachö “ni imawampis mana takushqa nardupita rurashqa, mediu litrunö alläpa chaniyoq pukutaq aceitita[m]” kicharirqan (Juan 12:3). Tsë aceitipa chaninqa juk wata entëru trabäjupa pägunnömi karqan. Marïaqa Jesuspa peqanman y chakinmanmi tsë aceitita ramapurqan y aqtsanwanmi tsakitsipurqan. Aceiti pukutanqanqa wayimanmi juntarirqan.

Tsëta rikëkurnam qateqninkunaqa alläpa piñakur kënö niyarqan: “¿Imanirtaq tsë pukutaq aceitita perditsin?” (Marcus 14:4). Jüdas Iscariötinam, “¿imanirtaq kë pukutaq aceititaqa  kima pachak (300) denariuchö rantikurir waktsakunata qoykurquntsiktsu?” nirqan (Juan 12:5). Peru tsënöqa nirqan, manam waktsakunapaq yarpachakurtsu, sinöqa katsinqan cäjapita qellëta suwakurmi.

Peru Jesusqa Marïata defendirmi kënö nirqan: “¿Imanirtaq kë warmipaq tsënö parlayanki? Pëqa alläpa allitam noqapaq rurashqa. Porqui waktsakunataqa qamkunawanmi imëpis katsiyanki, peru noqataqa manam llapan tiemputsu katsiyämanki. Kë warmi pukutaq aceitita cuerpüman jichamurqa, pampashqa kanäpaqmi alistaramashqa. Rasuntam niyaq, më tsëchöpis nunakuna kayanqanchö alli willakïkunata willakuyanqanchöqa, kë warmi yarpashqa kanampaqmi ruranqanta willakuyanqa” (Mateu 26:10-13).

Betaniachöqa juk junaqllaran Jesusqa këkarqan, peru pï mënam musyarishqa karqan. Mëtsika judïukunam Jesusta y ‘wanushqakunapita sharkatsimunqan Läzaruta’ rikaq ëwayarqan (Juan 12:9). Tsënam precisaq sacerdötikunaqa Jesustawan Läzaruta wanutsiyänampaq yachatsinakuyarqan, porqui Läzaruta kawaritsinqanrëkur nunakuna Jesusman markäkur qallëkuyanqantam pensayarqan. Pasëpa mana kuyakoqmi kayarqan.