Jesusqa Jerico lawmantam Betania llaqtamanña chayarurqa. Chaymanqa yaqa tawa hora puriytam sasallaña ñanninkunata rirqa. Chay Betania llaqtapim Lazaropas iskaynin paninkunapiwan yacharqa, chaypa hichpallanpiñam Olivos muqupas karqa.

Achka judio runakunam pascua fiestapaqqa ña Jerusalenpiña karqaku. Paykunaqa ñawpaqmantaraqmi rirqaku ayaman asuykusqankumanta utaq imamantapas “Moisespa leyninpa nisqanman hina chuyanchakunankupaq” (Juan 11:55; Numeros 9:6-10). Chayaqkunaqa Diospa wasinpi huñunakuspam Jesusmanta ninakuqku: “¿Manachu fiestaman hamunqa?”, nispa (Juan 11:56).

Chaypiqa Jesusllamantañam ima rimaypas karqa, religionkunapi punta apaqkunamanta wakinqa hapiruspam wañurachiyta munarqaku. Chaymi kamachirqaku pipas maypi kasqanta yachaspanqa willakuptin hapirunankupaq (Juan 11:57). Paykunaqa Lazarota kawsarirachisqan qipakunallatam wañurachiyta munarqaku (Juan 11:49-53). Chaymi wakinqa iskayrayarqaku Jesus rikuchikunanmantaqa.

Jesusqa viernestam Betaniamanqa chayarqa, chayqa “suqta punchawllaña pascua fiesta chayamunanpaq kachkaptinmi” karqa (Juan 12:1). Viernespa paqarinnintinqa nisan killapa 8 kaq punchawnin sabadoñam karqa, sabado punchawqa qallariq viernes punchaw inti siqaykuymanta sabado punchaw inti siqaykuykamam. Chaymi Diospa kamachikuyninman hinaqa Jesusqa manaña sabado punchawpiqa maymanpas karumanqa riqñachu. Betaniapiqa yaqachusmi Jesusqa Lazaropa wasinman kaqmanta chayarqa.

Chay Betaniapiqa Simon sutiyuq huk runam sabado punchawpi Jesusta, qatiqninkunata hinaspa Lazarotapas wasinman mikunankupaq pusarqa. Simontaqa “leprawan unquq” kasqanwanmi riqsiqku, chaywanpas Jesuspa hampisqanñachusmi karqa. Chaypim Martaqa mikuyta qarakurqa, Mariañataqmi Jesusta sumaqta chaskiykurqa, hinaptinmi wakinqa piñanakurqaku.

Mariaqa ‘miski asnaq aceitetam yaqa medio litrota hapirqa’, chayqa ‘achka qullqipa chanin legitimo nardo’ nisqam karqa (Juan 12:3). Chay aceiteqa 300 denario nisqa qullqipa chaninmi karqa, chaytaqa watantinta llamkaspam huñuqku. Mariaqa chay aceitetam Jesuspa umanman hinaspa chakinman talliykurqa, hinaptinmi wasi huntata miskillaña asnarirqa.

Chaywanmi Jesuspa qatiqninkunaqa piñakuspa nirqaku: “¿Imanasqataq wak miski asnaq aceitetaqa usurachin?”, nispa (Marcos 14:4). Judas Iscariotepas nirqam: “Wak miski asnaq aceitetaqa kimsa pachak denario nisqa qullqimanchiki  rantikuchwan karqa, wakchakunaman aypunapaq”, nispa (Juan 12:5). Chaynataqa manam wakchakunaraykuchu nirqa, aswanqa makinpi cajachamanta qullqita suwakunanraykum.

Jesusñataqmi Mariamanta allinta rimaspan nirqa: “¿Imanasqataq kay warmita llakichichkankichik? Payqa allin ruwaytam ñuqapaq ruwarun. Wakchakunaqa qamkunawanmi haykapipas kachkan, ñuqam ichaqa mana tukuy tiempochu qamkunawanqa kasaq. Miski asnaq aceiteta kay warmi cuerpoyman talliwaspanqa, wañukuptiy pampakunaypaqmi cuerpoyta alistachkan. Chiqaptapunim nikichik: Maypipas kay sumaq willakuymanta enterollan kay pachapi willakusqa kaptinmi, kay warmipa ruwasqanpas willakusqa kanqa yuyarisqa kananpaq”, nispa (Mateo 26:10-13).

Judio runakunaqa Jesuspa yaqa iskay punchawña Betaniapi kasqantam yacharurqaku. Chaymi Simonpa wasinman achkaq rirqaku Jesustawan Lazarota qawaykuq, Lazaroqa ‘wañusqakunapa kasqanmanta kawsarichisqam’ karqa (Juan 12:9). Chaymi riqsisqa sacerdotekunaqa Jesustawan Lazarota wañurachinankupaq tanteanakurqaku, paykunaqa llumpay mana allin runakunam karqaku.