Jericó llaqtamanta lloqsispan Jesusqa Betania llaqtachaman puririran. Chayman chayananpaqqa 19 kilometrota jinan wichayman purinan karan. Chay llaqtachaqa Olivos orqoq ladonpin kasharan, kinsa kilometropi jinan Jerusalén llaqtamantaqa kasharanpas. Chaypin Lazarowan iskaynin panankunawan tiyaranku.

Pascua fiestapaqqa pisillañan faltasharan, chaymi askha judiokunaña Jerusalenman ñaupasharanku “ch’uyanchakunankupaq” (Juan 11:55; Números 9:6-10). Paykunamanta wakinmi templopi juñukuspa rimasharanku jamunmanchus Jesús fiestaman icha manachus chaymanta (Juan 11:56).

Wakin umalli runakunaqa Jesustan jap’iyta munasharanku wañuchinankupaq. Chaymi kamachikuranku pipas maypichus pay kashasqanta yachaqqa paykunaman willanankupaq, chhaynapi “jap’inankupaq” (Juan 11:57). Paykunaqa ñan Jesustaqa wañuchiyta munarankuña Lazarota kausarichiqtin (Juan 11:49-53). Chaychá wakin runakunaqa piensasharanku Jesús manaña runakunawan rikuchikunanpaq.

“Pascua fiestapaq soqta p’unchayraq kashaqtinmi” Jesusqa viernes p’unchaypi Betania llaqtachaman chayaran, chayman chayaspataq Lazaroq wasinta rinman karan (Juan 12:1). Chay tiempopiqa inti jaykuywanmi ima p’unchaypas qallariq, chaymi payqa manaraq sábado p’unchay qallarishaqtin chayaran. Sabadopiqa manan Jericomanta Betaniaman puriyta atinmanchu karan, chay p’unchaypi maytapas viajay prohibisqa kasqanrayku.

Betania llaqtachapin tiyallarantaq ‘lepra onqoyninmanta qhaliyachisqa Simón’ sutiyoq runapas, Jesusmi paytaqa waj kutipi qhaliyachinman karan. Paymi Jesusta, paywan kashaqkunata, Lazarotawan wasinman mijuqta invitaran sábado p’unchay ch’isinta. Chaypin Lazaroq panan Martaqa paykunata atiendesharan, Marian ichaqa Jesusta atienderan.

Mariataq “mana imawan tupachisqa sumaq q’apaq nardo jawinata orqomuran”, chay jawinaqa kuskan litro jinan karan (Juan 12:3). Chaymantapas chay jawinaqa yaqa juj wata llank’asqamanta pagoq valorninmi karan. Chaytan Mariaqa Jesuspa umanman chakinkunamanwan jich’aykuran, jinaspa chujchanwan chakinta ch’akichiran. Chay aceiteq sumaq q’apaynintaq wasiman junt’aykuran.

Apostolkunataq phiñasqa niranku: “¿Imanaqtinmi chay sumaq q’apaq jawinata usuchin?”, nispa (Marcos 14:4). Jinan Judas Iscariote niran: “¿Manachu aswanpas chay sumaq q’apaq jawinataqa kinsa pachaj denario qolqeman vendespa wajchakunaman qokunman karan?”, nispa (Juan 12:5). Chaytaqa niran manan wajchakunata  khuyapayaspachu, aswanmi suwa kasqanrayku. Paymi jap’iykachisqanku qolqe churana cajamanta suwakullaqpuni.

Jinan Jesusqa niran: “¿Imaraykun kay warmita phiñachiyta munashankichis? Payqa ancha allintan noqapaq ruwapuwashan. Wajchakunaqa tukuy tiempon qankunawan kashan, noqan ichaqa mana tukuy tiempochu qankunawan kasaq. Kay warmi noqaman sumaq q’apaq jawinata jich’aykuwaspaqa wañuqtiy p’ampawanankupaqmi preparawashan. Cheqaqtan niykichis: Maypiña allin willakuykuna kay pachantinpi willakunqa chaypas, yachakullanqataqmi kay warmiq ruwasqanmantapas, chhaynapi yuyarisqa kananpaq”, nispa (Mateo 26:10-13).

Jesusqa juj p’unchay masñan kasharan Betaniapi, chaymi askha runakuna chayta yacharuspa Simonpa wasinta riranku, ichaqa manan Jesusta rikunallankupaqchu, aswanpas “kausarichisqan Lazarotawan rikunankupaqmi” (Juan 12:9). Chayta yachaspan umalli sacerdotekunaqa rimanakuyta qallariranku Lazarotawan wañuchinankupaq. Paykunaqa manchakusharankun Lazarota rikuspa aswan askha runakuna Jesuspi iñipunankuta. ¡Ancha millaypunin chay umallikunaqa karanku!