Ua tuua nei e Iesu Ieriko, ma ua agaʻi atu i Petania. E tusa ma le 12 maila (20 km) le mamao o lenei faigāmalaga, ma e āʻea laufanua maualuluga ma gaoā. O Ieriko e pe tusa ma le 820 futu (250 m) le maualalo mai i le sami, a o Petania e pe ā ma le 2,000 futu (610 m) le maualuga aʻe i le sami. E nonofo Lasalo ma ona tuafāfine i le aai laʻitiiti o Petania, lea pe tusa ma le lua maila (3 km) le mamao mai i Ierusalema ma o loo i le itu i sasaʻe o le mauga o Olive.

Ua leva ona taunuu le toʻatele o tagata Iutaia i Ierusalema mo le Paseka. Ua latou vave ō atu ʻina ia faamamāina i latou,’ auā atonu sa latou papaʻi i ni tino oti pe faia foʻi nisi mea ua lē mamā ai. (Ioane 11:55; Numera 9:6-10) Ua faapotopoto i le malumalu nisi o i latou ua vave ona taunuu atu, ma o loo latou taumatemate pe e alu atu Iesu i le Paseka.—Ioane 11:56.

Ua tele fefinauaʻiga ua tulaʻi mai e faatatau iā Iesu. Ua mananaʻo nisi taʻitaʻi lotu e puʻe ma fasioti o ia. Ua oo ai lava ina latou avatu le faatonuga, afai e iloa e se tasi le mea o iai Iesu, e tatau ona lipoti ane “ina ia latou puʻe ai iā te ia.” (Ioane 11:57) Sa taumafai nei taʻitaʻi lotu e fasiotia Iesu ina ua ia faatūina Lasalo. (Ioane 11:49-53) O le māfuaaga lea atonu ua lē mautinoa ai nisi, po o le a faaali atu Iesu i luma o le lautele.

Ua taunuu Iesu i Petania i le Aso Faraile, e tusa lenā “ua toe ono aso oo i le paseka.” (Ioane 12:1) E amata le aso fou (Sapati, Nisani 8) pe a goto le lā. O lea la, ua taunuu le faigāmalaga a Iesu a o leʻi oo i le Sapati. E mautinoa e lē mafai ona ia malaga mai i Ieriko i Petania i le Sapati, auā sa faatapulaaina le mamao e malaga ai i le Sapati, lea e amata i le goto o le lā i le Aso Faraile seʻia oo i le goto o le lā i le Aso Toonaʻi. Atonu ua alu atu nei Iesu i le fale o Lasalo, e pei ona sa ia faia i le taimi ua teʻa.

E nofo foʻi i Petania le tagata e igoa iā Simona. Ua ia valaaulia Iesu ma ē o loo faatasi ma ia e aofia ai ma Lasalo, e latou te faiʻaiga faatasi i le afiafi lava lenā o le Aso Toonaʻi. Ua taʻua Simona o “le lepela,” auā atonu sa avea muamua o ia o se lepela ae na faamālōlōina e Iesu. Ua tautua Mareta iā i latou o loo iai i le taumafataga, ona o lana masani o se tagata e galue mamafa. Peitaʻi, ua faia e Maria se gaoioiga mo Iesu, ma o le māfuaaga lea ua tupu ai se fefinauaʻiga.

Ua tatala e Maria se fagu alapasa po o se tamaʻi fagu ʻele, lea o loo iai “le pauna o le suāuu manogi, o le nato māoʻi.” (Ioane 12:3) E matuā taugatā lenei suāuu. E tutusa lona tau (300 tenari) ma le totogi o se tagata faigaluega i le tausaga atoa. Ua liligi e Maria le suāuu i le ao o Iesu ma ona aao, ma ua ia soloi aao o Iesu i lona lauulu. Ua sasala le manogi o le suāuu i le fale atoa.

Ua lē fiafia le ʻausoo ma ua fesili atu: “Aiseā ua maʻimau ai lenei suāuu manogi?” (Mareko 14:4) Ua fesili atu foʻi Iuta le Sekara: “Aiseā ua lē faatau atu ai lenei suāuu manogi i le tolu selau tenari, ma avatu i ē e matitiva?” (Ioane 12:5) O le mea moni e lē o popole Iuta i ē matitiva. E masani ona ia gaoia tupe mai le pusa tupe o loo ia teuina mo le ʻausoo.

Peitaʻi, ua lagolagoina e Iesu le gaoioiga a Maria ma fetalai atu: “Aiseā e tou te faalavelave ai i le fafine? Auā o se gaoioiga lelei lea ua ia faia mai iā te aʻu. Auā tou te faatasi pea ma tagata matitiva, ae tou te lē faatasi pea ma aʻu. Auā ina ua uu e lenei fafine loʻu tino i le suāuu manogi, ua ia saunia ai loʻu tino mo loʻu tanuga. E moni ou te fai atu iā te outou, Po o fea lava i le lalolagi e talaʻiina ai lenei tala lelei, e taʻua ai foʻi ma le mea na faia e lenei fafine, e faamanatu ai iā te ia.”—Mataio 26:10-13.

Ua silia ma le tasi le aso talu ona iai Iesu i Petania, ma ua salalau atu tala o loo iai o ia i inā. Ua ō mai le toʻatele o tagata Iutaia i le fale o Simona e vāai iā Iesu, faapea ma Lasalo ʻo lē ua toe faatūina e Iesu mai i le oti.’ (Ioane 12:9) O lea, ua taupulepule ai nei le ʻaufaitaulaga sili e fasioti Iesu ma Lasalo. Ua manatu nei taʻitaʻi lotu ua māfua ona faatuatua le toʻatele o tagata iā Iesu, ona o lea ua toe faatūina Lasalo mai i le oti. Pagā le matuā leaga o nei taʻitaʻi lotu!