Yesu wati watuwa ku Yeriko, wanguluta ku Betaniya. Kutuwa ku Yeriko kuchifika ku Betaniya, wenga mtunda wa makilomita pafufupi 20. Ulendu wenuwu wenga wakusuzga ukongwa chifukwa ayendanga mumitunthu. Lazaro ndi azichi ŵaki ŵaŵi ajanga mumuzi unyaki umana ku Betaniya. Muzi wenuwu wenga pa mtunda wa makilomita pafufupi ngatatu kutuwa ku Yerusalemu, ndipu wenga kuvuma mumphepeti mwa Phiri la Maolivi.

Ayuda anandi angufika mwaliŵi ku Yerusalemu kuti akachiti phwandu la Pasika. Yiwu angufika mwaliŵi “kuti azijitowesi mwakukoliyana ndi mwambu,” kuchitiya kuti panyaki akwaska munthu wakufwa pamwenga achita vinthu vinyaki vo vatingi viŵachitiskengi kuti aje akufipiskika. (Yohane 11:55; Maŵerengedu 9:6-10) Anyaki mwa ŵanthu ŵenaŵa wo angufika mwaliŵi anguwungana panyumba yakusopiyamu. Yiwu akambiskananga asani Yesu wazengi ku phwandu la Pasika.—Yohane 11:56.

Ŵanthu akambanga vinthu vakupambanapambana vakukwaskana ndi Yesu. Alongozgi anyaki achisopa akhumbanga kumuko kuti amubayi. Mwaviyo, yiwu angulamula ŵanthu kuti asani aziŵa ko Yesu wali, aŵakambiyi ‘kuti yiwu akamuko.’ (Yohane 11:57) Alongozgi ŵenaŵa, anguyesapu kali kubaya Yesu pa nyengu yo wanguyuska Lazaro. (Yohane 11:49-53) Chifukwa cha venivi, ŵanthu anyaki akayikiyanga kuti Yesu wazengi ku mwambu wenuwu, ko kwenga ŵanthu anandi.

Yesu wangufika ku Betaniya pa Chinkhondi, “kwati kwaja mazuŵa 6 kuti phwandu la Pasika lichitiki.” (Yohane 12:1) Pakuti zuŵa layambanga asani lumwi lisere, ndikuti Yesu wangufika ku Yerusalemu zuŵa la Sabata pa Nisani 8 lechendakwani. Yesu watingi wanyamukengi cha ku Yeriko pa Sabata, kung’anamuwa kuti watingi wasokengi cha pa Chinkhondi ndi mazulu kuchifika ku Yerusalemu pa Chisulu ndi mazulu, chifukwa dangu la Ayuda lazomerezanga cha kuti munthu wayendengi pa zuŵa la Sabata. Yesu wati wafika ku Betaniya, panyaki wanguluta kunyumba kwaku Lazaro nge po wachitiyanga nyengu zosi.

Simoni yo wajanga so ku Betaniya, wangudana Yesu ndi akusambira ŵaki, kusazgapu Lazaro kuti akaryi chakurya chamazulu kunyumba kwaki pa Chisulu. Iyu wadanikanga kuti Simoni “wamakhati,” panyaki chifukwa chakuti pakwamba wenga ndi makhati, ndipu nyengu yinyaki Yesu wangumuchizga. Chifukwa chakuti Marita wayanjanga kugwira ntchitu zapanyumba, iyu wangwamba kuŵaphwere. Kweni Mariya wavwisiyanga vo Yesu wasambizanga ndipu pa nyengu iyi, wanguchita vinthu vinyaki vo vingwambisa mphindanu.

Mariya wangujula botolu lakupangika ndi mwa wa alabasita lo mwenga “mafuta ngakununkhira ukongwa . . . nga nado chayiyu, ngakukwana pawundi yimoza.” (Yohane 12:3) Mafuta yanga ngenga ngakudula ukongwa, mwakuti angagulisanga pa mtengu wa madinari 300. Ndalama zenizi zenga zakukwana malipiru nga chaka chosi. Mariya wangupunguliya mafuta ngenanga pamutu kweniso pamaphazi ngaku Yesu ndipu wangapuputanga ndi sisi laki. Munyumba yosi munguchita kuti guuu ndi kafungu kakununkhira.

Akusambira aku Yesu angukwiya ukongwa ndipu angufumba kuti: “Wasakaziyanji viyo mafuta ngakununkhira?”  (Mariko 14:4) Yudasi wa ku Keriyoti wangukoliyana navu cha vo Mariya wanguchita ndipu wangukamba kuti: “Asi mafuta ngakununkhira yanga ngatingi ngagulisikengi madinari 300 ndi kupereka ndalama zo kwa akavu?” (Yohane 12:5) Yapa, Yudasi wafipiyanga mtima ŵanthu akavu cha. Kweni iyu wasunganga bokosi la ndalama zo akusambira agwiriskiyanga ntchitu ndipu wabangapu ndalama zenizi.

Yesu wangumuŵikiya kuvuli Mariya, ndipu wangukamba kuti: “Mutimusuzgiyanji munthukazi uyu? Iyu wandichitiya chinthu chamampha ukongwa. Chifukwa akavu mujengi nawu nyengu zosi, kweni ini mulutirizgengi cha kuja nani. Po wapunguliya mafuta ngakununkhira yanga paliŵavu langu, walinozge limu kuti likaŵikiki mumuwunda. Nditikuneneskiyani, kwekosi ko uthenga wamampha uwu upharazgikengi pacharu chosi, ŵanthu azamukambanga so vo munthukazi uyu wachita achimukumbuka.”—Mateyu 26:10-13.

Ŵanthu anandi anguziŵa kuti Yesu we ku Betaniya chifukwa wangujaku pafufupi mazuŵa ngaŵi. Ayuda anandi anguza kunyumba yaku Simoni. Yiwu akhumbanga kuchiwona Yesu pe cha, kweni akhumbanga so kuwona Lazaro, “yo [Yesu] wangumuyuska.” (Yohane 12:9) Ŵara ŵa asembi angupangana kuti abayi Yesu ndi Lazaro. Alongozgi achisopa ŵenaŵa awonanga kuti ŵanthu anandi agomezganga Yesu chifukwa chakuti Lazaro wanguyuskika. Kukamba uneneska, alongozgi yaŵa, ŵenga ndi mtima uheni ukongwa!