Jesús taxtu kJericó chu an kBetania. Xlakata nachankan anta, talakaskin natlawankan kkasipijni max 20 kilómetros chu lu tuwa lichankan. Lázaro chu chatiy xnatalan wilakgo kBetania, nema wi kxʼoriente sipi xla Olivos, chu Jerusalén wi max 3 kilómetros.

Lhuwa judíos wilakgolha kJerusalén xlakata natlawakgo Pascua. Alisokg minkgonit xlakata tlan «xtaskulunkikgolh» komo xlixkajwankgonit xlakata kxamakgonit nin o atanu (Juan 11:55; Números 9:6-10). Makgapitsi tiku anta wilakgo tamakgstokgmakgo ktemplo chu kakgalhskinkan komo Jesús namin kPascua (Juan 11:56).

Putum latamanin lichuwinamakgo Jesús chu makgapitsi xpulalinanin takanajla chipaputunkgo chu makgniputunkgo. Asta limapakgsinankgonit pi kaxatikawa tiku nakatsi niku wi nawan xlakata tlan nachipakan (Juan 11:57). Xlakan xmakgniputunkgo Jesús akxni malakastakwanilh Lázaro (Juan 11:49-53). Wa xlakata, makgapitsi lakpuwankgo pi Jesús ni katikatasiyanilh.

Viernes, akxni «akgchaxan kilhtamaku xtsankga xlakata xtlawaka Pascua», Jesús chin kBetania (Juan 12:1). Uma wamputun pi chin kBetania akxni nina chan sábado 8 xla nisán, nema tsuku akxni nina tsankga Chichini viernes. Ni sábado chilh xlakata limapakgsin xwan pi nila tuku xtlawakan sábado. Jesús max an kxchik Lázaro chuna la tlawanit makgasata.

Simón tiku na xalak Betania kawani Jesús chu xtamakgalhtawakgen chu Lázaro pi kaʼankgolh wayankgo sábado kxchik. Simón lilakgapaskan la «tiku xkgalhi lepra» xlakata max xkgalhi uma tajatat chu Jesús mapaksalh. Marta tiku lu skulujwa, kamujuni xliwatkan tiku anta wilakgo. Pero xlakata María tlakg kuentajtlawani Jesús, tlawa pi naʼanan taʼakglhuwit.

María makgalhkge aktsu caja niku tajuma «max itat litro xamuksun aceite xla nardo, nitu xtalakwilhakanit chu lu tapalaxla xwanit» (Juan 12:3). Xtapalh uma aceite (300 denarios) xtachuna tuku tlajakan akgtum kata. María liʼaktlawa chu litantutlawa Jesús aceite, chu alistalh limaskakani xchixit. Uma lu tlan muksun pi asta takgankgawanan kputuminika chiki.

Akxni xtamakgalhtawakgen akxilhkgo, sitsikgo chu kgalhskininankgo: «¿Tuku xlakata paxkat tlawamaka uma xamuksun aceite?» (Marcos 14:4). Judas Iscariote taʼakglhuwi chu wan: «¿Tuku xlakata ni listaka akgtutu ciento denarios uma xamuksun aceite chu xtikamaxkika xatumin limaxkgenin?» (Juan 12:5). Pero nichuna wan xlakata kalilakgaputsama lakglimaxkgenin, wata xlakata kgalhama tumin nema mamakinikanit.

Pero Jesús kgalhmakgtaya María chu kawani: «¿Tuku xlakata maʼakglhuwiputunatit uma puskat?  Xla tlawalh tuku lu xatlan kimpalakata. Xlakata limaxkgenin putum kilhtamaku akxtum katalamakgon, pero akit ni putum kilhtamaku ktikatalataman. Akxni uma puskat litlawalh kimakni xamuksun aceite, chuna tlawalh xlakata lakkaxtlawamaja kimakni xlakata akxni nakimaknukan. Xlikana kkawaniyan, kaniwa niku natalichuwinan xatlan tamakatsinin kxlilakgatum katiyatni, na natalichuwinan tuku tlawalh uma puskat xlakata nalakapastakkan» (Mateo 26:10-13).

Max liwakaya akgtum kilhtamaku lata Jesús wi kBetania chu lichuwinamaka pi anta wi. Lhuwa judíos ankgo kxchik Simón xlakata naʼakxilhkgo Jesús pero na akxilhputunkgo Lázaro, tiku Jesús «xmalakastakwaninit kkalinin» (Juan 12:9). Chu xanapuxkun sacerdotes wi tuku lakkaxwilikgo xlakata namakgnikgo Jesús chu Lázaro, xlakata lakpuwankgo pi lhuwa latamanin kanajlanikgo Jesús xlakata malakastakwanilh Lázaro. Kaks malakawaninan pi lu nitlan likatsikgo.