I te taimi ne tiakina ei ne Iesu a Ieliko, ne fanatu eiloa a ia ki Petania. Ne aofia i te malaga a te ‵kake aka i koga ma‵luga kae faiga‵ta i se 12 maila. A Ieliko e tu i se koga e 820 futu mai lalo ifo o te maluga o te tai, kae ko Petania e tu atu i se koga e 2,000 futu te maluga mai luga o te tai. Ne ‵nofo atu a Lasalo mo ana tuagane e tokolua i te tamā fa‵kai o Petania, telā e lua maila te ‵mao mai Ielusalema, kae e tu atu foki i te feitu ki te saegala o te Mauga o Olive.

Ko oti ne oko atu a tino Iutaia e tokouke ki Ielusalema mō te Paseka. Ne olo vave atu latou ki konā “ke faka‵ma latou e ‵tusa mo te tulafono,” e se iloa fua māfai ne pa‵tele latou ki se foitino mate io me ne fai ne latou se mea telā e fai ei latou ke se ‵mā. (Ioane 11:55; Numela 9:6-10) Ne maopoopo ki te faletapu a nisi o latou kolā ne ‵mua atu. Ne kamata o fai‵pati latou me ka fanatu a Iesu ki te Paseka io me ikai.—Ioane 11:56.

E uke a kinauga ne fai e uiga ki a Iesu. Ne ma‵nako a nisi takitaki lotu o puke a ia kae fakasala ki te mate. A te ‵tonuga loa, ko oti ne fakatonu atu latou me kafai e isi se tino e iloa ne ia te koga e nofo ei a Iesu, e ‵tau o fakailoa atu ki a latou “ko te mea ke puke ne latou a ia.” (Ioane 11:57) Ko oti eiloa ne taumafai a takitaki konā ke tamate a Iesu mai tua o te taimi ne fakatu aka ei ne ia a Lasalo. (Ioane 11:49-53) E maina tatou me ne mafau‵fau a nisi tino me ka fakasaesae atu a Iesu ki tino io me ikai.

Ne oko atu a Iesu ki Petania i te Aso Lima, ko te “ono aso mai mua atu o te Paseka.” (Ioane 12:1) Ne kamata te aso fou (Sapati, Nisani 8) i te ‵tōga o te mata o te la. Tela la, ne ‵tau o oti atu te faiga o ana malaga mai mua o te Sapati. Ne seki mafai o faimalaga atu a ia mai Ieliko i te Sapati—mai te tōga o te mata o te la i te Aso Lima ki te tōga o te mata o te la i te Aso Ono—me e fakatapu i te tulafono a te kau Iutaia. Kāti ne fanatu eiloa a Iesu ki te fale o Lasalo, e pelā mo ana faiga i aso mua.

A Simona, telā e nofo foki i Petania ne ‵kami ne ia a Iesu mo ana taugasoa, e aofia i ei a Lasalo, ke olo atu o ‵kai i te afiafi po o te Aso Ono. A Simona telā ne taku ki “te lepela,” kāti me i a ia ne lepela muamua, kae ne faka‵lei ne Iesu tou tagata i se taimi mai mua atu i ei. Ona ko ana uiga galue malosi, ne situati a Maleta ki tino ‵kami. Kae e pelā mo te masani, ne fia fakalogologo sāle a Malia ki a Iesu, kae i te taimi tenā ne sae aka ei se kinauga.

Ne ‵tala ne Malia se fagu sinu manogi, io me se tamā fagu, telā ne maua atu i ei “se pauna o te sinu manogi ne faite mai te nato.” (Ioane 12:3) E tāua ‵ki te sinu tenei kae e ‵pau eiloa tena ‵togi (300 tenali) mo te ‵togi o te tino galue i te tausaga e tasi! Ne ‵ligi atu ne Malia te sinu ki te ulu o Iesu mo ana vae kae ne ‵solo ne ia a vae o Iesu ki ana lauulu. Ne pusaki atu te manogi gali i te fale kātoa.

Ne kaitaua te kau soko kae ne fesili atu: “Kaia ne fakamāumāu ei te sinu manogi tenei?” (Maleko 14:4) Ne ‵teke atu a Iuta te Isikaliota, kae fai atu: “Kaia e se fakatau atu ei a te sinu manogi tenei ki se 300 tenali kae tufa atu ki tino ma‵tiva?” (Ioane 12:5) Ne seki manavase tonu atu a Iuta ki tino ma‵tiva.  Ko oti eiloa ne kaisoa sāle ne ia a tupe mai te pokisi tupe telā ne tausi ne ia mō te kau soko.

Ne ‵pulu ne Iesu a Malia, telā ne fai atu: “Kaia e fakalavelave ei ne koutou te fafine tenei? Ko fai ne ia se mea ‵lei ki a au. E ‵nofo faeloa koutou mo tino ma‵tiva, ka ko au e se ‵nofo faeloa mo koutou. I te ‵miliga ne te fafine a te sinu tenei ki toku foitino, ko fakatoka ne ia au mō toku tanuga. Au e fai tonu atu ki a koutou, i so se koga o te lalolagi e talai atu ei te tala ‵lei tenei, ka fakamatala atu foki i ei a te mea ne fai ne te fafine tenei e pelā me se fakamasauaga ki a ia.”—Mataio 26:10-13.

Ko nofo atu nei a Iesu i Petania i se taimi telā e sili atu i te aso e tasi, kae ko oti ne ‵pa atu te tala me ko nofo atu a ia i konā. Ne seki olo atu fua a tino Iutaia e tokouke ki te fale o Simona ke matea ne latou a Iesu, kae ke lavea foki ne latou a Lasalo, “telā ne fakatu aka ne [Iesu] mai te mate.” (Ioane 12:9) Nei la, ko aofaga fakatasi a faitaulaga pule ke tamate ne latou a Iesu, penā foki loa mo Lasalo. Ne mafau‵fau penā a takitaki lotu konei ona ko te mea e fai eiloa a te ola mai o Lasalo mo fai se pogai ko fakatuanaki ei a tino e tokouke ki a Iesu. Ko oko eiloa i te matagā o takitaki lotu konā!