KAPITE 101
He Kai Neʼe Fai ʼi Te ʼApi ʼo Simone ʼi Petania
MATEO 26:6-13 MALEKO 14:3-9 SOANE 11:55–12:11
-
ʼE TOE LILIU IA SESU KI PETANIA, ʼAE ʼE OVI KI SELUSALEMI
-
ʼE TAKAĪ E MALIA IA SESU ʼAKI HE LOLO MAGONI
Neʼe mavae ia Sesu mai Seliko ʼo alu ki Petania, pea neʼe ʼi ai te mahake neʼe kilometa 20 pea neʼe tokakovi te ala. Neʼe nonofo ia Lasalo mo ʼona tokolua ʼi te kiʼi kolo ko Petania, ʼae neʼe vaha mamaʼo ia kilometa ʼe tolu mo Selusalemi, pea neʼe tuʼu ʼi te faʼahi esite ʼo te Moʼuga ʼo Oliveto.
Neʼe hahaʼi te kau Sutea ʼae neʼe kua tau atu ki Selusalemi ki te Pasikate. Neʼe natou ʼomai fakatomuʼa “ke fakamaʼa natou ʼo mulimuli ki te Lao,” he neʼe lagi natou fāfā ki he sino mate pe neʼe natou fai he meʼa neʼe feala ke natou heʼe maʼa ai. (Soane 11:55; Numelo 9:6-10) Ko ʼihi ia natou ʼae neʼe ʼomai fakatomuʼa neʼe natou fakatahitahi ʼi te fale lotu. Neʼe natou feʼekeʼaki pe ʼe haʼu anai ia Sesu ki te Pasikate.—Soane 11:56.
Neʼe lahi ai te fepalalauʼaki ʼa te hahaʼi ʼo ʼuhiga mo Sesu. Ko ʼihi kau takitaki lotu neʼe natou fia puke pea mo matehi ia ia. ʼI tona fakahagatonu, neʼe natou fakatotonu, kapau neʼe iloʼi e he tahi pe neʼe ʼifea ia Sesu pea neʼe tonu ke fakaha age kia natou “ke feala hanatou puke ia ia.” (Soane 11:57) Neʼe kua faiga e te kau takitaki ʼaia ke natou matehi ia Sesu hili tana fakatuʼuake ia Lasalo. (Soane 11:49-53) Ko te tupuʼaga la ʼaia ʼo te lagi manatu ʼa ʼihi ʼe mole ha age anai ia Sesu.
Neʼe tau ia Sesu ki Petania ʼi te Feliaono, “ia ʼaho ʼe ono ʼi muʼa ʼo te Pasikate.” (Soane 12:1) Neʼe kamata te ʼaho ʼae neʼe hoa ki ai (te Sapato, ʼaho 8 ʼo Nisani) ʼi te to ʼo te laʼa. Koia neʼe ʼosi tona fagona ʼi muʼa ʼo te Sapato. Neʼe mole feala ke faifagona mai Seliko ʼi te ʼaho ʼo te Sapato, ʼae neʼe kamata ʼi te Feliaono ʼi te to ʼo te laʼa ki te Moeaki, ʼi te to ʼo te laʼa, he ʼe ko te loaloaga ʼo te faifagona ʼaia neʼe mole gafua ʼi te lao Fakasutea. Neʼe lagi alu ai ia Sesu ki te ʼapi ʼo Lasalo, ohage pe ko tana fai ʼi muʼa atu.
Ko Simone, ʼae neʼe toe nofo mo ia ʼi Petania, neʼe ina fakaafe ia Sesu mo ʼona kaumeʼa, ʼo kau ai ia Lasalo, ki he kai neʼe fai ʼi te Moeaki afiafi. Neʼe higoa ia Simone ko “te tagata kilia,” he neʼe lagi kilia pea neʼe fakamalolo ia ia e Sesu ʼi muʼa atu. Neʼe fakaha e Maleta tona ʼuhiga faʼa gaue, ʼo ina tauhi te kau fakaafe. Neʼe tokaga lelei ia Malia kia Sesu, ʼo ina fai he meʼa neʼe tupu ai he fihi.
Neʼe avahi e Malia te kiʼi hina alapate, neʼe ʼai ki ai te “lolo magoni totogi kovi neʼe mole fio.” (Soane 12:3) Neʼe maʼuhiga ʼaupito te moʼi lolo ʼaia, he neʼe tatau tona totogi (tenalio ʼe 300) mo te totogi ʼo he tahi neʼe gaue teitei taʼu katoa! Neʼe takaī lolo e Malia ia te ʼulu ʼo Sesu pea mo ʼona vaʼe, pea neʼe ina holoholoʼi ʼona vaʼe ʼaki tona lauʼulu. Neʼe tau te magoni ʼo te moʼi lolo ʼi te loto fale katoa.
Neʼe iita ai te kau tisipulo ʼo natou feuiʼaki fenei: “He koʼe koa ʼe ina maumauʼi feiaʼi te lolo?” (Maleko 14:4) Neʼe toe ui fenei e Sutasi Isekaliote: “He koʼe neʼe mole fakatau te moʼi lolo magoni ʼaia kia tenalio ʼe 300 pea mo foaki ia te falā maʼa te kau masisiva?” (Soane 12:5) Neʼe mole tuʼania moʼoni ia Sutasi ʼo ʼuhiga mo te kau masisiva. Neʼe nofo mo te kesi falā ʼa te ʼu tisipulo pea neʼe ina kaihaʼa te falā ʼae neʼe ʼi ai.
Neʼe kau ia Sesu mo Malia, ʼo ina ui fenei: “He koʼe ʼe kotou palalau feia ʼo ʼuhiga mo te fafine ʼaeni? Neʼe ina fai he gaue ʼe lelei kia te au. Koteʼuhi ʼe nonofo tuʼumaʼu pe te kau masisiva mo koutou, kaʼe ʼe mole au fakatahi tuʼumaʼu anai mo koutou. ʼI tana takaī te lolo magoni ʼaia ki toku sino, neʼe ina teuteuʼi ai toku ʼavaifo. ʼE au tala moʼoni atu kia koutou, ko he potu pe ʼe fakamafola ai te logo lelei ʼaeni ʼi te malamanei katoa, ʼe toe fakamatala anai mo te meʼa ʼae neʼe fai e te fafine ʼaeni, moʼo fakamanatuʼi ia ia.”—Neʼe kua fakalaka ʼi te ʼaho ʼe tahi te nofo ʼa Sesu ʼi Petania, pea neʼe mafola te iloʼi ʼae kua nofo ʼi ai. Tokolahi te kau Sutea neʼe natou ʼomai ki te ʼapi ʼo Simone, mole ʼuhi pe ke natou sisio kia Sesu kaʼe ke natou toe sisio foki kia Lasalo, “ ʼae neʼe ina [ia Sesu] fakatuʼuake mai te kau mate.” (Soane 12:9) Neʼe fonofono leva ia te kau pelepitelo pule ke natou matehi ia Sesu pea mo Lasalo. Neʼe manatu te kau takitaki lotu neʼe tupu la te tui ʼa te hahaʼi tokolahi kia Sesu ʼuhi ko te fakamaʼuli ake ʼo Lasalo. ʼI toe agakovi leva ʼa te kau takitaki lotu ʼaia!