Qhepürojj domingo 9 de nisán uröjjänwa, Jesusajj discipulonakapampiw Betaniat Jerusalenar sarapjjäna. Olivos Qollun utjki uka Betfagué markar jakʼachasipjjäna ukhajja, Jesusajj pä discipulonakaparojj akham sänwa:

“Khayan uñstaski uka jiskʼa markar sarapjjam. Puripjjäta ukhajja, mä asnow chintʼat ukankaskani, asnoqallupamp chika. Jararasin paypach nayatak jiktanipjjam. Maynitï kuns sapjjätam ukhajja, ‘Tatitutakiw jikhasipkta’ sasaw sapjjäta, ukaratpachaw jupajj jikhayanipjjätam” sasa (Mateo 21:2, 3).

Jesusajj kun lurañtï amtaskäna ukajj Bibliankir mä profeciätapjja janiw discipulonakajj amuyapkänti. Qhepatakwa Zacariasan profeciapan phoqasitap amuyasipkäna. Kunjamsa Jehová Diosan ajllit Reyipajj mantani uka toqetjja Zacariasajj sänwa: “Juman Reyimaw mä asnjjat jutaski, llampʼu chuymani, mä jiskʼa asno qalljjata” sasa (Zacarías 9:9).

Discipulonakajj Betfagué markar puripjjäna ukhajja, mä asnompi asnoqallupampi jiktaniñatakiw jararasipkäna, ukatwa uka jakʼankir jaqenakajj “¿kunatsa uka asnoqallur jararasipkta?” sasin jisktʼapjjäna (Marcos 11:5). Jesusatakiw irpasipkta sasin qhanañchapjjäna ukhajja, ‘ukhamajj jikhapjjamay’ sasaw sapjjarakïna. Discipulonakajj uka asnompiru asnoqallupampiruw isinakap karuntʼayapjjäna. Jesusasti asnoqalljjaruw qontʼasïna.

Jesusajj asnoqalljjat Jerusalenar mantkäna ukhajja, walja jaqenakaw tantachasipjjäna. Waljanirakiw isinakapjja thakir jantʼaktʼapjjäna. Yaqhepasti “ramanak apaqanipjjarakïna”, ukanakwa jantʼaktʼapjjäna. Ukatjja akham arnaqasipjjäna: “¡Ruwtʼasipjjsmawa, jupar salvam! ¡Jehová Diosan sutipjjar jutki ukajj bendisitäpan! ¡David awkisat jutki uka Reinojj bendisitäpan!” sasa (Marcos 11:8-10). Ukankir fariseonakajj ukanak istʼasajj wal colerasipjjäna. Jesusarojj sapjjarakïnwa: “Yatichiri, discipulonakamar amuktʼayam” sasa. Jesusasti sarakïnwa: “Nayajj sapjjsmawa, jupanakatejj amukïpjjaspajja, qalanakaw arnaqasipjjaspa” sasa (Lucas 19:39, 40).

Jesusajj Jerusalenar uñtäna ukhajja, jachänwa, akham sarakïnwa: “Jichhürukis jumajj sumankañat amuytʼasmäna..., ukampis ukanakajj nayranakamat jichhajj imantatawa” sasa. Jerusalenajj yatkasin jan istʼasitapatjja, jan walinwa uñjasiñapäna. Jesusajj mä profecía arsüna: “Urunakajj purininiwa, ukhaw enemigonakamajj ari puntani jachʼa lawanakampi muyuntayapjjätam, taqe toqetwa jumarojj jarkʼantapjjätam. Jumarus wawanakamarus qʼal tukjapjjarakïtam. Janirakiw juma taypinjja mä qalsa yaqha qala patjjarojj jaytapkaniti” sasa (Lucas 19:42-44). Jerusalén markajj 70 maranwa tukjat uñjasïna, ukhaw uka profeciajj phoqasïna.

Jesusajj Jerusalenar mantkäna ukhajja, markpachaw wal chʼajjwtapjjäna, sapjjarakïnwa: “¿Khitirak jupasti?” sasa. Yaqhepajj sapjjarakïnwa: “¡Jupajj profetawa, Jesús satawa, Galileankir Nazaret markatawa!” sasa (Mateo 21:10, 11). Jesusajj Lazaror jaktaykäna uk uñjirinakajja yaqhanakaruw uka milagrot yatiyapjjarakïna. Fariseonakajj jan kun kamachirjamäsajj wal llakisipjjäna. Jupanakkamajj akham sasipjjänwa: “Taqenirakiw jupan qhepap sarjjapjje” sasa (Juan 12:18, 19).

Jesusajj Jerusalenankkasajja, templorupuniw yatichir sarirïna, ukhamarakiw jichhajj luräna. Ukanjja juykhunakaru cojonakaruw qolläna. Ukatjja wawanakarakiw Jesusar jachʼañchasajj templon jachʼat akham sasin arnaqasipjjäna: “¡Ruwtʼasipjjsmawa, Davidan Yoqapar salvam!” sasa. Jilïr sacerdotenakampi escribanakampejj  uka arunak istʼasasa, Jesusan luratanakap uñjasasa wal colerasipjjäna. Jesusarojj akham sapjjarakïnwa: “¿Kuntï sapki ukanak istʼtati?” sasa. Jesusasti sänwa: “Jïsa, istʼtwa. ‘Jiskʼa wawanakana ukhamarak ñuñuskir wawanakan lakapatwa jachʼañchir arunak mistuytajja’ siski uka arunak ¿janit mä kutis liytʼapkta?” sasa (Mateo 21:15, 16).

Jesusajj kunatï templon utjkäna taqe ukanakwa uñjäna. Jaypʼöjjäna ukhajja, apostolonakapampiw Jerusalenat mistjjäna. Janïr 10 de nisán urükipanwa, Betaniar sarjjapjjäna, ukanwa domingo arumajj quedasirakïna.