I kel i bé noñ, i ngwa jôn i hilo 9 hi sôñ Nisañ, Yésu ni banigil bé ba nyodi i Bétania inyu ke i Yérusalem. Kiki ba yé tiige bebee ni Bétfagé, i ngii Hikôa Ôlivé, Yésu a nkal banigil bé iba le:

“Kena i mbai ni ntehe nyoo bisu, i ngéda ni njôp mu, n’a koba le ba ntéñ jakas ni man wé ipañ yé. Ni tiñil mo, ni lona me mo. Ibale mut a mbat bé jam, ni nlama kal le: ‘Nwet a gwé ngôñ ni mo.’ I nlélém ngéda, a’ ep magas.”​—Matéô 21:2, 3.

Banigil ba ntehe bé le bipôdôl bi Yésu bi nkiha ni ngim mbañ. I mbus ngéda nyen ba bi nok biyônôl bi mbañ Sakaria. A bi legel ki le Djob a nlama téé Kiñe i nlama jôp i Yérusalem “Mut nwee, a nkil ngii jakas, ngii onk jakas i yé man ñin jakas.”​—Sakaria 9:9.

Ngéda banigil ba mbol i Bétfagé, ba nyoñ man jakas ni nyañ, bet ba téé ha bebee ba mbat le: “Inyuki ni yé i tiñil jakas?” (Markô 11:5) Ndi kiki ba nok le bilém bi bi yé inyu Nwet, ba nwas le banigil ba kena gwo Yésu. Banigil ba nkés mambot map i ngii jakas ni ngii man jakas, ndi i ngii man jakas nyen Yésu a mbet.

Limut li nkeñep kiki a yé kôôge bebee ni Yérusalem. Ngandak i ntek mambot map i njel, bape ba nkit masee tole “ba kit tjai i nwom” inyu bii i njel. Ba nlond le: “Tohol, di nsoohe! Nu a nlôl i jôl li Yéhôva a ba nsaibak!” (Markô 11:8-10) Farisai i i yé ipôla limut i ta bé maséé ni bibégés bi. Ba nkal Yésu le: “A Lét, nyéyéi banigil boñ.” Yésu a ntimbhe bo le: “To ibale bana ba nyén nwee, ngok i nkahal lond.”​—Lukas 19:39, 40.

Mu kiki Yésu a mbéñge Yérusalem, a mbôdôl ee a kalak le: “Ibale i len ini, wemede mede u yimbe i mam ma nlona nsañ, ndi nano ma sôli i mis moñ. Inyule i dilo d’a lo, baoo boñ b’a oñ soso lipénd li mbiñ, ba kéña we, ba hék ki we bipes gwobisôna. B’a leñ we ni bon boñ bobasôna isi, ba yék bé to ngok yada i kéhi i ngii ipe.” (Lukas 19:42-44) Ni mbale toi, bipôdôl bi Yésu bi bi yon i nwii 70 N.Y., ngéda Yérusalem a bi tjiba.

Ngéda Yésu a njôp i Yérusalem “bôt ba tison yosôna ba bé ikété liyôgbe, ba kalak le: ‘Njee nu?’” Limut li nke ni bisu i kal le: “Mpôdôl Yésu nu, nyen a nlôl i Nasaret nu Galiléa!” (Matéô 21:10, 11) I bet ba bi tehe Yésu a ntugul Lasarô ba ñañle bape i hélha jam i. Farisai i ntjelel mu kiki mut nye ki nye a nit bé bo. Ba nkalna bo ni bo le: “Nkoñ ‘isi u noñ nye.”​—Yôhanes 12:18, 19.

Kiki lem, ngéda Yésu a mpam i Yérusalem, a nke i témpel inyu niiga. Nyoo, a mbuubaha bibôk bi bôt ni bôt ba ndim. Kiki prisi keñi ni bayimbén ba ntehe yom Yésu a mboñ, ni nok kiki boñge ba nlond i témpel ba kalak le: “Tohol Man David!” Ñem u nhénd bo. Baéga bibase ba mbat Yésu le: “Baa u nok yom ba yé pot?” Ni nye a ntimbhe bo le: “Ñ. Baa ni ma bé añ haana le: ‘U bi boñ le bibégés bi pémél i manyo ma boñge ni ma minkéñéé mi bon’?”​—Matéô 21:15, 16.

Yésu a mbéñge gwom bi yé ikété témpel. Nye ni baôma bé ba nyodi i témpel inyule ngéda i ntagbe. Ilole hilo 10 hi sôñ Nisañ hi mbôdôl, a ntémb i Bétania, nyoo nyen a ntégbaha u u ngwa jôn.