Kan sunod na aldaw, Domingo, Nisan 9, naghali si Jesus sa Betania kaiba an mga disipulo asin nagpa-Jerusalem. Kan harani na sa Betfage, sa Bukid nin mga Olibo, duwang disipulo an sinugo ni Jesus:

“Dumuman kamo sa baryong iyan, asin makakanumpong tulos kamo nin sarong nakagakod na asno na may kaibang sarong ugbon. Hubadan nindo sa pagkakagakod an mga iyan asin darahon nindo sa sako. Kun may magsabi nin ano man sa saindo, sabihon nindo, ‘Kaipuhan kan Kagurangnan an mga ini.’ Dangan ipapadara niya tulos an mga iyan.”—Mateo 21:2, 3.

Dai nasabutan kan mga disipulo na may kalabot iyan na hula sa Bibliya. Pero dai nahaloy nasabutan ninda an kautuban kan hula ni Zacarias na an ipinanuga nin Diyos na Hadi maduman sa Jerusalem na “mapakumbaba asin nakasakay sa sarong asno, na ugbon nin sarong babaying asno.”—Zacarias 9:9.

Kan makaabot an duwang disipulo sa Betfage asin kuanon an sarong ugbon na lalaking asno saka an ina kaini, an nagkapira sa mga nakatindog sa harani nagharapot: “Ano ining ginigibo nindo ta hinuhubadan nindo sa pagkakagakod an ugbon na asno?” (Marcos 11:5) Pero kan sabihon sa sainda na kaipuhan an mga ini kan Kagurangnan, pinabayaan ninda an mga disipulo na darahon an mga ini ki Jesus. Dangan ipinatong kan mga disipulo an pang-ibabaw nindang mga bado sa asno asin sa ugbon kaini, pero sa ugbon na asno suminangkay si Jesus.

Duminakol an tawo kan nag-aagi si Jesus na nakasakay sa asno palaog sa Jerusalem. Dakul an naglatag sa dalan kan pang-ibabaw nindang bado. An iba nagpurutol nin “mga sangang may mga dahon” asin ilinatag iyan sa dalan. Sinda nagkururahaw: “Iligtas mo tabi siya! Biniyayaan an saro na minadatong sa ngaran ni Jehova! Bendisyunan lugod an madatong na Kahadian kan satong ama na si David!” (Marcos 11:8-10) An mga Fariseo na yaon duman dai naugma sa pag-umaw na ini. Sinabi ninda ki Jesus: “Paratukdo, sawayon mo an saimong mga disipulo.” Nagsimbag si Jesus: “Sinasabi ko sa saindo, kun magdadanay na silensiyo an mga ini, an mga gapo makururahaw.”—Lucas 19:39, 40.

Miyentras na pigmamasdan ni Jesus an Jerusalem, nagtangis siya asin nagsabi: “Ika, kun namansayan mo sana sa aldaw na ini an mga bagay na magtatao nin katuninungan—pero ngunyan dai na iyan mahihiling kan saimong mga mata.” Huhukuman an Jerusalem huli sa tuyong pagsuway. Ihinula ni Jesus: “An saimong mga kaiwal mabugtak sa palibot mo nin kudal nin mapapanas na taldok asin sasalikupan ka ninda saka biyo kang lalaumon. Pupulbuson ka ninda pati an saimong mga aki na nasa laog mo, asin dai sindang itatada sa saimo na gapo sa ibabaw nin gapo.” (Lucas 19:42-44) Nautob ini kan laglagon an Jerusalem kan 70 C.E.

Paglaog ni Jesus sa Jerusalem, “nagkakariribok an mga tawo sa bilog na siyudad, na nagsasarabi: ‘Siisay ini?’” Asin an mga tawo nagpaparasarabi: “Ini an propetang si Jesus, na taga Nazaret nin Galilea!” (Mateo 21:10, 11) An mga tawong yaon duman na nakahiling kan pagbuhay ni Jesus ki Lazaro ibinareta sa iba an milagrong iyan. Kaya nagmurundo an mga Fariseo ta garo daing nangyayari sa plano ninda. Nagsarabi sinda sa kada saro: “Nagsusunod na sa saiya an bilog na kinaban!”—Juan 12:18, 19.

Arog kan nakaugalian na ni Jesus pag nasa Jerusalem, naglaog siya sa templo para magtukdo. Duman nagpaumay siya nin mga buta saka pilay. Kan mahiling kan mga panginot na saserdote saka kan mga eskriba an ginigibo niya asin madangog an mga aking lalaki na nagkukururahaw sa templo, “Iligtas mo tabi an Aki ni David!” nagkaaranggot sinda. An mga lider na ini nin relihiyon naghapot ki Jesus: “Nadadangog mo an sinasabi kan mga ini?” Nagsimbag siya: “Dai lamang nindo nabasa ini, ‘Hali sa nguso nin mga aki asin mga umboy nagkamit ka nin pag-umaw’?”—Mateo 21:15, 16.

Hiniling ni Jesus an gabos na bagay sa palibot kan templo. Pero huling pabanggi na, naghali na siya kaiba an mga apostol. Bago pa mag Nisan 10, buminalik siya sa Betania asin duman nagpalihis nin Domingong banggi.