Môse wo tôñe wu a nga di be Simon, Môse sondô, Nisan 9, Yésus ba beyé’é bé ba kolô Béthanie a ke Jérusalem. Ane ba subu Bethphagé bebé, Nkôle Beolivier yôp, Yésus a jô beyé’é bé bebaé na:

“Kelan nlam ô ne mia ôsu, mi aye ji’a koé éjakas ntiñetan, ba mon: ti’ane be, mi zule me be nne. Nge môt a ye jô mia ajô, mi jô’ô nye na, Tate a kômbô nyoñe be; wôna a ye ji’a lôme be.”​—Matthieu 21:2, 3.

Beyé’é be nji kui na be yene na abendé ete da jalé nkulan ajô ya Bible. Ve, mvuse ya valé, ba ye yemelane na nkulan ajô Zacharie éziñ wo te tôéban. A nga kuli na Njôô Zambe a nga ka’ale a ye nyiin Jérusalem “a too zôsôô a ndañan, nsilibane si a bete éjakase yôp, e mon ngal éjakas.”​—Zacharie 9:9, Mfefé Nkôñelan.

Éyoñe beyé’é ba zu Bethphagé a nyoñe ngal éjakas ba mon, ane bôte béziñ be ne valé ba jô be na: “Mia tiine mon éjakas ate amu jé?” (Marc 11:5, Mfefé Nkôñelan) Ve, éyoñe ba wô’ô na betit be ne asu Tate, ba jô’é na beyé’é be ke be e be Yésus. Beyé’é ba mane ta mengômesan mab mvus mon éjakas a nyia, ve Yésus a bete mon éjakase yôp.

Nté Yésus a ke Jérusalem, bôt ba bômane nye be ne ve ba’aban. Abui da mane ta mengômesane mape zen. Bevo’o ba bu’u mintyaé bilé nge “boé mebui bilé, be nga ti’i me mefup.” Ba yôtan a jô na: “Hosanna; Ébotan a nyô a zu jôé Tate: Ébotan a ayoñ de azu, ayoñ ya Ésa wongan David.” (Marc 11:8-10) Éyoñe Bepharisien be ne bôt été valé, ba wô’ô jam ete, ba wô’ô mbia ôlun. Nde ba jô Yésus na: “A Ñye’ele bamé’é beyé’é bôé.” Yésus a yalane na: “Ma jô mia de na: nge ba tabe bivô, mekok ma ye yôtan!”​—Luc 19:39, 40, Mfefé Nkôñelan.

Éyoñe Yésus a yene Jérusalem ôsu, a taté na a yôn a jô’ô na: “Nge ô nga yeme mam me aye bo wo mvo’é môse wu! Ve éyoñe ji me ne nsolane mise môé.” Jérusalem a ye bi ma’ane ya melo mé. Yésus a jô na: “Besiñe boé be aye bô’ô wo ékôndôk mimfa’a mise, a bômane wo ne kpwok! A dipe wo mezene mese, be aye bibi wo si, a bone bôé bese; be aye li’i wo, te yen ako’ e bete da vo’o yôp.” (Luc 19:42-44) Minkobô mi Yésus mia toébane fo’o, amu ntyamane Jérusalem ô nga kui mbu 70 É.J.

Éyoñe Yésus a nyiine Jérusalem, bôte bese be ne tison be ne fe’e ne vema a ba sili na: “Nyina a ne za?” A nsamba bôte wo ke ôsu a jô na: “Nyina a ne nkulu mejô, Yésus, a so Nazareth, nlame ya Galilée.” (Matthieu 21:10, 11) Bôte be ne ékôan éte, be nga yen ane Yésus a wômôlô Lazare ba kañete bôte bevo’ asimba ete. Bepharisien ba wô’ô ôlun amu ba yene na, be vo’o beta bo jôm éziñ, nde ba jô bebiene na: “Bôte bese ya si nyô be maneya tôñe nye.”​—Jean 12:18, 19.

Fo’o ve aval a wô’ô bo éyoñ a kui Jérusalem, Yésus a ke Temple asu na a ke ye’ele. Vôm ate, a saé mindindim a miñyeyem. Éyoñe bemie beprêtre a bescribe ba yene jam a bo, a aval bongô ba yôtan e Temple été be jô’ô na: “Ébotan a mone David!” ba wô’ô mbia ôlun. Nde betebe ôsu ya ñyebe ba sili Yésus na: “Ye wo awô’ ane bana be ajô?” Nde a jô be na: “Ye mi nji lañe na, Bongô a bon be anyañe mebé be aye dañe kañe wo?”​—Matthieu 21:15, 16.

Yésus a ke a fombô Temple. Mbol éyoñ é maneya lôt, ba minlôman mié ba kolô a bulane Béthanie ôsusua na Nisan 10 a taté. Vôm ate nye ba lôt alu ya Môse sôndô.