O dugusagwɛ, o kɔrɔ, dimansilon Nisankalo tile 9nan na, Yezu n’a ka kalandenw bɔra Betani ka Zeruzalɛmu sira minɛ. U surunyana Bɛtifaze la tuma min na, o min be oliviyeyirikulu kan, Yezu y’a fɔ a ka kalanden fila ye ko.

“Aw ye taga ɲafɛ dugu nin na. Aw bena falimuso n’a deen sirinin sɔrɔ yen. Aw k’a foni ka na n’u ye. Ni mɔgɔ dɔ y’aw ɲininga, aw k’a fɔ a tigi ye ko Matigi mako le b’u la, o yɔrɔnin bɛɛ, a bena aw to aw be na n’u ye.”—Matiyo 21:2, 3.

Kalandenw m’a faamu ko Yezu ka kumaw be Bibulu ka kiraya kuma dɔ lo dafara. Nka kɔfɛ, u y’a ye ko Zakari ka kiraya kuma lo dafara. A tun kɔnna k’a fɔ ko Ala ka Masacɛ bena don Zeruzalɛmu, a “majiginnen, a yɛlɛlen . . . fali kan, falimuso den yɛrɛ kan.”—Zakari 9:9, ABM.

Tuma min na kalandenw sera Bɛtifaze k’u be faliden n’a bamuso minɛ, mɔgɔ minw be yen, olu y’u ɲininga ko: “Mun na aw be faliden nin fonina?” (Mariki 11:5). Nka kalandenw y’a fɔ u ye ko Matigi lo mako b’u la minkɛ, u y’a to u tagara. Kalandenw y’u ka faniw la falimuso n’a deen kan, nka Yezu yɛlɛla faliden lo kan.

Yezu surunyatɔ Zeruzalɛmu la, mɔgɔ minw bɔra ka taga a kunbɛn, olu tun be cayara ka taga. U caaman y’u ka faniw la sira kan. Dɔ wɛrɛw ye “furaburuw tigɛ waga kɔnɔ” k’u la sira kan fana. U pɛrɛnna ko: “An be Ala tanu! Mɔgɔ min be nana Matigi tɔgɔ la, Ala ka barika don o la! An faa Dawuda ka masaya ɲɔgɔn min bena sigi, Ala ka barika don o la.” (Mariki 11:8-10). Fariziɲɛ minw be jama cɛma, o kumaw y’u dimi. U y’a fɔ Yezu ye ko: “Karamɔgɔcɛ, a fɔ i ta karamɔgɔdenw ye ko o ye je.” Yezu y’u jaabi ko: “Hali ni o jera, kabakuruw le bɛna pɛrɛn o nɔ ra; ne bɛ o fɔ aw ye.”—Luka 19:39, 40, Biblu Ala ta Kuma.

Ka Yezu to Zeruzalɛmu filɛli la, a y’a daminɛ ka kasi a kun na ani k’a fɔ ko: “Koo min be se ka hɛrɛ d’aw ma, n’aw tun b’o lɔn bii yɛrɛ, o tun bena ɲa. Nga, aw te foyi lɔnna o la.” Zeruzalɛmukaw bena u ka kanminɛbaliya sara sɔrɔ. Yezu y’o le fɔ ko: “Aw juguw bena . . . aw lamini, k’aw dɛrɛ faan bɛɛ la. U bena aw ka dugu n’aw yɛrɛ bɛɛ halaki, u bena boonw bɛɛ ci.” (Luka 19:42-44). Yezu ka kumaw dafara: saan 70 la, Zeruzalɛmu halakira.

Yezu donna Zeruzalɛmu tuma min na, dugu bɛɛ lamagara. U tun be ɲiningali kɛ ko: “Cɛɛ nin ye jɔn ye?” Jama tora k’a fɔ ko: “Kira Yezu lo ka bɔ Nazarɛti, Galile mara la.” (Matiyo 21:10, 11). Yezu ye Lazari suu kunu mɔgɔ minw ɲɛɛ na, olu y’o kabako lakali dɔ wɛrɛw ye. Fariziɲɛw dusu tiɲɛna sabu u m’a lɔn u bena min kɛ. U y’a fɔ ɲɔgɔn ye ko: “Mɔgɔ bɛɛ le be tugur’a kɔ.”—Zan 12:18, 19.

Yezu tagara Alabatoso kɔnɔ ka mɔgɔw kalan. A tun be to k’o le kɛ n’a tagara Zeruzalɛmu. Fiyentɔ ni senkelennin minw be yen, Yezu y’u kɛnɛya. Sarakalasebagaw kuntigiw ni sariya karamɔgɔw y’o ye minkɛ ani u y’a mɛn denmisɛnw be pɛrɛnna Alabatoso kɔnɔ ko “an b’i tanu Dawuda dencɛ,” u dimina. U ye Yezu ɲininga ko: “I ma denmisɛn nunu ka kuma mɛn wa?” Yezu y’u jaabi ko: “Ɔnhɔn, aw fana ma deli k’a kalan Ala ka kuma na wa ko: ‘E y’e tanuli kuma don denmisɛnw ni denɲɛninw daa la’?”—Matiyo 21:15, 16.

Yezu ye Alabatoso kɔnɔfɛnw filɛ. Komi wulada sera, ale n’a cidenw bɔra Zeruzalɛmu ka taga Betani sanni Nisankalo tile 10nan ka daminɛ. A ye dimansilon suu kɛ yen.