Ke ndan̄nsiere, ke Nisan 9 emi edide Sunday, Jesus ọkpọn̄ Bethany onyụn̄ asan̄a ye mbet esie aka Jerusalem. Nte mmọ ẹkperede Bethphage emi odude ke Obot Olive, enye ọdọhọ mbet esie iba ete:

“Ẹka ẹkedụk obio-in̄wan̄ emi mbufo ẹdade ẹkụt ko, ndien kpa idaha oro mbufo ẹyekụt ass emi ẹyịride ye eyen esie; ẹtat mmọ ẹda ẹsọk mi. Ndien edieke owo ekededi etịn̄de n̄kpọ ye mbufo, mbufo ẹdọhọ ẹte, ‘Ọbọn̄ oyom mmọ.’ Ntem enye ọyọsọsọp ọnọ mmọ ẹdi.”—Matthew 21:2, 3.

Mme mbet idiọn̄ọke ke se Jesus ọdọhọde mmimọ inam emi osu prọfesi kiet ke Bible. Nte ini akade ke mmọ ẹkefiọk ke se ẹkedọn̄de mmimọ inam okosu prọfesi Zechariah. Enye ọkọdọhọ ke ini Edidem emi Abasi emekde edidụkde Jerusalem, ke enye oyosụhọde idem “awat ke ass, ke unam emi okponde ọwọrọ, kpa eyen uman ass.”—Zechariah 9:9.

Ke ini mme mbet ẹsịmde Bethphage, mmọ ẹmen abak ass oro ye eka esie. Mbon emi ẹdade ẹkpere do ẹbụp mmọ ẹte: “Nso ke mbufo ẹnam emi ke nditat abak ass oro?” (Mark 11:5) Edi ke ini mme mbet ẹdọhọde ke imen isọk Jesus, mmọ ẹyak mmọ ẹmen ẹdaha. Mme mbet ẹmen ọfọn̄idem mmọ ẹbri ke enyọn̄ ass ye abak ass, edi Jesus etie ke abak ass.

Nte Jesus ekperede Jerusalem, ntre ke mbon emi ẹtienede enye ẹdọdiọn̄ ẹwak. Ediwak owo ẹbri ọfọn̄ mmọ ke usụn̄. Mbon en̄wen ẹsịbe n̄kọk eto mîdịghe “ẹkpi ikọn̄ ke in̄wan̄” ẹbri, ke ẹfiori ẹte: “Mbọk, nyan̄a enye! Itoro enyene enye emi edide ke enyịn̄ Jehovah! Itoro enyene obio ubọn̄ ete nnyịn David emi edide!” (Mark 11:8-10) Se mme owo ẹtịn̄de emi ayat mme Pharisee etieti. Mmọ ẹdọhọ Jesus ẹte: “Andikpep, sua nọ mme mbet fo.” Jesus ọbọrọ mmọ ete: “Ndọhọ mbufo nte, Edieke mmọ emi ẹkpedopde uyo, mme itiat ẹkpesio n̄kpo.”—Luke 19:39, 40.

Ke ini Jesus asan̄ade ekpere Jerusalem, enye ọtọn̄ọ nditua nnyụn̄ ndọhọ ete: “Edieke afo ọkpọfiọkde mfịn emi mme n̄kpọ eke ẹnamde emem odu—edi ke emi mmọ ẹmedịbe fi ke enyịn.” Ẹyesobo Jerusalem sia mme Jew mîmaha ndikop uyo Abasi. Jesus ọdọhọ ete: “Mme asua fo [ẹyeda] nsọsọp iso eto ẹbọp ọkọ ukpeme ẹkanade fi, ẹyenyụn̄ ẹkan fi ẹkụk, ẹnyụn̄ ẹbaha fi ke kpukpru n̄kan̄, ndien mmọ ẹyesụhọde fi ye nditọ fo emi ẹdụn̄de fi ke esịt ẹnịm ke isọn̄, mmọ idinyụn̄ ikpọn̄ke itiat kiet ke enyọn̄ itiat efen ke esịt fo.” (Luke 19:42-44) Ẹma ẹsobo Jerusalem ke isua 70 eyo Christ kpa nte Jesus ọkọdọhọde.

Ke ini Jesus odụkde Jerusalem, “ofụri obio ẹdu ke ndutịme, ẹdọhọ ẹte: ‘Anie edi emi?’” Mme owo ke ẹdọhọ ẹte: “Emi edi Jesus, kpa prọfet emi otode Nazareth ke Galilee!” (Matthew 21:10, 11) Ndusụk mbon emi ẹkekụtde nte Jesus anamde Lazarus eset ẹtịn̄ n̄kpọ emi ẹnọ mbon eken do. Mme Pharisee ẹseme nte mmọ mîkemeke ndinam mme owo ẹtre ndibuọt idem ye Jesus ẹnyụn̄ ẹtịn̄ ke otu idemmọ ẹte: “Ofụri ererimbot ẹmewọrọ ẹtiene enye.”—John 12:18, 19.

Jesus aka temple ndikpep mme owo n̄kpọ. Se enye esinamde edi emi ini ekededi oro enye esịmde Jerusalem. Enye anam mme nnan ẹkụt usụn̄ onyụn̄ anam mme mbụn̄ọ ẹsan̄a isan̄. Esịt ayat mbọn̄ oku ye mme scribe ke ini mmọ ẹkụtde mme utịben̄kpọ emi ẹnyụn̄ ẹkopde nte nditọwọn̄ ẹfioride ke temple ẹte: “Mbọk, nyan̄a Eyen David!” Mme adaiso ido ukpono ẹnyụn̄ ẹbụp Jesus ẹte: “Nte omokop se mmọ emi ẹdọhọde?” Jesus ọbọrọ mmọ ete: “Nte akanam mbufo ikotke emi ite, ‘Afo amanam inua nseknditọ ye mmọ eke ẹwapde eba ẹtoro fi’?”—Matthew 21:15, 16.

Jesus asan̄a ese n̄kpọ ke temple. Edi sia eyo okụtde, enye ye mme apostle esie ẹkpọn̄ do. Mbemiso Nisan 10 ọtọn̄ọ, enye afiak aka Bethany akana do ke okoneyo Sunday.