Sunday, Nisan 9 ai, Iesu bona ena hahediba taudia be Betania idia rakatania bona Ierusalema dekenai idia lao. Olive Ororo ai ia noho hanuana, Betepage, kahirakahira idia ginidae neganai, Iesu be ena hahediba taudia rua dekenai ia gwau:

“Vairai ia noho hanua dekenai umui vareai, bona idia kwatua doniki ta mai ena natuna do umui itaia. Umui ruhaia bona lau dekenai umui mailaia. Bema ta ese umui ia nanadaia, do umui gwau, ‘Lohiabada be inai doniki rua ia ura.’ Bena biaguna ese maoromaoro unai doniki do ia siaidia.”​—Mataio 21:2, 3.

Hahediba taudia idia laloparara lasi, Iesu ia ura idia karaia gauna be Baibel ena peroveta herevana ia hagugurua. To gabeai idia ese Sekaraia ena peroveta herevana idia lalopararalaia. Ia gwau, Dirava ese ia gwauhamatalaia King “be manau tauna bona doniki latanai ia guia, doniki hahine ena natuna latanai ia helai.”​—Sekaraia 9:9.

Hahediba taudia be Betepage dekenai idia mai bona doniki natuna bona ena sinana idia abia neganai, unuseni idia gini taudia idia henanadai: “Dahaka dainai doniki natuna umui ruhaia?” (Mareko 11:5) Idia kamonai unai animal be Lohiabada totona idia abia neganai, hahediba taudia idia koua lasi, bena doniki be Iesu dekenai idia abidia lao. Hahediba taudia ese edia ataiai dabua be doniki bona ena natuna latanai idia atoa, to Iesu be doniki natuna latanai ia helai.

Iesu be Ierusalema dekenai ia lao neganai, hutuma be ia murinai idia lao. Momo ese edia dabua be dala dekenai idia atoa. Haida ese “dala badinai idia gini au edia rigi idia utua” bona dala dekenai idia atoa. Idia boiboi: “Mani ia oi hamauria! Iehova ena ladanai ia mai tauna be Ia ese ia hanamoa! Ia mai noho Basileia, iseda tamana Davida ena, be Dirava ese do ia hanamoa!” (Mareko 11:8-10) Hutuma huanai idia noho Farisea taudia be unai hereva dainai idia badu. Iesu dekenai idia gwau: “Hadibaia Tauna e, emu hahediba taudia oi gwau henidia.” Iesu ia haere: “Umui lau hamaoroa, bema idia hereva lasi, nadi do idia boiboi.”​—Luka 19:39, 40.

Iesu ese Ierusalema ia itaia neganai, ia tai bona ia gwau: “Bema oi be hari dina ai maino idia havaraia gaudia oi lalopararalaia, unai be namo. To hari idia be emu matana amo idia hunia vadaeni.” Ierusalema ena kamonai lasi karana dainai davana dikana ia abia. Iesu ia peroveta: “Emu inai taudia ese au mai matadia amo magu aukana do idia karaia bona oi do idia hagegea bona kahana ibounai amo oi do idia koua. Oi bona emu natudia ibounai be tano dekenai do idia negea, bona nadi ta be nadi ta latanai do ia noho lasi.” (Luka 19:42-44) Iesu ena hereva hegeregerena, lagani 70 C.E. ai, Ierusalema idia hadikaia ore.

Iesu be Ierusalema ia vareai neganai, “taunimanima ibounai be idia boiboi, idia gwau: ‘Inai be daika?’” Bona hutuma idia gwau: “Inai be peroveta tauna Iesu. Ia be Nasareta, Galilea amo ia mai!” (Mataio 21:10, 11) Hutuma huanai idia gini taudia haida be Iesu ese Lasaro ia hatorea isi lou karana idia itaia bona unai hoa karana idia gwauraia. Farisea taudia be unai idia itaia neganai, idia badu bona ta ta dekenai idia gwau: “Taunimanima ibounai be ia murinai idia lao.”​—Ioane 12:18, 19.

Vaia Iesu ia karaia bamona, Ierusalema dekenai ia lao neganai, dubu dekenai ia lao taunimanima ia hadibaia totona. Unuseniai matakepulu bona aena dika taudia ia hanamoa. Dubu biagudia bona taravatu hadibaia taudia be Iesu ia karaia karana idia itaia bona idia kamonai dubu  helaga lalonai memero maragidia idia boiboi, “Mani Davida ena Natuna oi hamauria!” neganai, idia badu. Tomadiho gunalaia taudia ese Iesu idia nanadaia: “Inai maragidia ese idia gwauraia herevana oi kamonai, a?” Ia haere: “To umui be inai hereva umui duahia lasi, a? Ia gwau, ‘Natu maragidia bona rata idia inua beibi edia uduna amo oi idia hanamoa.’”​—Mataio 21:15, 16.

Iesu be dubu lalonai idia noho gaudia ia itaia. Unai be ia adorahi vadaeni dainai ena aposetolo taudia ida ia lao. Nisan 10 ia do matamaia lasi neganai, Betania dekenai ia giroa lou, Sunday hanuaboi unuseniai ia noho.