Ba hari siti, iya nya hari minggu, 9 Nisan, Jesus mupuk ari Betani enggau bala murid iya lalu ngagai Jerusalem. Lebuh sida nyauka datai ba Betpagi, ba Bukit Kana, Jesus madahka tu ngagai dua iku murid iya:

“Alai seduai mupuk ngagai genturung pendiau ba mua nyin. Ba din seduai deka tetemuka siku keledai ke ditanchang, enggau anak iya ngimbai iya. Buka tali jelu dua iku nya, lalu bai jelu nya ngagai aku. Enti orang bisi bejaku ngagai seduai, sebut aja munyi tu, ‘Tuan begunaka dua iku keledai nya.’ Lalu iya deka ngasuh seduai mai jelu nya tekala nya.”—Matthew 21:2, 3.

Taja pia, bala murid enda meretika pesan ke diberi Jesus bisi kaul enggau jaku benabi. Tang pengujung iya, sida nemu utai ke digaga Jesus ngamatka jaku benabi Sekariah. Nabi Sekariah madahka Raja ti disemaya Petara deka ngagai Jerusalem enggau “baruh ati lalu nepan siku keledai, siku anak keledai ti agi biak.”—Sekariah 9:9.

Lebuh bala murid datai ba Betpagi, sida ngambi siku keledai enggau anak iya. Udah nya, sekeda orang ke bediri semak enggau endur nya nanya sida: “Nama kebuah seduai muka tali anak keledai nya?” (Mark 11:5) Tang lebuh sida nemu Tuan begunaka dua iku keledai nya, sida ngemendarka bala murid mai keledai nya ngagai Jesus. Dua iku murid nya lalu ngelempaika gari seduai iya ba dua iku keledai nya, tang Jesus nepan anak keledai nya.

Nyau kelama, majak mayuh orang nitihka Jesus ba pejalai iya ngagai Jerusalem. Mayuh orang nganchau gari sida ba jalai. Sida ke bukai nganchau “dan kayu ke dijarau sida ari tisi jalai” lalu ngengkahka semua nya ba atas jalai. Ku sida manjung madahka: “Kami besampi, selamatka iya! Beberekat meh iya ke datai dalam nama Jehovah! Diberekat meh Perintah ti deka datai, Perintah David, apai kami!” (Mark 11:8-10) Orang Parisi ke bisi ba dia ringat pengudah ninga orang bejaku munyi nya. Ku sida madah ngagai Jesus: “Pengajar, rara meh bala murid nuan.” Tang Jesus nyaut sida: “Aku madah ngagai kita: Enti sida enda bemunyi, batu tu deka manjung.”—Luke 19:39, 40.

Lebuh Jesus meda nengeri Jerusalem, iya berengkah nyabak lalu madahka: “Naka meh pemanah enti nuan nemu utai ke ulih mai pengelantang. Tang diatu, utai nya udah dilalaika ari mata nuan.” Jerusalem deka diukum laban sida sengaja enggai ngasi. Ku Jesus madah: “Bala munsuh nuan deka ngujakka kayu ti tajam ngelingi nuan. Sida deka ngelulung nuan lalu ngansak nuan ari semua endur. Sida deka ngempaska nuan enggau bala anak nuan ke tanah, lalu sida enda nejuka sigi batu pan deka mengkang betusun ba atas pangan diri.” (Luke 19:42-44) Utai ke disebut Jesus endang amat nyadi, laban ba taun 70 M., Jerusalem dirusakka.

Lebuh Jesus tama ngagai Jerusalem, “semua orang dalam nengeri nya begau magang. Ku sida nanya: ‘Sapa orang nya?’” Lalu orang mayuh majak madahka: “Iya nya Jesus, siku nabi ke datai ari Nasaret ba menua Galili!” (Matthew 21:10, 11) Orang ke bisi meda Jesus ngangkatka Lasarus ari mati, madahka utai nya ngagai orang bukai. Ketegal nya, orang Parisi mutap laban sida enda mujur ngasuh orang badu nitihka Jesus. Ku sida madah ngagai pangan diri: “Semua orang ba dunya udah nitihka iya.”—John 12:18, 19.

Baka biasa lebuh Jesus datai ke Jerusalem, iya deka ngagai Rumah Sembiang lalu ngajar orang. Ba dia, iya ngeraika sida ke buta enggau ke pinchat. Bala tuai imam enggau bala penulis Adat meda kereja ajih ke digaga Jesus, sereta ninga bala anak mit manjung ba Rumah Sembiang madahka: “Kami besampi. Selamatka meh Anak David!” Sida balat amat ringat lalu nanya Jesus:  “Kati nuan bisi ninga utai ke disebut sida?” Ku iya nyaut sida: “Kati kita nadai kala macha ayat ke madahka: ‘Nuan udah ngasuh mulut bala anak mit enggau anak mit ke benung nusu meri puji ngagai Nuan’?”—Matthew 21:15, 16.

Pengudah nya, Jesus meda semua utai ke bisi ba Rumah Sembiang. Tang hari nyau lemai, nyadi sebedau 10 Nisan berengkah, Jesus enggau bala rasul iya pulai baru ngagai Betani, alai iya deka bemalam ba hari minggu nya.