Evaọ okiokiọ riẹ nọ o rrọ Ẹdoka, Nisan 9, Jesu avọ ilele riẹ a te no Bẹtani bi kpobọ Jerusalẹm. Nọ a kẹle ẹwho Bẹtfaji no evaọ Ugbehru Olivi, Jesu ọ tẹ ta kẹ ilele ivẹ riẹ jọ nọ:

“Wha kpohọ iwhre nọ wha be kparo ruẹ na, wha te nwane ruẹ eketekete avọ ọmọ riẹ nọ a thuru fihọ oria. Wha ra ufi no ae re wha rehọ ae se omẹ. Otẹrọnọ ohwo jọ ọ tẹ ta ẹme jọ kẹ owhai, wha rẹ ta nọ, ‘Olori na ọ gwọlọ e rai.’ Ọ vẹ te nwane kẹ owhai uvẹ re wha rehọ ae ze.”—Matiu 21:2, 3.

Ilele na a vuhumu hu inọ uwou nọ o vi rai na u ti ru eruẹaruẹ Ebaibol jọ gba. Rekọ uwhremu na, a te ti vuhumu nọ oyena u ru eruẹaruẹ Zekaraya gba. Ọ ruẹaro nọ Ovie nọ Ọghẹnẹ ọ ya eyaa riẹ na ọ te ruọ Jerusalẹm avọ ‘omaurokpotọ be dhẹ eva ehru eketekete, gbe ehru ọmọ eketekete ọzae.’—Zekaraya 9:9.

Nọ ilele na a te Bẹtfaji jẹ be ra eketekete ọzae avọ oni eketekete na, ahwo nọ a dikihẹ kẹle etẹe a tẹ be nọ ae nọ: “Fikieme wha be rọ ra ọmọ eketekete na?” (Mak 11:5) Nọ ilele na a ta kẹ ae nọ Olori na ọ gwọlọ e rai, a tẹ kẹ ae uvẹ re a wha ae vrẹ. Ilele na a te fi iwu rai họ ehru eketekete ivẹ na, Jesu ọ tẹ keria ehru eketekete ọzae na.

Nọ Jesu ọ be dhẹ ruọ Jerusalẹm na ogbotu ahwo nọ a bi su lele iei a te bi dhe ebuebu. Ibuobu rai a tẹ rọ iwu rai hwa edhere. Amọfa a tẹ gbẹre “eya-iriẹ” rọ hwa edhere na. A te bi bo nọ: “Ma lẹ nọ, siwi ei! Oghale u te ọnọ ọ be rọ odẹ Jihova nyaze! Oghale u te Uvie ọsẹ mai Devidi nọ o be tha na!” (Mak 11:8-10) Ẹme nọ ogbotu na a bi whowho na o be dha otu Farisi na eva. A tẹ vuẹ Jesu nọ: “Owuhrẹ, whọku ilele ra.” Jesu ọ tẹ kpahe kẹ ae nọ: “Mẹ be ta kẹ owhai nọ, otẹrọnọ ahwo nana a te fibo, itho na i ti bo via.”—Luk 19:39, 40.

Nọ Jesu o bi rri Jerusalẹm na, o te muhọ ẹviẹ jẹ ta nọ: “Dodokọ nẹnẹ na, whọ riẹ eware nọ e rẹ wha udhedhẹ ze; rekọ a ko rai dhere no aro ra.” Ahwo Jerusalẹm a te reoja fiki aghẹmeeyo rai. Jesu ọ ruẹaro nọ: ‘Ewegrẹ ra a te rehọ ire esiọsiọle di ogba wariẹ owhẹ a ve ti ko owhẹ họ je gboja kẹ owhẹ no ofẹ kpobi ze. A te raha owhẹ totọ je kpe emọ ra no, yọ a te jọ eva ra nyasiọ utho ba ehru utho ho.’ (Luk 19:42-44) Ere o nwane via wọhọ epanọ Jesu ọ ta na, evaọ ukpe 70 C.E. a tẹ raha Jerusalẹm.

Nọ Jesu ọ dhẹ ruọ Jerusalẹm, “okpẹwho na soso o te duwu ku, a tẹ be nọ inọ: ‘Kinọ ono?’” Ogbotu na a tẹ be ta nọ: “Nọ Jesu ọruẹaro na, ọrọ Nazarẹt obọ Galili!” (Matiu 21:10, 11) Ahwo nọ a jọ etẹe okenọ Jesu ọ kpare Lazarọs no uwhu ze a te mu iku na họ egbe kẹ amọfa. Otu Farisi na a te bi bruenu nọ u re kẹ ae no. A tẹ be ta kẹ ohwohwo nọ: “Akpọ na kpobi ọ dhẹ lele iei no.”—Jọn 12:18, 19.

Jesu o te kpobọ etẹmpol na nyai wuhrẹ ahwo wọhọ epanọ ọ be hai ru nọ ọ tẹ ziọ Jerusalẹm. Ọ jọ etẹe siwi enọ i tuaro gbe enọ e ko. Nọ ilori izerẹ gbe otu ikere-obe na a ruẹ eware nọ o bi ru je yo ubo nọ emezae nọ e rrọ etẹmpol na a bi bo inọ, “Ma lẹ nọ, siwi Ọmọ Devidi!” eva e tẹ dha ae. Isu egagọ na a tẹ nọ Jesu nọ: “Kọ who bi yo ẹme nọ emọ nana a be ta na?” Ọ tẹ kpahe kẹ ae nọ: “Kọ wha ri se onana inọ, ‘Who ru nọ emaha gbe emọboba a bi ro jiri owhẹ’?”—Matiu 21:15, 16.

Jesu o te bi rri eware nọ e rrọ eva etẹmpol na. Evaọ oke nana yọ oke u thabọ no. Fikiere avọ ikọ riẹ a te no etẹmpol na. Taure ẹdẹ Nisan 10 u te ti muhọ, a te zihe kpobọ Bẹtani, yọ obei a wezẹ evaọ aso Ẹdoka.