Kwĩ Wakyumwa matukũ 9, mwei wa Nisani, Yesũ nĩwaumie Vethania e na amanyĩw’a make na makwata nzĩa mathi Yelusaleme. Makililye mathengeea Vethivake, ĩla yĩ Kĩĩmanĩ kya Mĩthata, eea amanyĩw’a make elĩ atĩĩ:

“Endai ũtũinĩ ũya wĩ mbee wenyu, na mwavika, nĩmũkwĩthĩa ĩng’oi yovetwe na kang’oli kayo. Mathasyei mũndetee. Na mũndũ amũkũlya, mwaĩle kũmwĩa, ‘Mwĩaĩi nũkũmenda.’ Mwamina kũmũtavya ũu, vau kwa vau nũkũmũeka mũthi namo.”—Mathayo 21:2, 3.

Amanyĩw’a mayaamanya kana kĩu Yesũ wamatavisye kyaĩ kĩanĩsye wathani wa Mbivilia. Ĩndĩ ĩtina nĩmesie kũmanya kana ũsu nĩ wathani wa Nzekalia weanĩaw’a. Mwathani ũsu athanĩte kana Mũsumbĩ wa Ngai ũla wathanĩtwe aĩ alike Yelusaleme “e na wĩnyivyo, na atũlĩte ĩng’oi, o ndena, ndena ya ĩng’oi.”—Nzekalia 9:9.

Yĩla amanyĩw’a maendie Vethivake na moosa yĩla ĩng’oi vamwe na kang’oli kayo, andũ ala maũngamĩte vau mamakũlilye atĩĩ: “Mwĩthasya kang’oli kau nĩkĩ?” (Maliko 11:5) Ĩndĩ mamina kwĩw’a kana Mwĩaĩi nĩwe wĩtĩtye mang’oi asu, nĩmamaekie mathi namo. Amanyĩw’a moosie ngũa syoo sya ĩũlũ na mavw’ĩka mang’oi asu me elĩ, ĩndĩ Yesũ ekalĩla kala kanini.

Andũ nĩmaendeeie kũmũmbĩlĩĩla Yesũ o ũndũ waendeee kũthengeea Yelusaleme. Aingĩ nĩmalanilye ngũa syoo lelũnĩ. Namo angĩ nĩmatũlaa mbonge sya mĩtĩ kana “mbonge syĩ matũ kuma mĩũndanĩ” makasyalany’a nzĩanĩ. O na nĩmakayanasya mayasya: “Mũtangĩĩe, nĩtũũvoya! Nĩmũathime ũla wũkĩte ĩsyĩtwanĩ ya Yeova! Ũsumbĩ ũla wũkĩte wa ĩthe witũ Ndaviti nĩmũathime!” (Maliko 11:8-10) Avalisi meew’a ũu nĩmathatie mũno. Meeie Yesũ atĩĩ: “Mũmanyĩsya, kany’a amanyĩw’a maku.” Nake amea: “Nĩngũmwĩa, aa makavindya, mavia no maneene na wasya mũnene.”—Luka 19:39, 40.

Yesũ asisya Yelusaleme nĩwambĩĩie kũĩa ayasya atĩĩ: “Ta kethĩwa we, o we, nũmanya ũmũnthĩ maũndũ ala matonya kũkũetee mũuo, ĩndĩ nĩmavithĩtwe methonĩ maku.” Yelusaleme ndyaĩ ĩlea kũsilĩlwa nũndũ nĩyaleete kũmwĩw’a Ngai na ngũlũ. Nĩkyo kĩtumi Yesũ wathanie atĩĩ: “Amaitha maku [makaseũvya] wiio wa ituĩ syĩ na mĩthya myasũvye, na maikũthyũlũlũka na kũũsiĩĩa ngalĩ syonthe. Makakũkimany’a nthĩ, we vamwe na syana syaku syonthe, na maikatia ĩvia ĩũlũ wa yĩngĩ nthĩnĩ waku.” (Luka 19:42-44) Wathani ũsu wa Yesũ weanĩie mwaka wa 70 ĩtina wa Klĩsto, yĩla Yelusaleme yaanangiwe.

Yesũ alika Yelusaleme ‘andũ onthe ala maĩ ndũanĩ ĩsu nĩmavũavũanie, makyasya:“Ũũ nũũ?”’ Nayo ĩkomano yaaasya: “Ũũ nĩ mwathani Yesũ, kuma Nasaleti ya Kalilii!” (Mathayo 21:10, 11) Amwe katĩ wa ala maĩ ĩkomanonĩ yĩu nĩmoonete Yesũ aithayũũkya Lasalo, na nĩmaeleasya ala angĩ ĩkomanonĩ yĩu ĩũlũ wa kyama kĩu. Avalisi meew’aa thĩna mũno nũndũ nĩmamanyaa kana nĩmaemetwe vyũ nĩ kũsiĩĩa Yesũ. Mambĩĩie kũneenany’a mayasya atĩĩ: “Nthĩ yonthe nĩmũatĩĩe.”—Yoana 12:18, 19.

Yesũ avika Yelusaleme nĩwaendie ĩkalũnĩ akamanyĩsye o tondũ weekaa. E vau nĩwavoisye ilalinda na ala maĩ onzu mamutha. Anene ma athembi na aandĩki nĩmathatie mũno yĩla  moonie ayĩka ũu, na meew’a tũmwana tũla twaĩ ĩkalũnĩ tũyasya na wasya mũnene, “Mũtangĩĩe, Mwana wa Ndaviti, nĩtũũvoya!” Nũndũ wa ũu atongoi ma ndĩni mamũkũlilye Yesũ atĩĩ: “Nũkwĩw’a ũndũ tũmwana tũũ tũkwasya?” Nake amea: “No mwaasoma ndeto ii, ‘Kuma makanyw’anĩ ma syana na tũũkenge, wĩ mũtaĩe’?”—Mathayo 21:15, 16.

Yesũ nĩwambĩĩie kwĩloela syĩndũ ila syaĩ ĩkalũnĩ. Kwaĩ kũnatuka, kwoou auma vau athi e na atũmwa make. Nĩwasyokie Vethania mũthenya wa matukũ 10, mwei wa Nisani ũte mũviku, na akomela kw’o ũtukũ wa Wakyumwa.