Mũthenya ũyũ ũngĩ, Kiumia Nisani 9, Jesu hamwe na arutwo ake makoima Bethania merekeire Jerusalemu. Makuhĩrĩria Bethifage, Kĩrĩma-inĩ kĩa Mĩtamaiyũ, Jesu akeera arutwo ake erĩ ũũ:

“Thiĩi gĩcagi-inĩ kĩĩrĩa mũrona, na mwakinya nĩ mũkuona ndigiri na njaũ yayo irĩ njohe. Mũciohore mũndehere. Mũndũ angĩmũũria kĩũria, mũmwĩre atĩrĩ, ‘Mwathani nĩ aracibatara.’ Na o hĩndĩ ĩyo nĩ ekũmwĩtĩkĩria.”​—Mathayo 21:​2, 3. 

Arutwo matirataũkĩrũo atĩ motaaro macio Jesu amahe moimanĩte na ũrathi wa Bibilia. No thutha ũcio makamenya atĩ motaaro macio marahingia ũrathi ũrĩa Zekaria aarathĩte. Oigĩte atĩ Mũthamaki ũrĩa Ngai eeranĩire angĩkaingĩra Jerusalemu arĩ na ‘ũhoreri, na oke ahaicĩte ndigiri, o aikarĩire njaũ ya ndigiri.’​—Zekaria 9:9.

Arutwo makinya Bethifage, o rĩrĩ marohora njaũ ya ndigiri na nyina, andũ arĩa marĩ hau hakuhĩ makamoria: “Mũrohora njaũ ĩyo nĩkĩ?” (Mariko 11:5) Ĩndĩ maigua atĩ nyamũ icio iratwarĩrũo Mwathani, makareka mathiĩ nacio mamũtwarĩre. Arutwo acio makaigĩrĩra nguo ciao igũrũ rĩa ndigiri ĩyo na njaũ yayo, ĩndĩ Jesu agaikarĩra njaũ arĩ yo.

Kĩrĩndĩ gĩgathiĩ gĩkĩingĩhaga o ũrĩa Jesu arakuhĩrĩria Jerusalemu. Aingĩ makaara nguo ciao njĩra-inĩ. Angĩ nao magatua “mathĩgĩ mĩkĩra-inĩ ya njĩra” na makamaara njĩra-inĩ. Makanĩrĩra makoiga: “Twahoya ũmũhonokie! Kũrathimwo nĩ ũrĩa ũroka na rĩĩtwa rĩa Jehova! Ngai nĩ arathime Ũthamaki ũrĩa ũroka wa ithe witũ Daudi!” (Mariko 11:​8-10) Afarisai arĩa marĩ thĩinĩ wa kĩrĩndĩ makarakara nĩ ũndũ wa ciugo icio. Makeera Jesu ũũ: “Mũrutani, kaania arutwo aku.” Nake Jesu akameera: “Ngũmwĩra atĩrĩ, aya mangĩkira, mahiga no maanĩrĩre.”​—Luka 19:​39, 40.

Jesu arora Jerusalemu, akambĩrĩria kũrĩra akoiga: “Na arĩ korũo nĩ ũmenyete maũndũ marĩa mangĩkũrehera thayũ, ĩndĩ rĩu nĩ mahithe harĩ maitho maku.” Itũũra rĩa Jerusalemu rĩrĩ handũ hairũ nĩ ũndũ wa kũrega gwathĩka. Jesu akoiga ũũ: “Thũ ciaku igakũirigĩra na mĩtĩ mĩicũhie o na igũthiũrũrũkĩrie na ikũhatĩke mĩena yothe. Na nĩ igaakũhagũrania o hamwe na ciana iria irĩ thĩinĩ waku, na itigaatiga ihiga o na rĩmwe rĩikarĩire rĩrĩa rĩngĩ.” (Luka 19:​42-44) Jerusalemu yanangirũo mwaka wa 70, o ta ũrĩa Jesu aarathĩte.

Jesu aingĩra thĩinĩ wa Jerusalemu, ‘andũ othe a itũũra rĩu makoimũrũrũka, makĩũranagia: “Ũyũ nũ?”’ Nakĩo kĩrĩndĩ gĩgaikara gĩkiugaga atĩrĩ: “Ũyũ nĩ Jesu wa Nazarethi ya Galili!” (Mathayo 21:​10, 11) Andũ arĩa me hau moonire Jesu akĩriũkia Lazaro makeera arĩa angĩ igũrũ rĩgiĩ kĩama kĩu. Afarisai makanyitwo nĩ kĩeha mona atĩ gũtirĩ ũndũ marahingia. Makerana atĩrĩ: “Thĩ yothe nĩwe ĩrũmĩrĩire.”​—Johana 12:​18, 19.

Jesu akaingĩra thĩinĩ wa hekarũ kũrutana, o ta ũrĩa amenyerete gwĩka athiĩ Jerusalemu. Arĩ kũu akahonia arĩa atumumu na cionje. Athĩnjĩri-Ngai arĩa anene na andĩki-Watho makarakara mũno mona ũrĩa areka na maigua tũhĩĩ kũu hekarũ-inĩ tũkĩanĩrĩra tũkiugaga: “Twahoya ũhonokie Mũrũ wa Daudi!” Atongoria acio a ndini makoria Jesu: “Hihi nĩ ũraigua ũrĩa aya maroiga?” Nake Jesu akameera: “Kaĩ mũtathomete ũũ: ‘Nĩ ũhotithĩtie twana o na tũkenge tũkũgooce’?”​—Mathayo 21:15, 16.

Jesu agacoka akerorangĩra indo iria irĩ kũu thĩinĩ wa hekarũ. Rĩu kũrorete gũtuka, kwoguo akoimagara hamwe na atũmwo ake. Mũthenya wa Nisani 10 ũtanambĩrĩria, agacoka Bethania na akaraara kũu mũthenya wa Kiumia.