Muna lumbu kiantete, i sia vo, Kialumingu, 9 kia Nisani, Yesu ye alongoki andi bakatukidi muna Betania, bele kuna Yerusaleme. Vava balueke lukufi ye Betefangi, vana Mongo a Olive, Yesu ovovese nwole muna alongoki andi vo:

“Nwenda muna vata dina kuntwala, vava nuluaka, nuwana e buluku diakangidilwa ye mwan’andi kena yandi. Nukutulula mo, nwantwasila mo. Avo muntu unuvovese diambu, nuvova vo, ‘Mfumu ovuidi mo mfunu.’ Vana vau okunuyambula nwiza mau.”—Matai 21:2, 3.

Alongoki ke babakwidi ko vo luludiku lwa Yesu ngwizani lwina yo ungunza wa Nkand’a Nzambi. Kansi, kuna kwalanda babakwidi e ndungan’a ungunza wa Zakaria. Zakaria wasakula vo o Ntinu ona Nzambi kasila o nsilu okwiza muna Yerusaleme, ‘nlembami ye okwendela vana buluku, vana swala dia buluku.’—Zakariya 9:9.

Alongoki vava balueke muna Betefangi, babongele e buluku yo mwan’andi, o wantu batelamene vana ndambu bayuvuidi vo: “Ekuma nukutulwilanga mwan’a buluku?” (Maku 11:5) Kansi vava bawidi vo e buluku yo mwan’andi Mfumu ubavuidi o mfunu, bayambwidi alongoki benda mau kwa Yesu. Alongoki batensekele mvuatu miau vana ntandu a buluku yo mwan’andi, kansi o Yesu omente kwandi vana suala dia buluku.

Wau se kekota muna Yerusaleme ndonga yizidi kunkika. Bayadidi mvuatu miau muna nzila. Akaka bazengele ndala yovo “makaya muna mpatu,” bayadidi mo. Bakazidi, oku vo: “E Nzambi, tudodokele, umvuluza! Nkwa nsambu ndiona okwizilanga muna nkumbu a Yave! Kiansambu e Kintinu kikwiza, kina kia se dieto Davidi!” (Maku 11:8-10) Afarisi ana bena vana, bakendalele wau bawidi dina nkangu bevovanga. Bavovese Yesu vo: “E Nlongi, tumba alongoki aku.” Kansi, Yesu ubavutwidi vo: “Inusamunwini vo, awaya, avo babutamene, matadi nga makazidi.”—Luka 19:39, 40.

O Yesu vava kamwene Yerusaleme, odididi, ovovele vo: “Kala vo ngeye kibeni wabakula omu lumbu kiaki, oma ma luvuvamu—kansi owau maswekamene omu meso maku. Kadi e lumbu ikwiza, ina vo atantu aku bekuzieta o lûmbu lwangolo lwa nti miasongoka, bekuzunga, bekubangika muna ndambu zawonso. Bekutuba va ntoto yo wan’aku, ke musiswa tadi vana ntandu a tadi ko omu ngeye, wau olembele zaya kolo kia nkingulw’aku.” (Luka 19:42-44) Kieleka, e mvovo mia Yesu mu kuma kia lufwasu lwa Yerusaleme mialungana muna mvu 70 wa tandu kieto.

O Yesu vava kakotele muna Yerusaleme, “e mbanza yawonso inikukini, oku vo: “Nani ndioyo?” E ndonga ikwamanene vova vo: “Ondioyu i Yesu wa ngunza, musi Nazarete a Ngalili!” (Matai 21:10, 11) Akaka muna ndonga, ana bamona Yesu vava kafula Lazaro, basamunwini o wantu e sivi diadi. Afarisi bakendalele, kadi bamwene vo basukidi kwau. Bavovanene vo: “E nza yawonso yele anlandi.”—Yoane 12:18, 19.

Wau vo i fu kiandi, Yesu vava kalueke mu Yerusaleme, wele muna tempelo kalonga. Owukidi mo mpofo ye mbevo a malu. Nganga zambuta ye asoneki bafungidi kikilu makasi wau bamwene mana Yesu kevanganga yo wá e yingiana-ngiana ikazanga muna tempelo, oku vo, “E Nzambi, tudodokele, vuluza Mwan’a Davidi!” Mfumu za mabundu bayuvuidi Yesu vo: “Nga owidi dina bevovanga awaya e?” Yesu ubavutwidi vo: “Ingeta. Nga ke nwatanga wo nkutu ko vo, ‘Muna nua mia yingiana-ngiana ye nsedia mu tuka lusanisinu e’?”—Matai 21:15, 16.

Yesu otadidi e salanganu ina muna tempelo. Wau vo kuma kwanda se kwina, Yesu ye ntumwa zandi bele kwau. Vitila e lumbu kia 10 kia Nisani, Yesu ovutukidi kuna Betania, olele kuna Kialumingu mu fuku.