Yezu wakumbuka mu Betania ne bayidi bende kuyabu batangile mu Yelushalema mu Dia lumingu dia 9 ngondo wa Nisana. Pavuabu benda basemena pabuipi ne Betefaje, mu Mukuna wa Olive, Yezu wakambila bayidi bende babidi ne:

“Ndayi mu musoko udi umueneka wawa, nenusangane diakamue mpunda musuika ne muana wa mpunda pamue nende. Nuyisulule, nulue nayi kundi. Muntu yeye munuase bualu, nudi ne bua kuamba ne: ‘Mukalenge udi nayi dijinga.’ Nanku yeye neayitume diakamue.”​—Matayi 21:2, 3.

Bayidi bakapanga mua kumona ne: malu avua Yezu ubambila avua akumbaja dîyi dia buprofete. Kadi panyima pa matuku bakalua kumvua bimpe dikumbana dia dîyi dia buprofete dia Zekâya. Ukavua mudianjile kumanyisha ne: Mukalenge uvua Nzambi mulaye uvua ne bua kubuela mu Yelushalema muikale ‘muena budipuekeshi ne mubande pa mpunda, pa muana wa mpunda, muana mutekete wa mpunda mukaji.’​—Zekâya 9:9.

Pavua bayidi bafike ku Betefaje ne bangate muana wa mpunda mulume ne mamuende, bantu bavua bimane pabuipi bakabebeja ne: “Tshinudi nusuluila muana wa mpunda au ntshinyi?” (Mâko 11:5) Kadi pakumvuabu ne: Mukalenge ke uvua mulombe nyama ayi, bakalekela bayidi baya nayi kudi Yezu. Bayidi bakateka bilamba biabu bia pa mutu pa mpunda ne pa muanende, kadi Yezu wakabanda pa muana wa mpunda.

Musumba wa bantu wakavula bu muvua Yezu mubande pa mpunda ne mutangile mu Yelushalema. Ba bungi bakadija bilamba biabu mu njila. Bakuabu bakakosa matamba a mitshi anyi “bisalasala bia mitshi mu mpata” ne kubiadijabu. Bavua bela mbila ne: “Tudi tulomba, pandisha! Eu udi ulua mu dîna dia Yehowa mmubeneshibue! Bukalenge bua tatu wetu Davidi budi bulua mbubeneshibue!” (Mâko 11:8-10) Bafalese bavua mu musumba wa bantu bakanyingalala bikole bua mbila eyi. Ke kuambilabu Yezu ne: “Mulongeshi, tandisha bayidi bebe.” Yezu wakabandamuna ne: “Ndi nnuambila ne: Bobu bashale bapuwe, mabue neele mbila.”​—Luka 19:39, 40.

Pavua Yezu mumone Yelushalema, wakatuadija kudila wamba ne: “Bu wewe nansha mujingulule mu dituku edi malu adi atangila ditalala, kadi mpindieu mbaasokoke ku mêsu kuebe.” Yelushalema neakenge bua muvuaye mubenge kutumikila ne muoyo mujima. Yezu wakadianjila kumanyisha ne: “Matuku nealue kuudi akuelela bena lukuna bebe lupangu lukole lua mitshi misongoloke, nebakunyunguluke ne nebakutshintshimike ku nseke yonso. Nebakuzake panshi wewe ne bana bebe badi munda muebe, ne kabakushiya munda muebe dibue pa mutu pa dikuabu.” (Luka 19:42-44) Bushuwa anu muvua Yezu muambe, Yelushalema wakabutuka mu tshidimu tshia 70 B.B.

Pakabuela Yezu mu Yelushalema, ‘bantu bonso ba mu tshimenga bavua mu dilubakana, bamba ne: “Nnganyi eu?”’ Bantu bakatungunuka ne kuamba ne: “Eu mmuprofete Yezu, wa ku Nazaleta wa Galela!” (Matayi 21:10, 11) Bantu ba mu musumba wa bantu bavua bamone Yezu ubisha Lazalo ku lufu bakambila bakuabu tshishima atshi. Bafalese bakadiabakena ne: kabavua ne tshikuabu tshia kuenza to. Bakambilangana ne: “Ba pa buloba bonso mbamulonde.”​—Yone 12:18, 19.

Anu bu muvua Yezu wenza pavuaye uya ku Yelushalema, wakaya ku ntempelo bua kulongesha. Kuntu aku wakondopa bampofu ne balema. Pavua bamfumu ba bakuidi ne bafundi bamone tshivuaye muenze ne bumvue bana bela mbila ku ntempelo bamba ne: “Tudi tulomba, pandisha Muana wa Davidi!” bakafiika munda. Balombodi ba bitendelelu bakebeja Yezu ne: “Udi mumvue bidi bana aba bamba anyi?” Ke yeye kubandamuna ne: “Kanuvua banji kubala bualu ebu: ‘Wewe udi mupatule butumbi mukana mua bana ne mua bana batshidi bamua mabele’ anyi?”​—Matayi 21:15, 16.

Yezu udi unyunguluka wenda utangila bintu bidi mu ntempelo. Bu mukavua dîba diye, udi umbuka ne bapostolo bende. Kumpala kua dituku dia 10 dia ngondo wa Nisana kutuadija, wakapingana mu Betania, yeye kupitshishamu butuku bua Dia lumingu.