Mu nihiku noocharela, Namurunku, 9 a Nisani, Yesu ni amuhuserya awe annavinyawo o Petaniya nave annaya o Yerusalemu. Yaacamenle o Petifaxe, o Mwaako wa Oliveti, Yesu onnaleela amuhuserya awe apiili:

“Muye mmawani oholo weiwo, ni munamumphwanya mwasana a puru amakeleliwe vamoha ni amannya. Mwataphule ni mwaruhe. Ni akhalà oni okoheni ariki: Munataphulelani, mmwakhule mwere: Apwiya t’anakhwela, nto anamwakòkiha hihano vava.”—Mateu 21:2, 3.

Amuhuserya annahesa osuwela mahusiheryo a Yesu anavolowela yooloherya ya Piipiliya. Voocharela awo anniiwexexa mwawaakhwanela yooloherya ya Sakariya. Owo aahiloherya wi Mwene olaiheryiwe ti Muluku onarwa avolowa mu Yerusalemu ‘awiyeviha ni an’wenle phuru.’—Zakariya 9:9.

Vaavaa amuhuserya anarwaaya o Petifaxe yaakunxe apuuru, achu ari vakhiviru annaakoha: “Munamutaphulelani?” (Marko 11:5) Nyenya vaavaa aniiwaaya wi asinama awo anakerihiwa wa Apwiya, annahiya amuhuserya wi yaakerihe wa Yesu asinama awo. Amuhuserya annakuha soowara saya va puuru ni va amannya, nave Yesu onnanwela puuru.

Muloko onnaacereryeya vaavaa Yesu onaacameleiye o Yerusalemu. Ancipale annaatelela soowara saya muramphani. Akina annuuha “mirai” sa n’yale nave annamwaramwaxela muramphani. Awo annakhuwela: “Ovuwa, òrèlihiwa tuwo onarwa wa nsina na Apwiya! Worèlihiwa t’omwene onarwela wa atithihu Davide!” (Marko 11:8-10) Afarisi ari va muloko wa achu annanyeenyeya ni masu yaawo. Awo annamuleela Yesu: “Muhusiha, wamàlihe amuhuserya-à.” Yesu onnawaakhula: “Miyo kinnolèlani wi awo yàmàla, maluku anamukhuwela.”—Luka 19:39, 40.

Vaavaa Yesu onooneiye epooma yo Yerusalemu, owo onnapacerya wunla nave onnaloca: “Wásuwenlesha nihiku nla, ahe weyo’tho, itchu sa murechele! Nyenya hihano sinnakhuweya va mithoni vá.” Yerusalemu onahaala oliva esisapo ya ohiiwelela. Yesu onnaloherya: “Amwichaniá enarwa-yorukuryeryiha mukhuryakhurya, yoricha weyo ryú, yovirela vothe vene’vo; nave enarwa-yotolosha weyo, ni anamwaneá mwa weyo; nave herwa-ehiya mwa weyo nluku nikina vasulu va nikhwaya.” (Luka 19:42-44, Nlakano Nahihano) Masu a Yesu teeparipari, omwaryiwa wa Yerusalemu weeren’ye eyaakha ya makhumi mathanu napiili E.K.

Vaavaa Yesu onavoloweiye mu Yerusalemu, ‘othene a epoma yele àtxhukuruwa, annnakohana èriki: “Tani yola?”’ Nave muloko onnatitelela oloca: “Ti mulipa a miririmu, Yesu o Nazaré, elapo yo Galileya.” (Mateu 21:10, 11) Yaale ari va nikhuuru na achu yaamonne Yesu amviihaka Lasaro annaaleela akina vooloca sa yootikhiniha yeele. Afarisi annoona nave anniikhupanyerya wi haanono voochawelavo. Awo annavaanela: “Atxhu othene annaya wa yowo!”—Yohani 12:18, 19.

Ntoko yookhovelela awe vaavaa onaxekuryeiye o Yerusalemu, Yesu onnaya mu empa ya Muluku wi ahusihe. Mwemmo onnampenuxa ohoona ni oorakala. Vaavaa asitokweene a mukucho ni alipa oorepa anoonaaya echu yeeyo oneereiye nave enawiiwaaya anamwane ekhuwelaka mu empa ya Muluku eriki “Ovuwa wa mwana a Davide,” awo annanyeenyeya. Ahooleli a malapelo annamukoha Yesu: “Onniwa anlotxaya?” Owo onnawaakhula: “À! Himutonko walakhanya:  Mwano mwa anamwane anetxa ni a mmatani nophwanyeyamo ntxitximiho nà?”—Mateu 21:15, 16.

Yesu onnavarerya moorukurerya echu eneereya mu empa ya Muluku. Voocharela, owo onnakhuma ni arummwa. Nihaakumve opacerya nihiku na 10 na Nisani, onnakookela o Petaniya, weiwo anakoneiyewo ohiyu wa nihiku Namurunku.