Diad sinmublay ya agew, Simba, Nisan 9, tinaynan nen Jesus so Betania a kaiba iray disipulo to tan amaarap ed Jerusalem. Nen manasingger irad Betfage, diad Palandey na Saray Olibo, inkuan nen Jesus ed duaran disipulo to:

“La kayod satay baryo a sankabantag yo, tan naromog yon tampol so sakey ya asno ya akasinger, tan say kilaw to. Ukbaran yo iratan tan iyakar yod siak. No walay mantepet ed sikayo, ibaga yo, ‘Nakaukolan iraya na Katawan.’ Diad satan et paala to la iratan a tampol.”​—Mateo 21:2, 3.

Ag-atebek na saray disipulo a sayan ingganggan nen Jesus et mikonektaan ed propesiya ed Biblia. Balet atalosan da lanlamang a kasumpalan iya na propesiya nen Zacarias. Impasakbay to ya onsabid Jerusalem so insipan na Dios ya Ari ya “mapaabeba tan akalugan ed sakey ya asno, ed sakey a kilaw, say kilaw na kabatyan ya asno.”​—Zacarias 9:9.

Nen akasabid Betfage iray disipulo tan inala ra imay kilaw ya asno tan say ina to, intepet na saray totoon wadman: “Akin et uukbaran yo itay kilaw ya asno?” (Marcos 11:5) Balet sanen nadngel da ya parad Katawan iray ayayep, inabuloyan da iray disipulo ya awiten da iratan ed si Jesus. Sinapinan na saray disipulo so asno tan say kilaw to na ilalatop dan kawes, balet say kilaw so niluganan nen Jesus.

Ondarakel so totoo legan a manasingger ed Jerusalem si Jesus. Dakel so angibilkag na kawes da ed dalan. Say arum et nampuputer na saray sanga na kiew odino “mabulong a sangasanga diad kaumaan” tan imbibilkag da iratan. Iyeeyag da: “Sikatoy iliktar mo, ipikasi mi! Abendisyonan imay onsasabi ed ngaran nen Jehova! Abendisyonan imay onsabin Panarian na ama tayon David!” (Marcos 11:8-10) Sinmyodot iray Fariseo ya wadman lapud sarayan balikas. Inkuan dad si Jesus: “Managbangat, banom iray disipulom.” Inmebat si Jesus: “Ibagak ed sikayo, no ag-iraya onesel, saray bato so oneyag.”​—Lucas 19:39, 40.

Legan a sankabantag nen Jesus so Jerusalem, inmakis tan inkuan to: “No atebek mo labat komon ed sayan agew iray bengatlan nipaakar ed kareenan​—balet natan et agmo la nanengneng iratan.” Nadusa so Jerusalem lapud sikatoy agmatulok. Impasakbay nen Jesus: “Saray kalaban mo et paliberan da kay mauutok iran palitek tan atakien da kad amin a direksion. Deralen da ka tan saray anak mo a walad loob mo, tan anggapoy itilak dan anggan sakey a bato ed tapew na sakey a bato.” (Lucas 19:42-44) Tinmua so imbaga nen Jesus sanen aderal so Jerusalem diad taon 70 C.E.

Nen linmoob ed Jerusalem si Jesus, “agulo so interon syudad, ya inkuan da: ‘Siopa ’ya?’” Tan ibabaga na totoo: “Saya imay propeta a Jesus, a nanlapud Nazaret na Galilea!” (Mateo 21:10, 11) Saramay wadman ya akanengneng ed impamaoli nen Jesus ed si Lazaro et ibabaga rad arum iman a milagro. Dismayado iray Fariseo ta anggapoy pansusumpalan na gagawaen da. Inkuan dad sakey tan sakey: “Tinmumbok lad sikato so interon mundo.”​—Juan 12:18, 19.

Linmay Jesus ed templo pian manbangat, a singa niyugali to no ombibisitad Jerusalem. Pinaabig to ditan iray bulag tan piley. Sanen anengneng na saray manunan saserdote tan saray eskriba so gagawaen to tan nadngel da iray ugugaw a lalaki ed templo ya mangibabandoy, “Ilaban mo, ipikasi mi, so Anak nen David!” sinmanok ira. Inkuan dad si Jesus: “Narerengel moy ibabaga ra?” Inyebat to: “Agyo ta’n balot abasa iya, ‘Manlapud sangi na ugugaw tan saray kapangiyanak et akaawat ka na panangidayew’?”​—Mateo 21:15, 16.

Insan ninengneng nen Jesus iray bengatlan walad templo. Mansirunget lad saman kanian sikatoy tinmaynan a kaiba iray apostol. Sakbay ya onggapoy Nisan 10, sikatoy pinmawil ed Betania, tan diman nansanlabi.