Lusugu lua landuile, mu Lubingo Nisana 9, Yesu nu alandudi enji akatugile gu Betaniya ha guya gu Yelusalema. Tangua ahetele hehi nu Betefage, gu mulundu wa Olive, Yesu wadijigile alandudi enji mbadi egi:

“Nginenu mu dimbo didi gutuama dienu. Nu dishimbu ndo mbamusanga phunda ya mukaji ya gujitshiga nu mun’ayo, mu jijitulule, muze najio gudi ame. Gula muthu wamihula ndaga muzuela egi: ‘Fumu udi najio funu.’ Muene mbawujituma gatshididi.”—Matayo 21:2, 3.

Alandudi akhalelego mujiya egi ndaga jiaawambelele Yesu jiakhalele gudivua nu profesi ya Biblia. Uvi gungima, akotelesele egi yakhalele gutagana gua profesi ya Zakaliya. Wazuelele gutuama egi Fumu yago Nzambi watombele udi naye gungina gu Yelusalema udi wa ‘gudibulumuisa, wa guditumbiga holu dia shitu ya phunda ya mulume, holu dia mutumba wa phunda, mun’a shitu ya phunda.’—Zakaliya 9:9.

Tangua apostolo ahetele gu Betefage, azanguile mun’a phunda wa mulume nu gin’enji, athu akhalele agumagana hehi a ahudile egi: “Itshi mudi mujituluila mutumba wa phunda ngenyi?” (Mako 11:5) Uvi tangua avile egi Fumu udi nu funu ya shitu jiene, aabembele ha gubata shitu jiene gudi Yesu. Alandudi ahagele milele yawo holu dia mun’a phunda nu ginenji, uvi Yesu wakhalele holu dia phunda ya mutumba.

Hahetele Yesu hehi nu dimbo dia Yelusalema, athu ajile avula. Ako mukatshi diawo akhalele mubamba milele yawo mu njila. Ako akokele mandala, ako jisanzu jia mitshi jia gibisu jia mahia, akhalele gujibamba mu mavu. Akhalele muzuela mangololo egi: ‘Tuagutoga, huluisa! Gusuanguluga gukhale nu muthu udi muza mu jina dia Yehowa! Gusuanguluga gukhale nu Ufumu udi muza wa shi’ethu Davidi!’ (Mako 11:8-10) Afalese akhalele mukatshi dia athu avile gubola luholo athu akhalele mutumbuisa Yesu. Awambelele Yesu egi: ‘Mulongeshi, kanda alandudi aye.’ Yesu waavutudile egi: ‘Ngudi gumiwambela egi gila ene ahuena, maseso awa mbaamba miyelele.’—Luka 19:39, 40.

Hamonele Yesu dimbo dia Yelusalema, wasendesele gudila, wazuelele egi: ‘Nga ukotelese gaye ndaga jidi muguhua guhuima mu masugu awa! Uvi luenyelu ndaga jiene jiagusuegewa, wajiyilego gujimona.’ Yelusalema yakhalele naye gumona lamba mukunda nu gulumbuga guayo. Yesu wadiangele guzuela egi: “Enya gikembe giaye mbaagumbila giphango giakola ha gugujietesa nu ha guguphathega khanda jiagasue. Mbaagukuma hashi, aye nu an’aye adi mukatshi diaye. Mbaashigo mubemba seso dimoshi holu dia iko mu katshi diaye.” (Luka 19:42-44) Ndaga yazuelele Yesu mukunda nu gushiyiwa gua Yelusalema yatagenele mu givo 70 gia tangua dietu.

Tangua Yesu wanginyine mu dimbo dia Yelusalema, ‘athu agasue asendesele gushimana, azuelele gamba: “Nanyi muenyi’owu?”’ Athu avula asendesele guzuela egi: ‘Muene udi ngambi Yesu wa gu Nazaleta, dimbo dia gu Galile!’ (Matayo 21:10, 11) Athu akhalele mukatshi dia athu avula amonele luholo Yesu wafuzumuine Lazalo, awambelele athu ako ndaga yene yagushimana. Afalese akhalele muboguta handaga akhalelego nu ndaga iko ya gutshita. Asendesele gudizuelela egi: “Athu agasue na adi mumulandula!”—Yone 12:18, 19.

Gifua muakhadile khadilo dienji, tangua Yesu wayile gu Yelusalema, wanginyine mu tempelo ha gulongesa. Wasagele ifofo nu ikata. Tangua mafumu a nganga-nzambi nu alongeshi a mikhuala amonele ndaga jiakalegele muene nu luholo ategelele miyelele mavuala akhalele mumba mu mazui akola egi: ‘Tuagutoga, huluisa, Mun’a Davidi!’ avuile khabu. Mafumu a mangumba ahudile Yesu egi: “Aye udi muvua idi an’awa muzuela ba?” Yesu wazuelele egi: “Uvi enue muatangelego mbimbi egi, ‘Aye wahetele lutumbu mu makano a ana, nu itebe idi muwamua mele ba’?”—Matayo 21:15, 16.

Yesu watalele ima yakhalele mu tempelo. Luholo tangua diakhalele diayi gale, muene nu apostolo enji avutugile gu Betaniya, gutuama egi lusugu lua Nisana 10 lusendese. Abandele guene mu phipha ya lubingo.