Nisan killapa 9 kaq punchawninpim Jesusqa qatiqninkunawan Betaniamanta Jerusalenmanña rirqa, chayqa karqa domingo punchawñam. Olivos muqupi Betfague llaqtaman chayaruspanñataqmi qatiqninkunata kamachirqa.

Nirqam: “Riychikyá wak chimpapi llaqtachaman, chaypim tarinkichik watasqa asnota malta asnochantinta, paskamuspaykichikyá pusamuwaychik. Pipas imatapas nisuptikichikqa ninkichikmi: ‘Señormi munachkan’, nispa. Hinaptinmi payqa chaylla quykamusunkichik”, nispa (Mateo 21:2, 3).

Jesuspa qatiqninkunaqa manam musyakurqakuchu chaynata Jesuspa kamachisqanqa Diosmanta willakuqkunapa nisqankuman hina kasqantaqa. Chaymanta qipakunamanñam yacharqaku Zacariaspa willakusqanman hina kasqanta. Payqa willakurqam Diospa akllasqan kamachiqqa mana hatun tukuspan ‘malta asnochapi hamunanmanta’ (Zacarias 9:9).

Betfague llaqtaman chayaruspankuñataqmi Jesuspa qatiqninkunaqa maman asnotawan malta asnochantinta kacharirqaku, hinaptinmi chaypi runakuna nirqaku: “¿Imatataq ruwachkankichik chay asnochata paskaspaykichik?”, nispa (Marcos 11:5). Chaywanpas señorpaq kasqanta yacharuspankum manaña harkakurqakuñachu. Jesuspa qatiqninkunañataqmi pachankuwan asnochakunata karunarqaku, hinaptinmi Jesusqa malta asnochapi sillakurqa.

Jesusqa Jerusalenman chayasqanman hinam achka runakunawan tuparqa. Wakinmi hawa pachankuta ñanpi mastarqaku, wakinñataqmi sachakunapa kallmankunata, hinaspam qapariywan nirqaku: “¡Dioslláy, ama hina kaspaykiyá salvaykuy! ¡Bendecisqayá kachun Jehova Diospa sutinpi hamuqqa! ¡Bendecisqayá kachun taytanchik Davidmanta hamuq kamachikuqqa!”, nispa (Marcos 11:8-10). Chayta uyariruspan fariseokunaqa piñakuspa Jesusta nirqaku: “¡Yachachikuq, qatiqnikikunata upallachiy!”, nispa. Jesusñataqmi nirqa: “Nikichikmi: Paykuna upallalla kaptinkuqa, rumikunachá qaparinmanku”, nispa (Lucas 19:39, 40).

Chaymantam Jesusqa Jerusalenta qawaykuspan waqaspa nirqa: “Allinchá kanman karqa hawkayaypaq kaqkunata kay punchaw entiendeptikiqa, kunanmi ichaqa mana rikunaykipaq hina pakasqaña kachkan”, nispa. Judiokunaqa llullankuta mana kasukusqankuraykum llakikuypaqña kananku karqa, chaymi Jesusqa nirqa: ‘Enemigoykikunam muyuriqnikipi sayarachinqaku ñawchi puntayuq kaspikunata, hinaspam chawpicharususpayki tukuy lawnikimanta ñakarichisunki, chaynataqmi qamtaqa pampaman chamqapasunki llapallan churikikunatawan kuskata, manataqmi ima rumipas qampiqa pirqasqaqa qipanqachu’, nispa (Lucas 19:42-44). Chaynata Jesuspa willakusqanqa 70 kaq watapim cumplikurqa.

Chaymantam Jerusalenmanña Jesus yaykuptin runakunaqa chaqwata ruwarqaku. Hinaptinmi wakinqa niqku: “¿Pitaq payqa?”, nispa, wakinñataqmi niqku: “¡Diosmanta willakuq Jesusmi, payqa Galilea law Nazaret llaqtayuqmi!”, nispa (Mateo 21:10, 11). Lazarota Jesus kawsarirachisqanta rikuq runakunapas hukkunamanmi chay rikusqankumanta willakurqaku. Fariseokunañataqmi manaña imanakuytapas atiqkuchu, chaymi ninakuqku: “Llapa runakunam qayllanchikpiraq payta qatichkanku”, nispa (Juan 12:18, 19).

Jesusñataqmi sapa kuti ruwasqanman hina Diospa wasinman rirqa Diosmanta chaypi willakunanpaq. Chaypitaqmi warmachakunapas qaparispa niqku: “¡Dioslláy, ama hina kaspaykiyá  Davidpa churinta salvaykuy!”, nispa. Hinaptinmi riqsisqa sacerdotekunawan escribakunaqa piñakuspanku Jesusta nirqaku: “¿Uyarichkankichu paykunapa nisqanta?”, nispa. Jesusñataqmi nirqa: “¿Manachu haykapipas leerqankichik ‘warmachakunapiwan wawakunawanmi alabaykachikunki’ nisqanta?”, nispa (Mateo 21:15, 16).

Chaymantam Jesusqa Diospa wasinpi muyuriqninta qawarirqa, ichaqa inti waqtaykuyña kaptinmi qatiqninkunawan kuska Betaniaman kutikurqa. Hinaspam domingo tutaqa chaypi puñurqa, chay tutaqa nisan killapa 10 kaq punchawninñam karqa.