Nisán killapi 9 p’unchay domingopin Jesusqa discipulonkunapiwan Betaniamanta lloqsispa Jerusalenman puririranku. Olivos orqopi kaq Betfagué llaqtachaman qayllaykushaqtinkutaq Jesusqa iskay discipulonkunata niran:

“Jaqay rijurimushaq aylluman riychis, chayman jaykuspaykichis jinan tarinkichis juj china asnota malta asnontin watarayashaqta, jinaspa paskaruspa aysamunkichis. Pipas ima nispapas nisunkichisman chayqa, ‘Señormi munashan’ nispan ninkichis. Jinan payqa aysachimusunkichispacha”, nispa (Mateo 21:2, 3).

Jesuspa chay nisqanwanqa profeta Zacariaspa willasqanmi junt’akunan karan. Paymi Diospa ajllasqan reymanta willaranña: ‘Reyniykin asnopi sillaykusqa jamunqa’, nispa (Zacarías 9:9). Apostolkunan ichaqa chaymantaña chay profecía junt’akusqanta repararanku.

Chay iskay discipulokunataq Betfagué llaqtachaman chayaspa chay asnokunata paskaranku, jinan wakin runakunaqa niranku: ‘¿Imapaqmi asnota paskashankichis?’, nispa (Marcos 11:5). “Señorpaqmi” niqtinkutaq mana jark’arankuchu. Jinan china asnota maltantinta aysamuranku. Chaymantataq iskaynin asnokuna pataman jawa p’achankuta caronaykuranku. Jesustaq malta asnopi sillaykuran.

Jerusalenman achhuykusqanman jinataq askha runakuna ñanman jawa p’achankuta mast’aranku, jujkunataq “raphisapa k’allmakunata” mast’aranku. Runakunan nisharanku: ‘¡Salvasqa kachun Jehová Diospa sutinpi jamuqqa! ¡Sumaqpaq qhawarisqa kachun taytanchis Davidpa jamuq gobiernonqa!’, nispa (Marcos 11:8-10). Fariseokunan ichaqa phiñasqa niranku: “Yachachikuq, discipuloykikunata upallachiy”, nispa. Jinan Jesusqa niran: “Paykunachus upallankuman chayqa, rumikunan qaparinman”, nispa (Lucas 19:39, 40).

Chaymantan Jesusqa Jerusalén llaqtata qhawarispa waqaran: “Maytan munayman karan thaj kayman apaq ñanta reparanaykita, kunanmi ichaqa ñawiykimanta pakasqaña kashan. P’unchaykunan chayamunqa, chaypin enemigoykikuna muyuriqniykipi estaca jina k’aspikunawan cercospa muyuykusunkiku [...], jinaspan qanta wawaykikunatawan pampakama ñut’usunkiku, manataqmi ni juj rumillatapas rumi patapi saqenqakuchu”, nispa (Lucas 19:42-44). Chay nisqanmi junt’akuran 70 watapi Jerusalén thunisqa kaqtin.

Jesús Jerusalenman jaykuqtinmi llapa runakuna ninakuranku: “¿Pitaq kayri?”, nispa. Runakunataq niranku: “¡Payqa Galileapi kaq Nazaret llaqtayoq Jesusmi!”, nispa (Mateo 21:10, 11). Lazarota Jesús kausarichisqanta rikuq runakunataq willasharanku chay rikusqankumanta. Fariseokunataq ninakuranku: “Qhawariychis, manan kunankama imatapas ruwayta atishanchischu, lliu runataqmi paypa qhepantaqa ripushankupas”, nispa (Juan 12:18, 19).

Jesusqa templomanmi jaykuran yachachinanpaq. Chaypin ñausakunata wist’ukunatapas qhaliyachiran. Umalli sacerdotekunataq juj umallikunapiwan sinchita phiñakuranku chayta rikuspa, templopi waynachakunaq: “¡Salvasqa kachun Davidpa Churinqa!”, nispa qaparisqankutawan uyarispa. Chaymi Jesusta niranku: “¿Uyarishankichu kaykunaq imatachus nisqankuta?”, nispa. Jinan Jesusqa niran: “Arí, uyarishanin. ¿Manachu leerankichis: ‘Erqechakunan, wawakunan siminwan jatunchasunki’, nisqa kasqanta?”, nispa (Mateo 21:15, 16).

Chaymantataq templopi tukuy imaymana kaqkunata qhawariran. Tardeña kaqtintaq manaraq inti chinkaykushaqtin apostolninkunawan Betania llaqtachaman kutipuran. Chaypin chay p’unchay samariran.